Read Hmar FESUOKNA 17 Bible Online

FESUOKNA 17 - Hmar bible

FESUOKNA 17

¹Israel mipui po po chu LALPA thupêk angin, an inzin dânbi ang peiin, Sin thlalêra inthawk chu an suok ta a, Rephidimah puon in an zar a; nisienlakhawm, chu hmuna chun mipui ta dingin tui dâwn ding a um naw a.

²Chuleiin, mipui chun Mosie an insêlpui a, “Tui dâwn ding mi pe rawh,” an ti a. Mosie chun an kuomah, “Iengdinga kei in min sêlpui am a na? Iengdinga LALPA chu in fie am a na?” a ti a.

³Mipui hlak chu tui duin an dang a châr hle a, Mosie chunga chun an chier a, “Aiguptaa inthawk keini le kan nauhai le kan ran ruol leh dangchâra mi sukhlum dingin iengdinga i mi ṭhuoi suok am a na?” an ti a.

⁴Mosie chun LALPA a ko a, “Hi mipui hi iengtin am thâwng ka ta? Lunga mi dêng dingin an intûng el a ni si a,” tiin.

⁵LALPA chun Mosie kuomah, “Mipui hmaa chun fe la, Israel upahai i kuomah ṭhuoi la, chun, vadung i vuokna hmawl kha i kutin chawi bawk la, fe rawh.

⁶Ngai ta, Horeba lungpui chunga sawn i hmaah ngîr ka ta; chun, lungpui chu vuong i ta, a sûnga inthawkin tui hung suok a tih, mipuiin an dâwn theina dingin,” a ti a. Mosie chun Israel upahai mithmu ngeiah chuong ang tak chun a thaw ta a.

⁷Chun, Israel mihai helna leiin le “LALPA hi eini lai a um am a ni, a um naw?” tia, LALPA an infiena lei chun, chu hmun hminga chun Massa[13] le Meriba[14] ân bûk ta a.

⁸Chun, Amalekhai chu an hung a, Rephidimah Israelhai chu an hung do ta a.

⁹Mosie chun Joshua kuomah, “Eini lai pasalhai thlang suok la, fe unla, Amalekhai chu va do ro; zîngah Pathien hmawl chu ka kuta chawiin tlâng sîpah ngîr ka tih,” a ti a.

¹⁰Joshua chun a kuoma Mosiein a hril ang tak chun a thaw a, Amalekhai chu an do ta a; Mosie, Aron le Hur chu tlâng sîpa chun an hang fe ta a.

¹¹Mosiein a hmawl ân let sûng po chu Israelhai chun an hne a, chun, a kut a lâkthlâk phingleh Amalekhai chun an hne ve thung pei a.

¹²Mosie kuthai chu a hung kham chun, lung an lâk a, a hnuoia chun an sie a, chu chunga chun a ṭhung ta a. Aron le Hur chun sîr khatah pakhat, sîr dangah pakhatin a kuthai chu an dawm tung zing a; chuongchun, nisa tlâk hmakhat chu a kuthai chu a phar thei ta zing a.

¹³Chun, Joshua chun Amalek le a mihai chu kâwlhnâmin a sun thlûk dêr tâwl ta a.

¹⁴Chun, LALPA chun Mosie kuomah, “Lekhabuah hi hi hriet zingna dingin ziek la, vân hnuoi po poa inthawkin Amalek hriet zingna hi thai hmang dêr ka tih ti Joshua naa chun inhriettir rawh,” a ti a.

¹⁵Chun, Mosie chun maichâm a siem a, a hminga chun “Jehova- Nissi”[15] ân bûk a;

¹⁶“LALPA chu ka puonzâr a nih” tiin. “LALPA chu ân khâm ta a,[16] LALPA chun a thlahai thla nâwksâwng chen khawmin Amalek chunga hin dona nei hlak a tih,” tiin