Read Hmar FESUOKNA 26 Bible Online

FESUOKNA 26 - Hmar bible

FESUOKNA 26

¹“Chu nawa khawm biekbûk chu puonzâr sâwm, puonzai inhmi kawp, sahmul dumpâwl le a êm le a seninlârin, kutthiemtaka siem cherubhai lim leh i siem ding a nih.

²Puonzâr tin seitieng chu tawng sawmhni pariet, puonzâr tin lientieng chu tawng li nîng a tih; puonzâr po po chu intie seng an ni ding a nih.

³Puonzâr panga chu ṭhui zawm vawng ding a na, a dang panga khawm chu ṭhui zawm vawng ding a nih.

⁴Puonzâr pakhat a thuo laia kâwlhnung tak tlânga chun valbahai dumpâwlin siem i ta, chuong ang bawkin a zawm hninaa puonzâr puo tak tlânga chun siem bawk i tih.

⁵Puonzâr pakhata chun valba sâwmnga siem i ta, chun, a zawm hninaa puonzâr tlânga chun valba sâwmnga bawk siem i tih; valbahai chu an inzawm seng ding a nih.

⁶Rângkachakin puonchepna sâwmnga siem i ta, puonchepnahai chun puonzârhai chu chepdêng i ta; biekbûk chu pakhat hung nîng a tih.

⁷Biekbûk chunga inkhumna dingin kêl hmul puonzârhai siem i ta, puonzâr chu sâwm le pakhat siem i tih.

⁸Puonzâr tin seitieng chu tawng sâwmthum, puonzâr tin lientieng chu tawng li nîng a tih: puonzârhai sawm le pakhat chu intie seng an ni ding a nih.

⁹Puonzâr pangahai chu anni le anni ṭhui zawm i ta, puonzâr parukhai chu anni le anni ṭhui zawm bawk i ta, puon in tuoltienga chun puonzâr parukna chu thlep i tih.

¹⁰A thuo hmasaa puonzâr kâwlhnung tak tlânga chun valba sâwmnga siem i ta, chun, a thuo hninaa puonzâr kâwlhnung tak tlânga chun valba sâwmnga bawk siem i tih.

¹¹“Chun, dârsenin puonchepna sâwmnga siem i ta, puonchepnahai chu valbahai sûnga chun thun i ta, puonzârhai chu pakhat an ni theina dingin chelmat a tih.

¹²Puon in puonzârhaia chung inkhum tâwk bâk, puonzâr chenve la chuong kaithla chu biekbûk châwrtieng chun inzar a tih.

¹³Sîr khingah tawng khat, sîr dangah tawng khat bawk puon in inkhumna puonzârhai lienziea la chuong chu, biekbûk hitieng sîr le sawtieng sîr zuk inkhum dingin inzar ve vêng a tih.

¹⁴Chun, chu bûk chung inkhumna ding chun berâmchal vun suksenhai siem i ta, chu chunga chun a chung inkhumna seal vunhai siem bawk i tih.

¹⁵“Chun, biekbûk bang chu shittim thingphêk intungin siem i tih.

¹⁶Thingphêk seizie chu tawng sâwm nîng a ta, thingphêk tin lientieng chu tawng khat le a chenve nîng a tih.

¹⁷Thingphêk tina chun a rek pahni, a dang le sukzawmna ding um seng a ta, biekbûk thingphêkhai po po chu chuong ang seng chun i siem ding a nih.

¹⁸Chun, biekbûk ding thingphêkhai chu simsawngah thingphêk sâwmhni siem i tih.

¹⁹Thingphêk sâwmhni hnuoia chun tangkaraw kerkuokhai sâwmli siem i ta, thingphêk pakhat hnuoia a rêkhai pahni inṭhutna dingin kerkuok pahni, thingphêk dang hnuoia a rek pahnia dingin kerkuok pahni bawk siem i tih.

²⁰“Chun, biekbûk sîr khingtieng, hmartieng panga chun thingphêk sawmhni,

²¹le tangkaraw kerkuok sâwmli, thingphêk pakhat hnuoiah kerkuok pahni, thingphêk dang hnuoiah kerkuok pahni pei bawk siem i tih.

²²Biekbûk chawrtieng pang, thlangtieng panga chun thingphêk paruk siem i tih.

²³A chawrtieng panga biekbûk kihaia dingin thingphêk pahni bawk siem i tih.

²⁴A hnuoitieng chun suktuok nîng an ta, chuong ang bawk chun a chungtieng khawm a sîpa chun kuol pakhata chelkhâwm nîng an tih; a kiha thingphêkhai pahni chu chuong anga chu siem ding a nih.

²⁵Chun, thingphêk pariet le tangkaraw kerkuok, kerkuok sâwm le paruk, thingphêk pakhat hnuoiah kerkuok pahni, thingphêk dang hnuoiah kerkuok pahni pei ning a tih.

²⁶Chun, shittim thing bangruhai siem i tih: biekbûk sîr khat tienga thingphêkhaia dingin panga,

²⁷biekbûk sîr khingtienga thingphêkhaia dingin panga; chun biekbûk hnungtienga thlangtieng panga thingphêkhaia dingin panga bawk.

²⁸A bangru lailung thingphêkhai a lai taka mi chu a tâwpa inthawka a tâwp khingtieng chena rawl thleng zar a ni ding a nih.

²⁹Chun, thingphêkhai chu rângkachakin inluon khum i ta, bangruhai thunna ding chun rângkachak kuolhai siem bawk i tih; chun, bangruhai khawm chu rângkachakin inluon khum i tih.

³⁰Chun, biekbûk chu tlânga a riruong inhmutir i ni ang dan peiin în ngîr ding a nih.

³¹“Chun puonzâr sahmul dumpâwl, a êm le seninlâr le patzai inhmi kawpin siem i ta, cherubhai lim kutthiemtaka siem haia cheia siem ding a nih:

³²chun rângkachaka inluon khum, tangkaraw kerkuokhaia inṭhut, shittim ban palia rângkachak kuoikimhaia chun i khai ding a nih.

³³Puonzâr chu puonchepnahaiin khai i ta, puonzâr sûngtienga chun Thuthlung bâwm chu hung lâng i ta, chuongchun, puonzâr chun Hmun Inthieng le Hmun Inthiengtak chu ṭhepêk a ti che.

³⁴Hmun Inthieng taka chun Zângaina ṭhungpha chu Thuthlung bâwm chunga chun sieng i tih.

³⁵Puonzâr puoa chun dawkân chu sieng i ta, khâwnvar siena chu dawkân zâwn Biekbûk simtieng pangah; chun, dawkân chu hmartieng pangah i sie ding a nih.

³⁶Puon in kawtkhâr ding chun puonzâr, puonzai inhmi kawp le sahmul dumpâwl, a êm le seninlâr, puon ṭhuimawi thiemtaka ṭhui chu i siem ding a nih.

³⁷Puonzâr khaina ding chun shittim ban panga siem la, rângkachakin inluonkhum rawh; an kuoikimhai chu rângkachak a ni ding a na, dârsen kerkuok panga i sutpêk bawk ding a nih.