Read Hmar FESUOKNA 22 Bible Online

FESUOKNA 22 - Hmar bible

FESUOKNA 22

¹“Mîn bâwngchal amanih, berâm inru sienla, lo zawrin amanih lo that sienla; bâwngchal pakhat aia chun bâwngchal panga pêng a ta, berâm pakhat aia chun berâm pali a pêk ding a nih.

²Inru chu ina a lût lai hmuin, vuokin lo thi ta sienla, ama chunga chun thisen phuba um naw nih.

³Ama chunga chun nisa a suok ta chun, ama ta dingin thisen phuba chu um a tih. Inru chun a thung ngei ding a nih. Iengkhawm a nei naw chun ama chu iengkhat inrûk mana zawr ding a nih.

⁴A thil inrûk chu, bâwngchal amanih, sabengtung amanih, berâm amanih a hringa a kuta hmu a ni chun, a lêthni peiin thung a tih.

⁵“Mîn lo amanih, grêp huon infâktirin, annawleh, a ran chu insuoin mi dang loah intlattir sienla; a lo laia a ṭha tak le, a grêp huon laia a ṭha takin thung a tih.

⁶“Mei a suok a, ṭhûl a kâng mat pei a, bu hlum amanih, buvui ngîr lai amanih, lo amanih a kâng hmang chun, mei insuotu chun a thung ngei ding a nih.

⁷“Mîn a vênghai kuomah tangka amanih, bûrlebêl kawl dinga a pêk a, chu mipa ina inthawka inrûk a ni a, ân rutu chu man a ni chun, a lêt hniin a thung ngei ding a nih.

⁸Inru chu man a ni naw chun, a in neitu chun a vênghai thuomhnaw chunga chun kutkem a lo hmang le hmang naw fie dingin Pathien[26] kuomah a hung ding a nih.

⁹Thil inhmang thubuoi tinah, bâwngchal khawm, sabengtung khawm, berâm khawm, silfên khawm, thil inhmang ieng ienga khawm, mi pakhatin, ‘Hi hi a nih,’ a ti phawt chun, a khingtuokhai ve ve chu Pathien hmaah hung an ta, Pathienin ân thiemnaw chun a vêngpa kuoma chun a lêt hniin thung a tih.

¹⁰“Miin a vênghai kuomah sabengtung amanih, bâwngchal amanih, berâm amanih ran hrim hrim enkawl dingin sie sienla, lo thiin amanih, suknatin amanih, khal hmangin lo umin, mi tukhawmin hmu naw hai sien,

¹¹a vênghai thuomhnawhai chungah kutkem a hmang le hmang naw, LALPA hmaa inkhâmna chu an inkârah um ve vêng a ta, chu chu a ran neitu khawm chun pawm a ta; a thung ṭûl naw nih.

¹²Nisienlakhawm, amaa inthawka inrûk hmang a ni chun, a ran neitu chu a thung ding a nih.

¹³Ramsa ikeinâwi vawng amanih a lo ni chun, hrietfiena dingin hung lâng a ta, keinâwia um ta hnung chu thung ta naw nih.

¹⁴“Mîn a vênghai ran iengkhawm haw sienla, lo thi amanih, inhliem lo ni sienla, a neitu ṭhanglo a ni chun, a thung ngei ding a nih.

¹⁵A neitu a ṭhang ruok chun, thung chuong naw ni a; man neia haw a ni chun haw a ni dân dân chun fêng a tih.

¹⁶“Mîn nunghâk inthieng huol la ni lo, thlemin lo zâlpui sienla, a man pêng a ta, a nei ngei ding a nih.

¹⁷“A pa chun ama chu a pêk nuom dêr naw chun, nunghâk man ang hu tangka a pêk tho ding a nih.

¹⁸“Dawithiemnu chu a hring i phal ding a ni nawh.

¹⁹“Tukhawm ran rîm taphawt chu sukhlum a ni ngei ding a nih.

²⁰“LALPA ti chau lo pathien dang hrim hrim kuoma inthâwi chu sukbohmang dêr nîng a tih.

²¹Mikhuol chu indiknawtakin i thaw ding a ni naw a, i suknawmna ding khawm a ni nawh; nang khawm Aiguptaah mikhuol i ni ta kha.

²²Hmeithai amanih, fahra chu i sukrimsi ding a ni nawh.

²³Ieng kawnga khawm i sukrimsi a, kei an mi hung ko phawt chun, an mi kona lo hre ngei ngei ka ta;

²⁴ka lunginsenna chu hung lum a ta, kâwlhnâmin that ka ti che a; i nuhmei chu hmeithai nîng a ta; i nauhai chu fahra nîng an tih.

²⁵“I kuoma ka mihai pasie tukhawm kuomah tangka în pûktir chun, a chunga chun lei inbattirtu ang i ni ding a ni naw a; ama chunga chun a pung i hnawt kher ding a ni nawh.[27]

²⁶“I vênghai silfên tiemkama i lâk chun nisa tlâk hmain i pêk nâwk ngei ding a nih;

²⁷chu chu a puonsil neisun a ni a, a taksa inkhumna dinga a puon chu a nih; khâwlai am zâl tâng a ta? Chun, kei a mi hung ko pha lo hrieng ka tih, mi lunginsiettheitak ka ni si a.

²⁸“Pathien i hrilsiet ding a ni naw a, i mihai rorêltu khawm chu ṭawngsie în phur ding a ni bawk nawh.[28]

²⁹“I sinthaw ra po poa dâwnmihai le fâkmihaia ra hmasa tak[29] chu în hlân inhnu ding a ni nawh. I naupasalhaia naulutîr chu i mi pêk ding a nih.

³⁰Chuong ang bawk chun i bâwngchalhai, i berâmhai i thaw ding a nih; ni sari chu a pui leh um an ta, ni riet ni chun ka kuomah i pêk ding a nih.

³¹“Ka kuoma chun mi inthieng nîng in ta, chuongchun, ramsahai fâk hnung sa hrim hrim chu fa naw ti niu a, uihai kuomah pe lem in tih.