Read Hmar FESUOKNA 28 Bible Online

FESUOKNA 28 - Hmar bible

FESUOKNA 28

¹“I unaupa Aron hi Israel mihai laia inthawkin ama le a naupasalhai hi, thiempu sina ka hmaa rawng an bâwl theina dingin Aron le Aron naupasalhai, Nadab le Abihu, Eleazar le Ithamar hi i kuomah hung ṭhuoi rawh.

²I unaupa Aron ta dingin mawina ding le ropuina dingin silfên inthieng i siempêk ding a nih.

³Mi, lungrila varna nei, varna thlaraua ka suksiphai po chu, Aron silfênhai siem dingin hril rawh, ama chu thiempu sina ka kuoma rawng a bâwl theina dinga inhlânthieng a ni theina dingin.

⁴“Hieng hi silfên an siem dinghai chu a nih: âwmbel, zakawsîng, zakawfuol le zakawchung ṭhuimawi, lukâwm le kâwngkhi hi; chun, i unaupa Aron le a naupasalhai chu thiempu sina ka kuoma rawng an bâwl theina dingin silfên inthienghai siempêk an tih.

⁵Chun, rângkachak zai le sahmul dumpâwl, a êm le seninlâr le patzai inhmi kawp hmang an tih.

⁶“Chun, rângkachak zai le sahmul dumpâwl le, a êm le seninlârin kutthiemtakin zakawsîng chu siem an tih.

⁷An khai detna dingin a dârbel pahni, a hmawr hnia ṭhui mat a ni ding a nih.

⁸Chun, zakawsîng chunga a khitna ṭhuimawi chu siem dân thuhmun bawka siem, zawm khat a ni ding a na; rângkachak le sahmul dumpâwl, a êm le seninlâr le patzai inhmi kawp ṭhataka siem a ni ding a nih.

⁹Chun, onik lung pahni lâng i ta, chuhaia chun Israel naupasalhai hming chu ker i tih;

¹⁰an piengzie indawt ang peiin hming paruk chu lung pakhatah, hming paruk dang chu lung danga chun ker i tih.

¹¹Lungkertuin hming namna a ker angin, lung pahnia chun Israel naupasalhai hming indawt ang peiin ker i ta, rângkachak kerkuokhaia thun dingin siem i tih.

¹²Israel naupasalhai ta dinga hrietzingna lunghai dingin, chu lung pahni chu thiempu zakawsîng dâr belhaia chun sieng i ta; chuongchun, Aron chun hrietzingna dingin a liengko pahni chunga chun an hminghai chu LALPA hmaa chun put zing a tih.

¹³“Rângkachak kerkuokhai siem i ta, rângkachak inthieng khaidiet pahni hruol anga inherthlawp leh;

¹⁴chun, khaidiet herthlawphai chu kerkuokhaia chun thun i tih.

¹⁵“Kutthiem takin rorêlna âwmbel siem i ta, zakawsîng siem dân ang bawk khan siem i tih: rângkachak zai, sahmul dumpâwl, a êm, seninlâr le patzai inhmi-kawpin siem i tih.

¹⁶Kil li nei a thuo a ni ding a na, a sei tieng khâp khat, a lien tieng khâp khat bawk a ni ding a nih.

¹⁷A sûnga chun lung phûm chihai tlar liin phûm i ta, a tlar hmasatak chu sardion, topaz le karbankle lung,

¹⁸a tlar hnina chu emeral, sapphir le endonuk (lunghlu),

¹⁹a tlar thumna chu jasinth, agate le amethust,

²⁰a palina chu birul, onik le jasper lung nîng a ta, a phûmna chu rângkachaka tuom khum seng ni bawk an tih.

²¹Lunghai chu sawmpahni, Israel naupasalhai hming indawt ang peiin nîng an ta, hmingnamna kerhai angin Israel hnam sâwmpahni hming chu ker ning a tih.

²²Âwmbel chunga chun rângkachak inthieng khaidiet, hruol anga inherthlawp siem i tih;

²³chun, âwmbel chunga chun rângkachak kuol pahni siem i ta; chu kuolhai pahni chu âwmbel hmawr pahnia chun inbûk i tih.

