Read Hmar FESUOKNA 2 Bible Online

FESUOKNA 2 - Hmar bible

FESUOKNA 2

¹Chun Levi sûnghai laia mi pakhat chu a fe a, Levi naunu nuhmeiin a nei ta a.

²Nuhmei chu ân rai a, naupasal a hung nei a; naupang hmêl ṭhatak a nih ti a hmuin thla thum a thuphmang a.

³Chun, ama chu a thuphmang zing thei naw phingleh phairuong lawng a lâk a, fâr hnai le lawng hnaiin a zût a; chu sûnga chun naupang chu a sie a, vadung sîra phairuonghai lai chun a sie ta a.

⁴Ama chu iengtin am a um pei ti hre dingin a farnu chu hla fea hin a ngir a.

⁵Chun Pharao naunu chu vadunga insil dingin a hung thla a; a nunghâkhai chu vadung pang hrûla chun an fe vêl a; phairuonghai laia lawng chu a hmu ta a, nunghâk pakhat chu va la dingin a tir a.

⁶A hang hawng chun nautê chu a hmu a: chun, ngai ta, nautê chu a ṭap ta a. Ama chu a lunginsiet a, “Hi hi Hebrai nauhai laia pakhat chu a ni ngei el,” a ti a.

⁷Chun a farnu chun Pharao naunu kuomah, “Fêng ka ta, Hebrai nuhmei naudawntu, hi nautê dawnpêktu ding che hi ka va kopêk ding che am a nih?” a ti a.

⁸Pharao naunu chun a kuomah, “Va fe rawh,” a ti a. Chun nuhmeite chu a fe a, naute nu ngei chu a va ko ta a.

⁹Chun, Pharao naunu chun a kuomah, “Hi naute hi la la; ka ta dingin dawn rawh; chun, i hlaw tâwk pêng ka ti che,” a ti a.

¹⁰Chun, nuhmei chun naute chu a lâk a, a dawn ta a. Naute chu a hung inṭhang lien a, Pharao naunu kuomah a hung ṭhuoi a, a naupa a hung ni ta a. Chun, “Tuia inthawka ka lâk suok a ni a” tiin a hmingah Mosie a sak a.

¹¹Mosie chu a hung puitling a, ni khat chu a unauhai kuomah a va fe a; an rikphurhai chu a hmu a: chun, a unauhai laia mi pakhat, Hebrai mi, Aigupta miin a vuok a hmu a.

¹²Chun, a ngha vêl a ngha vêl a, mi tukhawm an um nawh ti a hmu phingin Aigupta mi chu a vuok hlum a, phaiphinah a thuphmang ta a.

¹³A ni hninaa a va fe suok nâwk chun, ngai ta, Hebrai mi pahni an lo insuol a; ama chun a thil suksuoltu lem kuoma chun, “Iengdinga i unau i vuok am a na?” a ti a.

¹⁴Ama chun a kuomah, “Kan chungah lal le rorêltuin tuin am a siem che a? Aigupta mi i that ang khan kei khawm hi mi that i tum a ni maw?” a ti a. Chun, Mosie chu a ṭi ta a, “Hi thil hi hriet suokin a um chie tah a ni hi,” a ti a.

¹⁵Pharao chun chu thil chu a hriet phingleh, Mosie chu sukhlum dingin a zawng ta a. Nisienlakhawm, Mosie chu Pharao hmaa inthawk a tlân hmang a, Midian ramah a um ta zing a; chun, tuisunsuo sîrah a ṭhung ta a.

¹⁶Midian mihai thiempu chun naunuhmei pasari a nei a; anni chu an hung a, tui an chawi a, an pa berâm ruol chu tui pe dingin tuibêlhai chu an thâl sip a.

¹⁷Chun, berâmpuhai chu an hung a, anni chu an hnawt hmang ta a; nisienlakhawm, Mosie chu a ngîr a, anni a ṭhangpui a, an berâm ruol chu tui ân dâwntir ta a.

¹⁸An pa Reuel kuomah an hung chun, “Iengtizie am a na vawisûn chu in va hung inhma de?” a lo ti a.

¹⁹Anni chun, “Aigupta mi pakhatin berâmpuhai kuta inthawk a mi sansuok tâwl a nih, chu bak khawm chu ni lovin tui a mi chawipêk a, kan berâm ruol tui ân dâwntir bawk a,” an ti a.

²⁰Ama chun a naunuhai kuomah, “Anleh ama chu khâwlai am a um a? chu mipa chu iengdinga in hung mâksan am? Bei fa dingin ama chu hung ko ro,” a ta.

²¹Chun, Mosie chu chu mipa kuoma um ding chun ân sukthlûk ta a; ama chun a naunu Zippora chu Mosie a pêk a.

²²Zippora chun naupasal a nei a. Mosie chun, “Hrietlo rama inzin ka ni tah,” a ti a, a hmingah Gersom a sak ta a.

²³Chuong ni tamtak sûng chun Aigupta lal chu a thi ta a. Israel mihai chu an intângna lei chun an thuok a dawng hle a, Pathien an ko a, an intângna leia ama an kona chun Pathien kuom a tlung ta a.

²⁴Pathienin an inrûm chu a hriet a, Abraham, Isak le Jakob kuoma a thuthlung chu Pathienin a hriet zing a.

²⁵Chun, Israel mihai chu Pathien chun a hmu a, anni chu a hriet zing bawk a.