Read Hmar FESUOKNA 32 Bible Online

FESUOKNA 32 - Hmar bible

FESUOKNA 32

¹Mipui chun Mosie chu tlânga inthawk chun a hung thla intak hle ti an hmu chun anni mipui chu Aron kuomah an hung inkhâwm a, a kuomah, “Tho la, kan hma ṭhuoitu dingin pathienhai mi siempêk rawh: hi Mosie Aigupta rama inthawka mi ṭhuoi suoktu hlak hi ieng am a chang a ni tah kan hriet si naw a,” an ti a.

²Aron chun an kuomah, “Rângkachak kutsebihai in nuhmeihai le in naupasalhai le in naunuhmeihai nakâwra an bêhai chu hlîp thla unla, ka kuomah hung la ro,” a ti a.

³Chun, mipui po po chun an nakâwrhaia rângkachak nabêhai chu an hlîp a, Aron kuoma chun an hung lâk a.

⁴An kuta inthawk chun a lâk a, kerna hriemhrei hmangin a sungna ding a siem a, bâwngte limah a sung ta a. Anni chun, “Aw Israel, hi hi Aigupta rama inthawka hung ṭhuoi suoktu che i pathien chu a ni hi,” an ti a.

⁵Aronin chu chu a hmu chun, bâwngte hmaa chun maichâm a siem a, “Zînga chu LALPA kuoma ruoiṭhena um a tih,” tiin thu a puong ta a.

⁶A zînga chun inhmatakin an tho a, pumrawhmang thilinhlânhai chu an inhlân a, inremna thilinhlânhai chu an hung lâk ta a: chuongchun, mipui chu fa ding le dâwn dingin an ṭhung a, inhnel dingin an tho ta a.

⁷LALPA chun Mosie kuomah a hril a, “Inhmaw la, fe thla rawh, i mihai Aigupta rama i ṭhuoi suokhai khan anni le anni an insuksiet ta si a:

⁸an kuoma thu ka pêka inthawk chun an pêt hmang nghâl el ta a; bâwngte lim sung an insiemfâwm a, an biek a, a kuomah an inthâwi a, ‘Aw Israel, Aigupta rama inthawka ṭhuoi suoktu che i pathien a ni hi,’ an ti a,” tiin.

⁹ LALPA bawk chun Mosie kuomah, “Hi mipui hi ka hmu chieng tah; ngai ta, mipui kawmawtak an nih:

¹⁰chuleiin, tuhin mi mâksan rawh, an chunga ka lunginsenna chu a hung lum a, anni ka sukbohmang theina dingin; nang ruok chu hnam ropuitakah la siem ka ti che,” a ti a.

¹¹Mosie ruok chun LALPA a Pathien chu a ngên a, “LALPA, Aigupta rama inthawka kut thahrât le thilthawtheina nasatak le i hung ṭhuoi suok hieng i mihai chunga hin iengdingin am i lunginsenna chu lum el a ta?

¹²Iengdingin am Aigupta mihai chun, ‘Hnuoi chunga anni sukbohmang vawng ding le tlânghaia chun anni sukhlum dingin thiltum ṭhanawtakin anni a ṭhuoi suok a,’ ti el an ti leh? I lunginsenna ṭiumtaka inthawk chun inher la, i mihai chunga hi thil ṭhanaw hi lakîr rawh.

¹³I siehlawhai Abraham, Isak le Israel kuoma nangma le nangma inkhâma, ‘I thlahai chu vâna arasihai angin sukpung ka ta; hi ram po po ka hril ta hi in thlahai kuomah pêng ka ta, kumkhuoin hluong an tih,’ tia i hril kha hre zing rawh,” a ta.

¹⁴Chun, LALPA chun a mihai chunga thâwng ka tih tia a hril thil ṭha naw chu a lâkkîr ta a.

¹⁵Chun, Mosie chu ân her a, thuthlung lung phêk pahni chu a kuta chawiin, tlânga inthawk chun a fe thla ta a: chu lung phêkhai chu an pang khing hni hnia ziek an nih; a pang khing khat le a pang khingtieng khawm chun ziek ve ve an nih.

¹⁶Chu lungphêkhai chu Pathien sinthaw, le Pathien iziek, lungphêkhai chunga ker an nih.

