Read Hmar FESUOKNA 15 Bible Online

FESUOKNA 15 - Hmar bible

FESUOKNA 15

¹Chun, Mosie le Israel mihai chun LALPA kuomah hi hla hi an sak a, “Ropuitaka a hne ta leiin LALPA kuomah hla sak ka tih. Sakawr le a chunga chuong chu tuipuiah a pei lût a.

²LALPA chu ka hrâtna le ka hla a nih, Ka sandamna khawm a hung ni tah; Hi hi ka Pathien a na, ama chu inpâk ka tih: Ka thlatu Pathien a na, ama chu chawimawi ka tih.

³ LALPA chu indo mi a nih; LALPA chu a hming a nih.

⁴Pharao sakawr tawlailîrhai le sipai ruol chu tuipuiah a pei lût ta a; A sipai hotu thlanghai khawm chu Tuipui Senah an tlum zo tah.

⁵Limawng inthûkahai chun lung angin an tlum thla a; Tuipui inthûk chun anni ân khum a.

⁶Aw LALPA, i kut changtieng chu thilthawtheinain a ropui a, Aw LALPA, i kut changtieng chun hmêlma chu a nuoihâwp a.

⁷I lalna ropuina chun nangma dotuhai che chu i peithlâk a: I lunginsenna chu i tir suok a, anni chu bupawl angin a kânghmang a.

⁸I hnarkuohai mûtthlît chun tuihai chu ân thuo ûr a, Tui lienhai chu vûm thûrin a ngîr ta a; Tuipui sûngrila limawnghai chu sukkhalin an um ta a.

⁹Hmêlma chun, ‘Hnawt ka ta, hnawtphâk ka ta, râllâk thil chu sem ka tih; Ka dittâwkin annia inthawk lâng ka ta, Ka kâwlhnâm phawi ka ta, ka kutin anni sukbohmang ka tih,’ a ti a.

¹⁰Nangin i thli chun în mûttir a, tuipui chun anni ân khum ta a: Tui hrâtahai chun sûon tlang angin an tlum hmang ta a.

¹¹Aw LALPA, pathienhai lai hin nanga ang tu am an um a? Inthiengnaa ropui, thilthaw ropuihaia ṭium, Thilmakhai thaw, Nanga ang tu am an um a?

¹²I kut changtieng chu i phar a, Anni chu hnuoiin a lem zo ta a.

¹³Nangin i zângainain mipui în tlanhai chu i ṭhuoi a; I umna hmun inthiengah i hrâtnain anni chu i ṭhuoi a.

¹⁴Mipuihai chun an hriet a, an inthin a; Philistin mihai chu lungngainain an sip a.

¹⁵Tuhin Edom lalhai chu an lunginzîng a, Moab mi hrâthai chu inthinnain a man a, Kanaan hluotuhai po po chu an intui zo ta a.

¹⁶Inlâuna le ṭitnain anni a vûr a, I kut thahrâtna leiin anni chu lung ang elin an to ṭawk ṭawk a; I mipuiin an fe khêl chenin, Aw LALPA: I mipui i închâwkhaiin an fe khêl chen chun.

¹⁷Nangin anni chu hung la lût i ta, i ro tlângah phun i tih; Aw LALPA, nangin i umna hmun dinga i siema chun, Aw LALPA, hmun inthieng nangin i kuta i siema chun.

¹⁸LALPA chun chatuonin ro rêl a tih,” tiin.

¹⁹Pharao sakawrhai chu a sakawr tawlailîrhai le sakawr chung chuong mihai leh tuipuiah an lût phing chun, LALPAIN tuipui tuihai an chungah ân luongtir nâwk ta si a; Israel mihai ruok chu tuipui inkâra chun hnuoi hulah an fe a.

²⁰Chun zâwlneinu Miriam, Aron farnu chun khuongtê a lâk a, nuhmei po po chun khuongtêhai le lâmin an zui a.

²¹Miriam chun, “Ropuitaka a hne ta leiin LALPA kuoma chun hla sak ro; Sakawr le a chunga chuong chu tuipuiah a pei lût a,” tiin a dawn a.

²²Mosie chun Israelhai chu Tuipui Sena inthawk chun a ṭhuoi pei a, Sur thlalêr chu an hung tlung ta a, chun, thlalêra ni thum an fe chun tui an hmu ta naw a.

²³Mara hmun an hung tlung chun, Mara hmuna tui chu a khâk leiin an dâwn thei ta naw a; chuleiin, chu hmun chu Mara[11] inbûk a ni ta a.

²⁴Mipui chu, “Ieng am dâwn tâng ei ta?” tiin Mosie chungah an chier ta a.

²⁵Ama chun LALPA chu a ko a; LALPA chun thing ân entir a, chu chu tuia chun a dêng lût a, tui chu a hung inhnik ta a. Chutaka chun dân le dân ziek chu an kuomah a siem a, anni chu chutaka chun a fie bawk a:

²⁶ama chun, “LALPA in Pathien rawl chu nguntaka in ngai a, a mit hmua thildik chu in thaw a, a thupekhai tieng in na in sit a, a dân ziekhai chu in vawng tlat chun, Aigupta mihai chunga kân tlungtir natnahai hrim hrim kha in chungah intlungtir dêr naw ningah: LALPA nangni sukdamtu cheu chu ka ni si a,” a ti a.

²⁷Chun, Elim an hung tlung a; chu hmuna chun tuikhur sâwmpahni le tûm thing sawmsari an um a; chuongchun, tuikhurhai vêla chun bûk an khuor ta a.