Read Hmar FESUOKNA 27 Bible Online

FESUOKNA 27 - Hmar bible

FESUOKNA 27

¹“Shittim thing maichâm tawng ngaa sei, tawng ngaa lien i siem ding a na, chu maichâm chu kil li nei, tawng thuma insâng a ni ding a nih.

²A kil pali chunga chun kihai siem i ta, chu kihai chu ama le chun zawm khat an ni ding a nih; dârsenin inluon khum bawk i tih.

³A vut dawna dingin bêlhai siem i ta, meikhelnahai, châwtawlhai, thîrkuoihai le vutluohai siem i ta; a hmangruohai po po chu dârsena siem a ni ding a nih.

⁴Chu ding chun dârsena inphan thuk siem bawk i ta; chun, a lên kil palia chun dârsen kuol pali siem i tih.

⁵A lên chu maichâm chenve zu tlung dingin maichâm rei hnuoi zar zarah sieng i tih.

⁶Maichâm zâwnna ding chun zâwnfunghai shittim thingin siem i ta, dârsen inluon khum i tih.

⁷Zâwnfunghai chu dârsen kuolhai sûnga chun rawl ding a nih, hang zâwn zâwngin zâwnfunghai chu maichâm sîr hnia chun um an tih.

⁸Thingphêkhaiin maichâm chu a kawrawngin i siem ding a nih, tlânga inhmutir i ni ang tak khan siem a ni ding a nih.

⁹“Biekbûk tuolzâwl chu i siem ding a na; a simtieng pang tuolzâwla dinga puonzârhai chu puonzai inhmi kawp, sîr khata dinga tawng za khat a ni ding a nih.

¹⁰A ban chu sâwmhni le a kerkuok sâwmhni dârsena siem nîng a ta, ban kuoikimhai le a tuommawinahai chu tangkaruo a ni ding a nih.

¹¹Chuong ang bawk chun hmartieng pang tluonsuok chun puonzârhai tawng za khat le ban sâwmhni, kerkuok sâwmhni dârsena siem um an ta; ban kuoikimhai le tuommawinahai chu tangkaruo a ni ding a nih.

¹²Thlangtieng pangah a tuolzâwl tluonsuokin puonzârhai tawng sâwmnga, ban sâwm le kerkuok sâwm bawk leh um a tih.

¹³Saktieng pangah tuoltieng tuolzâwl lienzie chu tawng sâwmnga nîng a tih.

¹⁴Kawt sîr khata puonzârhai chu tawng sâwm le panga nîng a ta, ban pathum le a kerkuok pathum leh.

¹⁵Chun, a sîr khingtienga ding chun puonzârhai chu tawng sâwmpanga nîng a ta, a banhai pathum le a kerkuokhai pathum leh.

¹⁶A tuolzâwl kawta ding chun puonzâr tawng sâwmhni, sahmul dumpâwl le a êm le seninlâr le patzai inhmi kawpa siem ṭhuimawi thiemtaka ṭhui a ni ding a nih, a ban pali le a kerkuok pali leh.

¹⁷A tuolzâwl sîr vêl po poa a banhai po po chu tangkaruoin tuommawi ding a na, a kuoikimhai tangkaruo, a kerkuokhai dârsen an ni ding a nih.

¹⁸A tuolzâwl huol sûng chu a dungtieng tawng za khat, a khangtieng tawng sâwmnga, ân sângtieng tawng nga, a puonzai inhmi kawp inkhai tawng nga le an kerkuokhai chu dârsen an ni ding a nih.

¹⁹Chutaka Biekbûk rawngbâwlna po poa hmangruohai po po le a kilnahai po po le a tuolzâwl inhuonnaa a kilna po po chu dârsen vawng a ni ding a nih.

²⁰“Chun, khâwnvar chu a chawk zingna dingin, meivar dingin oliv hriek sâwr inthieng i kuoma hung la dingin Israel mihai chu thu pêng i tih.

²¹Intuokna puon in Thuthlung bâwm hmaa puonzâr puoa chun Aron le a naupasalhaiin LALPA hmaa chun zântienga inthawka zîngkâr chenin enkawl an ta; Israel mihai aiin an thlahai chenin kumkhuoin an bata ngai nîng a tih.