Read Hmar FESUOKNA 14 Bible Online

FESUOKNA 14 - Hmar bible

FESUOKNA 14

¹Chun, LALPAIN Mosie kuomah,

²“Israel mihai kuomah hril la, ‘Kîr nâwk hai sienla, Pi-hahiroth phâk hma, Migdol le tuipui inkâr, tuipui kâwl, Baalzephon hma zâwn, a ep chieah chun riebûk bâwl raw hai se.

³Chuongchun, Pharaoin Israel mihai chu, “Rampalailakah an inhmanga thlalêrin anni a khârkhum an tah,” tîng a tih.

⁴Chun, Pharao lungril chu sukngar ka ta, anni chu hung hnawtzui a tih; chun, Pharao le a sipaihai chungah ropuina chang ka tih: chun, Aigupta mihai chun LALPA ka ni mi hre tâng an tih,’ tiin,” a ti a. Chuong ang tak chun an thaw ta a.

⁵Mipui chu an tlân suok tah ti Aigupta lal chu hrila a um chun, mipui chungthua Pharao le a siehlawhai lungril chu ân let ta thut a, “Hi thil ei thaw hi ieng am a ni a, Israel mihai ei rawng an bâwlnaa inthawk ei insuoktir el hi?” an ti a.

⁶Pharao chun a sakawr tawlailîrhai chu a siemrêl a, a mihai chu a ṭhuoi a,

⁷Aiguptaa sakawr tawlailîr po po le, sakawr tawlailîr thlang ṭhieu za ruk, an chunga sipai hotu seng leh a ṭhuoi a.

⁸Chun, LALPA chun Aigupta lal Pharao lungril chu a sukngar a, Israel mihai chu a hnawt zui ta a; Israel mihai chu muongchara suok an ni si a.

⁹Aigupta mihai chun an hnungah an hnawt ta a, Pharao sakawr tawlailîr le sakawr po po le, a sakawr chung chuong mihai le, a sipai ruol le chun; chuongchun, Baalzephon ep, Pi-hahiroth sîr, tuipui kâwla an riebûk bâwlnaa chun an hnawt phâk ta a.

¹⁰Pharao chu a hung hnai chun Israel mihai chun an hang en a, an hnunga Aigupta mihai hung ṭhuop ṭhuop chu an hang hmu a, nasatakin an ṭi a, Israel mihai chun LALPA chu an ko ta a.

¹¹Mosie kuomah, “Aiguptaah thlânhai a um naw leiin a ni maw thlalêra thi dinga i mi ṭhuoi suok hi? Aiguptaa inthawk mi ṭhuoi suok a i thilthaw dân hi iengtizie am a na?

¹²Aiguptaa khawm Aigupta mihai rawng kan bâwl theina dingin mi tosan el rawh, ‘Thlalêra kan thi hmang nêk chun Aigupta mihai rawng hi bâwl inlang kan ta dingin a ṭha lem si a,’ tia i kuoma kan hril kha hi hi a ni ta ngei ni lo am a nih?” an ti a.

¹³Mosie chun mipui kuoma chun, “Ngîr ṭawk ṭawk unla, ṭi naw ro, LALPA sandamna, in ta dinga vawisûn a thaw ding chu en el ro; vawisûna Aigupta mi in hmuhai hi kumkhuoin in hmu nâwk ta naw ding a ni si a.

¹⁴LALPA chun in ta dingin do a ta, nangni ruok chu in um ṭawk ṭawk ding a nih,” a ta.

¹⁵LALPA chun Mosie kuomah, “Iengdinga i mi ko am a na? Israel thlahai kuomah hril la, hmatieng fe pei raw hai se.

¹⁶I hmawl kha chawi sâng la, i kut kha tuipui chungah phar suok la, tuipui chu ṭhe rawh, Israel mihai chu tuipui inkâra chun hnuoi hula an fe theina dingin.

¹⁷Chun, keiin Aigupta mihai lungril sukngar ka ta, an hnungah hung lût vêng an tih; chun, Pharao le a sipai ruol po po, a sakawr tawlailîr po po le, a sakawr chung chuong mihai chungah ropuina chang ka tih.

¹⁸Aigupta mihai chun Pharao le a sakawr tawlailîrhai le a sakawr chung chuong mihai chunga ropuina ka chang pha chun LALPA ka nih ti hre tâng an tih,” a ta.

¹⁹Chun, LALPA vântirko Israelhai bûk hmaa fe chu ân tâwl a, an hnungah a fe ta a: chun, sûm ngîr chu an hmaa inthawkin ân tâwl a, an hnungah a ngîr a:

²⁰Israel mihai le Aigupta mihai riebûk inkâra chun a hung a. Chuongchun, sûm le inthim chu a um a, zân chu sûm chun a sukvar hlau thung a, zânkhuoin tu tu khawm an inhnai tuo naw a.

²¹Chun, Mosiein tuipui chunga chun a kut a phar a, chun LALPAIN sak thli hrâttak zânkhawvâra hrângin tuipui chu ân luong kîrtir a, tuipui chu ram ṭâwlah a siem a, tuihai chu an inṭhe ta a.

²²Israel mihai chu tuipui inkâra chun hnuoi hulah an fe ta a; tuihai chu an changtieng le vawitieng bang angin a um a.

²³Aigupta mihai chun an hnawt pei a, Pharao sakawrhai, a sakawr tawlailîrhai le, a sakawr chung chuong mihai po po chu an hnunga chun tuipui inkâra chun an lût ve a.

²⁴Zîngtieng vêng hunah[10] LALPA chun Aigupta sipai ruol chu mei ngîr le sûma chun a zuk en a, Aigupta sipai ruol chu a sukbuoi ta a.

²⁵An sakawr tawlailîr kekuolhai chu a sukthlawngpêk a, intaktakin an khal ta a; chuongchun, Aigupta mihai chun, “Israelhai hmaa inthawkin tlân el ei tiu, LALPA chun an ta dingin Aigupta mihai chu a dopêk a ni hi,” an ti a.

²⁶Chun, LALPAIN Mosie kuomah, “Tuipui chungah i kut kha phar rawh, Aigupta mihai le, an sakawr tawlailîrhai le, an sakawr chung chuong mihai chungah tui chu a hung luongna dingin,” a ti a.

²⁷Mosie chun tuipui chunga chun a kut chu a phar a, zîngkâr a hung ni chun tuipui chu a luong hrât pângngaiin a luong nâwk ta a; Aigupta mihai chu an tlânsie a, LALPA chun Aigupta mihai chu tuipuia chun a pei lût ta a.

²⁸Tui chu a kîr nâwk a, sakawr tawlailîrhai, sakawr chung chuong mihai le, Pharao sipai ruol, an hnunga hung hnawttuhai ngei chu ân khum ta vawng a, pakhat khawm hlain an um ta naw a.

²⁹Israel mihai ruok chu tuipui kâra chun hnuoi hulah an fe a, tui chu an changtieng le vawitieng chun bang angin a umpêk a.

³⁰Chu ni chun LALPAIN Israelhai chu Aigupta mihai kuta inthawkin a sanhim ta a, tuipui kam vêla Aigupta mi thihai chu Israelhai chun an hmu a.

³¹Israelhai chun Aigupta mihai chunga LALPAIN thil ropuitak a thaw chu an hmu a, mipui chun LALPA chu an ṭi ta a; LALPA le a siehlaw Mosie chu an ring ta a.