Read Hmar FESUOKNA 30 Bible Online

FESUOKNA 30 - Hmar bible

FESUOKNA 30

¹“Riminhnik rawna dingin maichâm siem i ta, shittim thingin siem i tih.

²A seitieng tawng khat, a lientieng tawng khat, killi nei nîng a tih. Ân sângtieng chu tawng hni nîng a ta, chutaka a kihai chu ama le zawmkhat an ni ding a nih.

³A chung le a sîrhai, a vêlin, a kihai leh rângkachak inluonkhum i ta; chun, a vêlin rângkachak rei siem bawk i tih.

⁴A kalhai pahni chung a rei hnuoia chun rângkachak kuol pahni siem la, a sîr hniah i siem ding a nih: chu chu a zâwnnaa zâwnfunghai rawlna ding nîng a tih.

⁵Shittim thing zâwnfunghai siem i ta, rângkachakin inluonkhum i tih.

⁶Thuthlung bâwm chunga zângaina ṭhungpha kân tuokpuina ding che hma zâwnah, Thuthlung bâwm kâwla puonzâr hmaa chun sieng i tih.

⁷Chun, Aronin chu chunga chun thil riminhnik chu râwng a ta, zîng tinin khâwnvarhai chu a chei pha râw hlak a tih.

⁸Aron chun zântienga khâwnvarhai ân sit pha chun raw bawk a tih; in thlahai chenin LALPA hmaah riminhnik chu râw zing in tih.

⁹Chu chunga chun riminhniklo thil, pumrawhmang thilinhlân khawm, fâkmi thilinhlân khawm în hlân ding a ni naw a, dâwnmi thilinhlân hrim a chunga chun i bur ding a ni bawk nawh.

¹⁰Aron chun a kihai chunga chun kum khata vawi khat intlanna siem a ta; in thlahai chenin intlanna suol ta dinga thilinhlân thisen chun kum khatah vawikhat maichâm ta dinga intlanna siempêk a tih, LALPA kuoma inthiengtak a nih,” tiin.

¹¹ LALPA chun Mosie kuomah a hril a,

¹²“Israel mihai nizât i tiem pha chun, tiem an ninaa an nizât ang peiin, mi tinin ama ta dingin intlanna sum pêk ding a nih, anni i tiem pha anni laia hri a um nawna dingin.

¹³Intiemnaa tiema um taphawt chun pêng a tih: Hmun Inthieng sum dingin shekel chenve (shekel khat chu gerah sâwmhni a nih), LALPA kuoma thilinhlân dingin shekel chenve bawk pêng a tih.

¹⁴Mi tin intiemnaa ṭhang phâk, kum sâwmhnia upa le a chungtienghai chun LALPA thilinhlân a pêk ding a nih.

¹⁵In hringna ta dinga intlanna siem dinga LALPA kuoma thilinhlân in pêk pha chun hausa khawmin shekel chenve nêka tam pe naw ni a, pasie khawma chu nêka tlâwm chu a pêk ding a ni nawh.

¹⁶Israel mihai kuoma inthawkin intlanna sum chu lâng i ta, intuokna puon in rawngbâwlna dingin hmang i tih; in hringna ta dinga intlanna siem dinga LALPA hmaa Israel mihai ta dinga hrietzingna a ni theina dingin,” tiin.

¹⁷LALPA chun Mosie kuoma chun a hril a,

¹⁸“Insâwpna dingin, dâr maihûn, a ṭhut khawm dârin i siem bawk ding a nih. Maichâm le intuokna puon in inkâra chun sieng i ta, a sûnga chun tui sie bawk i tih.

¹⁹Aron le a naupasalhai chun chutaka chun an kuthai an kehai sâwp an tih.

²⁰Intuokna puon ina an lût ding phain amanih, LALPA kuoma meia thil inhlân râw dinga maichâm hnaia rawngbâwl dinga an hung phain, tuia chun an insâwp ding a nih, an thi nawna dingin.

²¹An kuthai, an kehai sâwp an tih; chuongchun, thi naw ni hai; chun, anni ta dingin kumkhuoa dân nîng a tih, ama le a chithla le an thlahai chen khawmin,” tiin.

²²Chu naw khawm chu LALPAIN Mosie kuoma chun a hril a,

²³“Riminhnik pui deu deuhai la la, murra tui inthieng shekel za nga bûk, thingzungthak riminhnik chu zâtve, chu chu shekel za hni sâwmnga, mafu riminhnik shekel za hni sâwmnga,

²⁴thingzungthak chi dang shekel za nga bûk; hieng hi Hmun Inthienga shekel bûk hmang dân ang peiin nîng a ta; chun, oliv hriek hin khat leh;

²⁵hienghai hi chawkpawlin innâlna hriek inthieng, rim inhniktak, riminhnik siemtu siem dân angtakin siem i ta, chu chu innâlna hriek inthieng nîng a tih.

²⁶Chu hriek chun intuokna puon in le Thuthlung bâwm,

²⁷dawkân le a hmangruo po po, khâwnvar siena le a hmangruo dang po po le riminhnik rawna maichâm le,

²⁸pumrawhmang thilinhlânna maichâm le a hmangruo po po le, dâr maihûn le ân ṭhutna le chun nâl i tih.

²⁹Chun, inthiengtak an ni theina dingin inhlân i ta, chu chu tâwk taphawt chu inthieng an tih.

³⁰Chun, Aron le a naupasalhai chu thiempu sina ka hmaa rawng an bâwl theina dingin nâl i ta, inhlân bawk i tih.

³¹Israel mihai kuoma chun hril la, ‘Hi hi in thlahai chenin ka kuoma innâlna hriek inthieng nîng a tih.

³²Mi narân taksa chunga hrim hrim buok a ni ding a ni naw a, hi chawkpawl angtak hin, ama ang hi in siem ding a ni nawh: inthieng a ni a, in ta ding khawmin inthieng a ni ding a nih.

³³Tukhawm ama angtaka lo chawkpawl amanih, mi narân chunga lo nâl amanih, an um chun, ama chu a mihai laia inthawka tuithlâr nîng a tih,’ tiin,” a ta.

³⁴Chun, LALPA chun Mosie kuomah, “Hieng riminhnikhai, stakte le onikha le galbanam la la; hieng riminhnikhai hi rimtui inthieng leh bûk intluk seng an ni ding a nih.

³⁵Riminhnik siemtu siem dân angtakin, riminhnik râwmi, riminhniktakin, chia saw, inthieng le faitakin siem i tih.

³⁶A hlek chite vaw thla hlak i ta, kân tuokpuina ding che intuokna puon ina Thuthlung bâwm hmaa chun sieng i ta, i ta dinga inthiengtak a ni ding a nih.

³⁷Hieng chawkpawl dân anga riminhnik i siem chu nanga ta dingin i siem ding a ni naw a: i ngaia chun LALPA ta dinga inthieng a ni ding a nih.

³⁸Mi tukhawm mâni hmang dinga chuong anga rim nei siemtu chu a mihai laia inthawka tuithlâr nîng a tih,” tiin.