¹⁷Josua chun mipui khêkri chu a hrietin Mosie kuomah, “Riebûka sawn indona ri a um,” a ti a.

¹⁸Mosie chun, “Hnena khêkri chu a ni naw a, hnea umhai khêkri khawm a ni bawk naw a, hlasak ri a ni lem chu ka hriet chu,” a ti a.

¹⁹Chun, riebûk kâwl a hung tlunga bâwngte lim le lâm chu a hmu phingleh Mosie lunginsenna chu a hung lum a, a kuthaia inthawk lungphêkhai chu a dehâwn a, tlâng bula chun a sukkawi ta a.

²⁰Bâwngte lim an siem chu a lâk a, meiah a raw a, a râwt nâwi a, tuiah a phul a, Israelhai chu ân dâwntir ta a.

²¹Mosie chun Aron kuomah, “Hi mipui hin i kuomah ieng am an thawa hienga an chunga suol nasatak în tlungtir hi?” a ti a.

²²Aron chun, “Ka lalpa lunginsenna chu lum naw raw se: hi mipui hi thil suol âwnsa hrim an nih ti nangin i hriet annâwm.

²³Ka kuomah, ‘Kan hma ṭhuoitu dingin pathienhai mi siempêk rawh, hi Mosie Aigupta rama inthawka mi ṭhuoi suoktu hlak hi ieng am a chang a ni tah kan hriet si naw a,’ an ti a.

²⁴Chun, an kuomah, ‘Tukhawm rângkachak nei chun hlîp raw se,’ ka ti a, chuongchun, an mi hung pêk a, chun, meiah ka rawtui a, hi bâwngte lim hi a hung suok a ni hi,” a ti a.

²⁵Mosie chun mipui chu zalêntaka um a hmu chun (Aronin a lo khuokhir naw leiin hmêlmahai mithmuah muolphotakin a lo inumtir ta si a),

²⁶Mosie chu riebûk kawtkhâra chun a ngîr a, “LALPA tienga ṭhang chu ka kuomah hung raw se,” a ti a. Levi naupasalhai po po chu ama kuoma chun an hung inkhâwm ta a.

²⁷Chun, an kuomah, “Israel Pathien LALPA chun hieng ang hin a tih, ‘Mi tinin a ngûnhnâm chu a mal chungah sie sienla, riebûk po poah kawtkhâr tinah fe vêl sienla, mi tinin a unaupa, mi tinin a ruolpa khawm, mi tinin a tuolbâwm khawm that raw se,” tiin a hril a.

²⁸Levi naupasalhai chun Mosie thu ang chun an thaw a; chuongchun, mipui chu chu ni chun mi sâng thum lai an tlu ta a.

²⁹Mosie chun, “Vawisûn hin in chunga malsâwmna a pêk theina ding cheuin, mi tin chu mâni naupa amanih, mâni unaupa amanih chenin LALPA rawngbâwl dingin in inhlân ta hi[30],” a ti a.

³⁰A zînga chun Mosie chun mipui kuoma chun, “Thil suol nasatak in thaw ta chu a ni a, chuleiin, LALPA kuomah tuhin hang fêng ka tih, in suolna ta dingin intlanna ka siem thei tâkduoiin,” a ti a.

³¹Chun, Mosie chu LALPA kuomah a hang fe nâwk a, “Aw hi mipui hin suolna nasatak chu an thaw ta a; rângkachak pathienhai an insiemfâwm a,.

³²Nisienlakhawm, rem i ti chun an suolna chu la ngaidam hrâm rawh, chuong a ni naw chun, ka ngên che hi, i lekhabu i zieka inthawk khan mi thaihmang el rawh,” a ti a.

³³LALPA ruok chun Mosie kuomah, “Tukhawm ka chunga thil suksuol chu, ama chu ka lekhabua inthawkin thaihmang ka tih.

³⁴Tuhin fe la, hmun ka hrilna chea khan mipui chu ṭhuoi la, ngai ta, ka vântirko i hmaah fêng a tih. Amiruokchu, ka hung sir nia chun an suol man chu anni chungah intlungtir ka tih,” a ta.

³⁵Chuongchun, Aron isiem bâwngte an siem lei chun LALPAIN mipui chu a hrem ta a.