Read Hmar FESUOKNA 19 Bible Online

FESUOKNA 19 - Hmar bible

FESUOKNA 19

¹Israelhaiin Aigupta an suoksana inthawka a thla thumna, chu ni tak chun Sinai thlalêr an tlung a.

²Rephidim an mâksan a, Sinai thlalêr an hung tlung chun thlalêra chun puon in an zar a; chutaka chun Israelhai chun tlâng hmaa chun bûk an khuor a.

³Mosie chu Pathien kuomah a hang fe a, chun, tlânga inthawkin LALPA chun ama a hung ko a, “Jakob sûnghai lai chun hieng hin hril la, Israel mihai chu hril rawh;

⁴Aigupta mihai chunga ka thilthaw tahai le, mupui thlahai chunga phur cheua ka kuoma ngei ka ṭhuoizie cheu kha in hmu ta a.

⁵Chuleiin, tuhin, ka thu in zâwm famkim a , ka thuthlung in vawng tlat chun, hnuoi hi ka ta a ni si a, hnam dang po po lai chun ka ro bîk nîng in tih; hnuoi pumpui hi ka ta a ni si a.

⁶Chun, ka ta dingin thiempuhai ram le hnam inthieng ni bawk in tih. Hieng thuhai hi a nih Israel mihai kuoma i hril ding chu,” a ti a.

⁷Chun, Mosie chu a hung a, Israel upahai chu ân kotir a, hieng thuhai po po LALPAIN a kuoma thu a pêkhai chu an hmaah a târlang ta a.

⁸Chun, mipui po po chun a ruolin an dawn a, “LALPAIN a hril po pohai chu thâwng kan tih,” an ti a. Mosie chun mipui thuhai chu LALPA kuoma chun ân tlun ta a.

⁹ LALPA chun Mosie kuomah, “Ngai ta, i kuoma thu ka hril lai an hriet theina ding le, kumkhuoa an ring zing theina ding chein, sûm sâmup lai i kuomah hung ka tih,” a ti a. Mosie chun mipui thuhai chu LALPA chu a hril a.

¹⁰LALPA chun Mosie kuomah, “Mipui kuoma chun fe la, vawisûn le zîngah sukthieng rawh, an silfênhai chu sâwp hai sienla;

¹¹ni thum ni chun inzo hieuin um raw hai se, chu ni thum ni chun Sinai tlâng chungah mipui po po mithmuah LALPA chu a hung ṭum ding a ni si a.

¹²Chun, a vêlin ramrihai khangpêk i ta, Tlâng hang kai lo dingin le a sîr vêl tâwk lo dingin invêng ṭha ro; tukhawm tlâng tâwk taphawt chu sukhlum nîng a tih;

¹³ama chu kut hrimin tâwk naw ni a, dêng hlum, annawleh, kâp hlum nîng a tih; sa khawm ni sien, mihriem khawm ni sien hring naw hrim hrim a tih: tawtawrâwt sâwttak ân ri pha, tlânga chun hung lâwn an tih,” a ti a.

¹⁴Mosie chu tlânga inthawk chun mipui kuomah a fe thla a, mipui chu a sukthieng a, an silfênhai chu an sâwp ta a.

¹⁵Chun, mipui kuoma chun, “Ni thum nia chun inzosa hieuin um unla, nuhmei khawm pâwl dêr naw ro,” a ti a.

¹⁶Ni thum ni chun zîngkâr a la ni laiin, vâninrûmhai, ṭêktlahai, tlâng chunga sûm sâmup le, tawtawrâwt ri inringtak el chu a um ta a; bûka mipui um po po chu an inthin ta a.

¹⁷Mosie chun mipui chu Pathien tuok dingin bûka inthawk chun a hung ṭhuoi suok a, tlâng ṭhuta chun an ngîr ta a.

¹⁸LALPA chu meichawka a hung ṭum leiin, Sinai tlâng po po chu a khu ta vawng el a; chu khu chu rawtuina meikhu angin ân tung ta lui el a: tlâng chu nasatakin ân hnîng bawk a.

¹⁹Tawtawrâwt ri chu a hung inring deu deu chun Mosie chun a hang biek a, Pathien râwlriin[23] a hung dawn ta a.

²⁰LALPA chu Sinai tlâng chungah, tlâng sîpa chun a hung ṭum a: chun, Mosie chu tlânga chun a zuk ko a, Mosie chu a hang fe ta a.

²¹LALPA chun Mosie kuomah, “Fe thla la, mipui chu khap rawh, chuong naw chun hung en dingin LALPA kuom hung nêr thleng hlau an ta, mi tamtak bohmang rawi an tih.

²²Chun, thiempuhai LALPA hnaia hunghai khawm chu insukthieng raw hai se; chuong naw chun an chungah LALPA lungninaw rawi a tih,” a ta.

²³Mosie chun Lalpa kuomah, “Tlâng chu a vêlin ramri khang unla, sukthieng ro,” tia thu i mi pêk lei khan mipui chu Sinai tlângah hung kai thei naw ni hai, a ta.

²⁴LALPA chun a kuomah, “Fe rawh, nang zu fe thla la, Aron ṭhuoiin hung i ta, nisienlakhawm, thiempuhai le mipui chu LALPA kuoma hung dingin hung innêr thlengtir naw rawh, chuong naw chun an chungah LALPA lungninaw rawi a tih,” a ti a.

²⁵Chuongchun, Mosie chu mipui kuoma chun a fe thla a, anni chu a hril ta a.