Read Hmar FESUOKNA 23 Bible Online

FESUOKNA 23 - Hmar bible

FESUOKNA 23

¹“Thuthang indiknaw chu hril dar naw la, hrietpuitu felnaw ni dingin mi rilo inthlawppui naw rawh.

²Thil suol thaw dingin mipui chu i zui ding a ni naw a; indikna keikâwi dinga mi tamna tieng tienga ṭhangin thubuoiah hrietpuitu i ni ding a ni bawk nawh;

³mi pasie khawm chu a thubuoiah i ditsak bîk ding a ni nawh.

⁴“I hmêlma bâwngchal amanih, sabengtung fe hmang ding în tuokpui chun, ama kuomah i hung ṭhuoi kîr ngei ding a nih.

⁵Nangma theidatu che khawm ni sien, a sabengtung chu a phurrikin a delde lai i hmu chun, mâksan el lovin insuo dingin i ṭhangpui ngei ding a nih.

⁶“I mi, rethei tak takhai thubuoi chu, indiknaw takin i rêlpêk ding a ni nawh.

⁷Hêkna indik nawa inthawk chu insiekieng dai la, pawitâwklo le mi fel chu that naw rawh, a thiemnaw chu thiem kân changtir âwm si naw a.

⁸Chun, thamna i lâk ding a ni nawh, thamna chun hmutheina neihai khawm an mit a sukdel a, mi fel thuhai khawm a keikâwi hlak si a.

⁹Hnam dang chu i nêksâwr ding a ni nawh; nangni khawm Aigupta ramah hnam dang in ni kha hrein, hnam dang lungril chu in hriet si a.

¹⁰“Kum ruk sûng chu i ramah chi tûng i ta, chu sûng chun a rahai chu la khâwm i tih;

¹¹kum sarinaa ruok chun inchâwltirin inumtir ṭawk ṭawk i tih, i mi pasiehaiin an fâk theina dingin le, an mâksanhai chu ramsahaiin an fâk theina dingin. Chuong ang bawkin, i grêp huonhai le i oliv huonhai chu thâwng i tih.

¹²Ni ruk sûng chu i sin thâwng i ta, ni sari ni ruok chun i bâwngchal le i sabengtung khawm chu an sâwldam theina ding le, i ina pieng i siehlawnu naupa le hnam dang mi khawm chu an insukhar theina dingin i châwl ding a nih.

¹³I kuoma ka hril ta po po hi pawisa la, pathien danghai hming hrim chu lam naw la, i baua inthawkin hriet khawm ni bawk naw raw se.

¹⁴“Kum khat sûngin ka kuomah ruoiṭhena ṭum thum i nei ding a nih.

¹⁵Chawl ṭhanglo bei ruoi i nei ding a na, ni sari sûng chawl ṭhanglo bei fâng i ta, thu ka pêk ang chea, Abib thlaa hun ka ruotpêk che huna khan (chu thla chun Aiguptaa inthawkin i hung suok a ni si a) chun, tukhawm ka hmaah kut ruokin an hung inlang ding an nawh.

¹⁶Loa i chîng i sininrimna ra hmasahai sîk hunah Busîk ruoi le, kum tâwpah loa inthawka i sinthaw rahai po po i lâk khâwm vawng pha Pâwltlâk ruoi i nei bawk ding a nih.

¹⁷Kum khatah ṭum thum pasal po po LALPA Pathien hmaah an hung inlang ding a nih.

¹⁸“Ka inthâwina thisen chu chawl ṭhang leh în hlân ding a ni naw a; ka ruoiṭhena sathâu chu zânkhawvâr, zîngkâr chenin a um zing ding a ni bawk nawh.

¹⁹I hnuoi ra hmasatak laia a ṭha tak chu LALPA i Pathien ina chun i hung lâk ding a nih. Kêlte chu a pui nênetuiin i suong ding a ni nawh.

²⁰“Ngai ta, i lampuia enkawl ding che le, hmun ka buotsaia chun ṭhuoi ding chein i hmaah vântirko ka tir a nih.

²¹Ama chu pawisa unla, a râwl chu ngai unla, suklungsen naw ro; ka hming chu amaa chun a um a, in bawsietnahai chu a ngaidam naw ding cheu a ni si a.

²²Nisienlakhawm, ama râwl chu i ngai tak tak a, ka hril po po hi i thaw chun, i hmêlmahai ta dingin hmêlma nîng ka ta, i khingpuihai ta dingin an khingpui nîng ka tih.

²³Ka vântirko chu i hmaah fêng a ta, Amor mihai, Hit mihai, Periz mihai, Kanaan mihai, Hiv mihai le Jebus mihai rama chun ṭhuoi lût a ti che; chun, anni chu sukbohmang ka tih.

²⁴An pathienhai kuoma chun i kûn ding a ni naw a, an rawng khawm i bâwl ding a ni naw a, an sin i thaw ding a ni bawk nawh; anni chu peithla letdêr i ta, an milimhai chu suknâwi vawng i tih.

²⁵LALPA i Pathien rawng chu bâwl i ta, i tui le beia khawm mal sâwmpêk ka ti che; chun, nangmaa inthawkin natnahai chu la hmang bawk ka tih.

²⁶“I ram sûngah ching le mâni nau ṭhe tukhawm um naw ni hai a, i dam sûng nihai chu sukkim ka tih.

²⁷Ka ṭitumna chu i hmaah tir ka ta, mi an kuoma i hungna dinghai chu sukbohmang ka ta, i hmêlmahai chu hnung innghat ding chein siem ka tih.

²⁸I hmaah khuoi tûrnei tir ka ta, chuongchun, Hiv mihai, Kanaan mihai, Hit mihai chu i hmaa inthawkin hnawt suok an tih.

²⁹I hmaa inthawkin kum khat sûngin hnawt suok vawng naw ning, chuong naw chun ram chu râusan nîng a ta, ram sahai i chungah hung ṭuong rawi an tih.

³⁰I hung pung a, ram chu i hluo thei zet hmakhat chu anni chu tlawmte têin i hmaa inthawkin hnawt suok hret hret ka tih.

³¹Tuipui Sena inthawka Philistin tuipui chen le, thlalêra inthawka Euphrates vadung chenin i ramri chu khang ka ta; a ram hluotuhai chu i kutah ka pêk ding che a ni si a; chun, nangin i hmaa inthawkin hnawt suok i tih.

³²“An pathienhai leh amanih, anni leh amani khawm thuthlung hrim i siem ding a ni nawh.

³³I ram sûngah an um ding a ni naw a, chuong naw chun ka chungah insuksuoltir rawi an ti che; an pathienhai rawng i bâwl chun, i ta dingin châng a ni ngei ngei ding a ni si a, tiin” a ta..