Read Hmar FESUOKNA 29 Bible Online

FESUOKNA 29 - Hmar bible

FESUOKNA 29

¹“Tuhin Thiempu sina ka rawng bâwl dinga anni inhlân thieng dinga an chunga i thaw ding chu hi hi a nih: bâwngchal tuoi pakhat le berâmchal pahni demkailo le,

²bei, chawl ṭhanglo le beiphêk chawl ṭhanglo hriek pawl le, beiinphân chawl ṭhanglo hriek nâl leh, chuongchu bupui beiphit inditakin i siem ding a nih.

³Chun, leikhâwr pakhatah sieng i ta, leikhâwr chu bâwngchal le berâmchal pahni le chun hung la lût i tih.

⁴Aron le a naupasalhai chu intuokna puon in kawtkhâra chun hung ṭhuoi i ta, tuiin însiltir i tih.

⁵Chun, silfênhai chu lâng i ta, Aron chu zakawchung, zakawfuol, zakawsîng le âwmbel chu inhâktir i ta;

⁶zakawsîng hrui thiemtaka khâwng chun khit i ta, a lu chunga chun lukâwm sieng i ta, lukâwm chunga chun lukhum inthieng chu sieng i tih.

⁷Chun, innâlna hriek lâng i ta, a lu chungah buok i ta, ama chu nâl i tih.

⁸A naupasalhai chu hung ṭhuoi i ta, zakawchunghai inhâktir i ta,

⁹an kâwng chu kâwngkhiin hrên i ta, lukhim inkhimtir i ta, thiempu nina chu kumkhaw dânah nei an tih: chun, Aron le a naupasalhai chu în hlânthieng ding a nih.

¹⁰Intuokna puon in tuola chun bâwngchal ṭhuoi i ta, Aron le a naupasalhai chun bâwngchal lu chunga chun an kut innghat an tih.

¹¹Intuokna puon in kawtkhâra chun LALPA hmaah bâwngchal chu that i tih.

¹²Bâwngchal thisen chu lâng i ta, i kutpârin maichâm kîhaia chun nâl i ta; chun, a thisen dang po chu maichâm bula chun bur i tih.

¹³Chun, a sûng thâu po chu lâng i ta, a thin chunga duorda le, a kalhai pahni le anni tuomtu thâu leh maichâm chunga chun rawng i tih.

¹⁴Bâwngchal sa le, a vun le, a êk ruok chu bûk puoa chun meiin rawng i tih; suol ta dinga thil inhlân a nih.

¹⁵Berâmchal pakhat chu la bawk i ta, Aron le a naupasalhai chun berâmchal lu chunga chun an kuthai innghat an tih.

¹⁶Berâmchal chu that i ta, a thisen chu lâng i ta, maichâm chu a vêlin thêng i tih.

¹⁷Berâmchal chu ât nawi i ta, a sûnghai le a kehai chu sâwp i ta, a sa âtsa le, a lu leh chun sieng i ta;

¹⁸berâmchal chu a pumin maichâm chunga chun rawng i tih: LALPA kuoma pumrawhmang thilinhlân a na, LALPA kuoma meia thil inhlân riminhnik a nih.

¹⁹“Chun, berâm chal dang pakhat chu lâng i ta, Aron le a naupasalhai chun berâmchal lu chunga chun an kuthai innghat an tih.

²⁰Chun, berâmchal chu that i ta, a thisen chu lâng i ta, Aron nakâwr changtieng hmawra le a naupasalhai nakâwr changtieng hmawra le, an changtieng kutpui chunga le, an changtieng kepuihaiah nâl i ta; chun, thisen la um po chun maichâm chu a vêl chun thêng i tih.

²¹Maichâm chunga thisen chu innâlna hriek leh lâng i ta, Aron le a silfênhai le, a naupasalhai le an silfênhai chunga chun thêng i ta, ama chu inhlânthieng nîng a tih; a silfênhai le a naupasalhai le a naupasalhai silfênhai leh.

²²Berâmchal thâu khawm chu a ngûm le a sûngbawtu thâuhai leh, a thin chunga a duorda leh, a kal pahni le a tuomtu thâuhai leh, a dâr changtieng leh la bawk i tih (inhlânna berâmchal a ni leiin).

²³Chun, bei tliem khat, beiphêk hriek pawl tlang khat le, bei inphân pakhat leh; LALPA hmaa chawl ṭhanglo bei leikhâwra chu lâng i ta;

²⁴Aron le a naupasalhai kuthaia chun a rêng chun sie vawng i ta, LALPA hmaha thên thilinhlân dingin thên an tih.