²⁴Rângkachak khaidiet pahni chu âwmbel hmawra kuol pahnia chun inbûk i tih.

²⁵Khaidiet pahni hmawrhai chu kerkuok pahnia chun thun i ta, zakawsîng dârbelhai hmatieng panga chun khai i tih.

²⁶Rângkachak kuol pahni siem i ta, zakawsîng deptieng pang sûng, a tlâng sîr chunga âwmbel pahni hmawrhaia chun inbûk i tih.

²⁷Rângkachak kuol pahni bawk siem i ta, zakawsîng hmatieng panga dârbel pahni hnuoitieng pang, a thuo sûnghnung lem hnuoitienga ân tuokna, zakawsîng hrui thiemtaka khâwng inbûkna chung taka khan inbûk i tih.

²⁸Chun, âwmbel chu zakawsînga kawp thlapna dingin le, zakawsîng hrui thiemtaka khâwng chunga chun a um theina dingin âwmbela a kuolhai le zakawsînga a kuolhaia chun hrui dumpâwlin khit mat an tih.

²⁹Chun, Aron chun LALPA hmaa hrietzingna dingin Hmun Inthienga a fe po leh, a lungkhur chunga rorêlna âwmbela chun Israel mihai hming chu phur zing a tih.

³⁰Rorêlna âwmbela chun Urim le Thummim inbûk i ta, LALPA hmaha a fe laiin Aron lung chung taka chun an um ding a nih; chuongchun, Aron chun Israel thlahai rorêlpêkna chu LALPA hmaah a lung chunga chun a phur zing zing ding a nih.

³¹“Chu zakawfuol chu a dumpâwl vawngin i siem ding a nih.

³²A hmawr a lai zâwnah a lu âwng a um ding a na, a lu âwng chu a vêl tuok chun ân ek nawna dingin, indona phâw zakuo angin puon a khâwnga khâwnga tuom ding a nih.

³³A hmawr tlânghaia chun theibufai dumpâwl, a êm le seninlârin, a hmawr tlâng vêl po poa chun i siem ding a nih; an inkârah rângkachak telnênghai leh,

³⁴zakawfuol hmawr tlâng vêl tuoka chun rângkachak telnêng, theibufai, rângkachak telnêng le theibufai ti anga inkârthlâkin a um ding a nih.

³⁵Aronin rawng a bâwl pha chun chuong ang chun inthuom a ta, a ri chu LALPA hmaa Hmun Inthienga a fe lai le a hung suok lai chun hriet a ni ding a nih, a thi nawna dingin.

³⁶“Chun, rângkachak inthieng phêk siem i ta, a chunga chun hmingnamna kerhai angin, ‘LALPA TA DINGA INTHIENG,’ ti ker i tih.

³⁷Chu chu hrui dumpâwlin lukâwm chungtienga chun khitdêng i ta, lukâwm hmatieng panga chun a um ding a nih.

³⁸Aron bâwk chunga chun a um ding a na. Aron chun Israel mihaiin thilpêk inthienga an pêk thil inthienghaia suolna um phawt chu phur a tih: LALPA hmaa pawm a ni theina dingin a bâwka chun a um zing ding a nih.

³⁹“Chun, zakawchung puonzai inhmi kil li neia ṭiel khâwng i ta, puonzai inhmi bawk lukâwmin siem i ta; chun, kâwngkhi puon ṭhui mawitakin siem bawk i tih.

⁴⁰“Aron naupasalhai ta dinga mawina le ropuina dingin zakawchunghai, kâwngkhihai le lukâwmhai siempêk i tih.

⁴¹I unaupa Aron le a naupasalhai chu inhâktir i ta, anni chu ka hmaa thiempu sina rawng an bâwl theina dingin hriek nâl i ta, namdet i ta, inhlân thieng i tih.

⁴²Chun, an taksa saruokna inkhum dingin kekawrhnuohai siempêk i ta, kâwnga inthawka êlpui chen tlung an tih;

⁴³chuong chu Aron le a naupasalhai chun an bun ding a nih, intuokna puon ina an hung lût phain amanih, Hmun Inthienga rawng bâwl dinga maichâm an hung hnai phain amanih, suolna phura an thi nawna dingin. Ama le ama hnunga a thlahai chena khawm hi hi dân nîng a tih.