Read Hmar FESUOKNA 31 Bible Online

FESUOKNA 31 - Hmar bible

FESUOKNA 31

¹ LALPA chun Mosie kuomah a hril a,

²“En ta, Juda hnama mi Hur naupa Uri naupasal a hming Bezalel chu ka ko ta a,

³ama chu Pathien Thlarauin ka suksip ta a, varna le hrietthiemna le kutthiem sin tinrêng thawtheina leh,

⁴kutthiem sinhai riruong dingin, rângkachak, tangkaruo le dârsena sinthaw dingin.

⁵Lung inbûk ding ât thiem dingin, thing kermawi thiem ding le kutthiem mak kawng tinrênga sinthaw dingin ka suksip a nih.

⁶Chun, ngai ta, ama inthlawppui dingin Dan hnama mi Ahisamak naupa Oholiab chu ka ruot bawk a; theina nei mihai po kuoma chun themthiemna ka sie ta a, thu ka pêk ta chehai po po kha an siem theina dingin;

⁷intuokna puon in, Thuthlung bâwm le, chu chunga zângaina ṭhungpha le, puon in thuomhnawhai po le,

⁸dâwkân, a hmangruohai leh, sathâukhâwnvâr siena, a hmangruohai le, riminhnik rawna maichâm le,

⁹pumrawhmang thilinhlânna maichâm a hmangruohai po po leh, dâr maihûn le ân ṭhutna leh;

¹⁰silfên ṭhataka siemhai le, thiempu Aron silfên inthienghai le, a naupasalhai silfênhai thiempu sina rawngbâwlnaa an hmanghai le;

¹¹innâlna hriek le, Hmun Inthienga dinga riminhnik râwmihai leh siem dingin. Thu ka pêk che ang taphawt chun thâwng an tih,” tiin.

¹² LALPA chun Mosie kuomah a hril a,

¹³“Israel mihai kuoma chun hril la, ‘Ka châwlnihai chu titakzetin in inser ding a nih: LALPA a sukthiengtu cheu chu ka nih ti in hriet theina dinga in thlahai chena dingin nangni le keia inkâra inchikna chu a ni si a.

¹⁴Châwlni chu in inser ding a nih, in ta dinga inthieng a ni si a; mi tin a bâwsetu taphawt chu sukhlum a ni ngei ding a nih: mi tukhawm chu nia sin iengkhawm thaw taphawt chu, chu mi chu a mihai laia inthawka tuithlâr nîng a tih.

¹⁵Ni ruk sûng chu sin thaw ding a na, ni sari ni ruok chu châwl ṭawk ṭawk ni, LALPA kuoma inthieng, châwlni chu a nih. Tukhawm chu châwlnia sin iengkhawm thaw taphawt chu sukhlum a ni ngei ding a nih.

¹⁶Chuongchun, Israel mihai chun kumkhaw thuthlung dingin châwlni chu inser an tih, an thlahai chenin châwlni chu an inser ding a nih.

¹⁷Kumkhuoin Israel mipuihai le keia inkâra inchikna ni zing a tih: LALPA chun ni ruk sûngin hnuoi le vân a siem a, ni sari ni chun a châwl a, ân suksâwldam ta si a,’ a ti a,” tiin.

¹⁸Chun, Sinai tlâng chunga ama le inbiekna chu a suktâwp chun Thuthlung phêk hni, lung phêk pahni Pathien kut ngeia ziekhai chu Mosie kuomah a pêk ta a.