²⁵Chun, chuong chu an kuthaia inthawkin lâng i ta, LALPA hmaa riminhnik dingin, maichâm chunga chun pumrawhmang thilinhlânin raw hmang i tih: LALPA kuoma meia thilinhlân a nih.

²⁶Aron inhlânna berâmchal ir chu lâng i ta, LALPA hmaa thên thilinhlân dingin thên i tih; chu chu nanga chan nîng a tih.

²⁷Thên thilinhlân ir le dawmkâng thilinhlân dâr, inhlânna berâmchal ir le dâr dawmkânga thên tah, thiempu chan khawm chu inhlân i tih, Aron le a naupasalhai chan a ni leiin.

²⁸Aron le a naupasalhai chan dinga Israel thilinhlân an pêk zing ding an bat nîng a tih; chu chu an inremna thilinhlânhaia inthawka thiempu chan dinga Israel mihai inhlân ding chu nîng a tih; LALPA kuoma an dawmkâng thil inhlân chu a nih.

²⁹“Aron silfên inthienghai chu ama hnunga a naupasalhai ta dingin nîng a tih, anniah inhlânthieng le hrieknâl an nina dingin.

³⁰Hmun Inthienga rawng bâwl dinga a hung pha, ama aia thiempu sin thawtu a naupa chun silfênhai chu ni sari sûng hâk a tih.

³¹“Inhlânna berâmchal chu lâng i ta, Hmun Inthienga chun a sa chu suong i tih.

³²Aron le a naupasalhai chu berâm sa le leikhâwra bei chu intuokna puon ina kawt bula chun fâng an tih.

³³Chuong thil intlanna siemnahai chu anni inhlânna le hlânthiengna dingin fâng an tih, amiruokchu, thil inthieng an ni leiin mi dang chun a fâk ve ding a ni nawh.

³⁴Inhlânna sa le bei a iengkhawm chu zîngkâr chena a um zing chun, a mahla chu meiin râwng i tih, thil inthieng a ni leiin fâk a ni ding a ni nawh.

³⁵Chuong ang chun Aron le a naupasalhai chungah, thu ka pêk che po po ang tak khan i thaw ding a na; ni sari sûng anni chu i hlânthieng ding a nih,

³⁶ni tinin suol ta dinga thil inhlân bâwngchal chu inhlân i tih. Maichâm ta ding khawm chun suol ta dinga thilinhlân inhlân i ta, chu ta dinga intlanna i siem lai chun, inhlân thiengna dingin, maichâm chu hriek nâl bawk i tih.

³⁷Maichâm ta dingin ni sari sûng chu intlanna siem i ta, chun, inhlân i tih; chun, maichâm chu inthiengtak hung nîng a ta, maichâm tâwk taphawt chu inthieng ni tâng an tih.

³⁸“Hi hi maichâm chunga i thilinhlân ding chu a nih; berâmte pahni kum khat mi ve ve ni tinin în hlân zie ding a nih.

³⁹Berâmte pakhat chu zîngtieng inhlân i ta, berâmte dang chu zântieng inhlân i tih.

⁴⁰Berâmte pakhat le chun beiphit indi epha hmun sâwma ṭhea hmun khat hriek sâwrsa hin hmun lia ṭhea hmun khat chawkpawl, le dâwnmi thilinhlân dingin uoiin hin hmun lia ṭhea hmun khat inhlân i tih.

⁴¹Berâmte pakhat chu zântieng inhlân i ta, LALPA kuoma meia thilinhlâna riminhnik dingin, zîngkâra dâwnmi thilinhlân ṭhanga fâkmi thilinhlân dân angin thâwng i tih.

⁴²Chu chu i thlahai chena dingin LALPA hmaa intuokna puon in kawtkhâra pumrawhmang thilinhlân chu ni zing a tih; chutaka chun intuokpui ka ti che.

⁴³Chutaka chun Israel mihai chu intuokpui ka ta, intuokna puon in chu ka ropuinain sukthieng nîng a tih.

⁴⁴Intuokna puon in le maichâm chu sukthieng ka ta, Aron le a naupasalhai khawm chu thiempu sina ka rawng bâwl dingin sukthieng ka tih.

⁴⁵Israel mihai lai chun um zing ka ta, an Pathien nîng ka tih.

⁴⁶Chun, anni laia ka um zing theina dinga Aigupta rama inthawka ṭhuoi suoktu LALPA an Pathien ka nih ti hrieng an tih; LALPA an Pathien ka ni si a.