Read Hmar FESUOKNA 33 Bible Online

FESUOKNA 33 - Hmar bible

FESUOKNA 33

¹LALPA chun Mosie kuomah, “Suok unla, hitaka inthawkin nang le Aigupta rama inthawka mipui i ṭhuoi suokhai chu, Abraham, Isak le Jakob kuoma, ‘I thlahai kuomah pêng ka tih,’ tia ka tiem tah ram tieng chun fe ro.

²In hmaah ka vântirko tir ka ta, Kanaan mihai, Amor mihai, Hit mihai, Periz mihai, Hiv mihai le Jebus mihai chu hnawt suok ka tih.

³Khuoizu le nênetuia luong rama chun fe ro; kei ruok chu nangni lai fe ve naw ning, chuong naw chun lam kârah sukbohmang hlau rawi ka ti cheu, mi kâwmâwtak in ni si a,” a ti a.

⁴Mipuiin hi thuthang ṭhanaw hi an hriet chun an sûn a, tukhawmin an incheina chu an inbel ta naw a.

⁵LALPA chun Mosie kuomah, “Israel mihai kuomah hril rawh, ‘Mi kâwmâwtak in ni a, mitkhapkâr bak khawm nangni laia ka fe ve chun ka sukbohmang ding cheu a ni a; chuleiin, in incheinahai chu hlîp ro, iengtin am ka thaw ding cheu a nih ti ka hriet theina dingin,’ tiin,” a ti a.

⁶Chuongchun, Israel mihai chun Horeb tlânga inthawk chu an incheinahai chu an hlîp ta vawng a.

⁷Mosie chun puon in chu a sawm pei a, riebûk puotieng, riebûka inthawka hla deua hin a zar hlak a; chu chu “Intuokna puon in” tiin ân bûk a. Mi tin LALPA zawngtu taphawt chu riebûk puoa um puon ina chun an fe hlak a.

⁸Mosie chu puon ina a fe lai chun mipui po po chu an tho a, mi tin chu mâni puon in kawtkhâra chun an ngîr a, Mosie chu puon ina a lût chenin an enzui pei a.

⁹Mosie puon ina a lût phingleh sûm ngîr a hung thla a, puon in kawtkhâra chun a ngîr a; chun, LALPAIN Mosie kuomah thu a hril hlak a.

¹⁰Mipui chun sûm ngîr kawtkhâra ngîr an hmu pha chun, mipui po po chu an tho a, mâni puon in kawtkhâr chita chun mi tinin chibai an bûk hlak a.

¹¹ LALPA chun Mosie chu inhmatuoin, miin a ruol a biek angtakin a biek hlak a. Chun, Mosie chu riebûk tieng a kîr nâwk a, a rawngbâwltu Joshua, Nun naupa, tlangvâl ruok chun puon in chu a mâksan nawh.

¹²Mosie chun LALPA kuomah, “Ngai ta, nangin ka kuomah, ‘Mipui hi hung ṭhuoi rawh,’ i ti a, kei le i tir ding chu tu am a nih i mîn hriettir si naw a. Nisienlakhawm, nangin, ‘I hmingin ka hriet che a, ka mithmuah lunginsietna i chang ta bawk a nih,’ i ti a.

¹³Chuleiin, tuhin ka ngên che, i mithmuah lunginsietna ka chang a ni chun, nang ka hriet che a, nanga mithmua lunginsietna chu a tâwp chena ka hmu theina dingin i lamhai chu mîn entir rawh: chun, hi hnam hi i mihai an ni hi ngaituo rawh,” a ti a.

¹⁴LALPA chun, “I kuomah fe ve pei ka ta, châwlna pêng ka ti che,” a ti a.

¹⁵Mosie chun a kuomah, “Ka kuomah i fe ve pei naw ding chun hitaka inthawk keini mi ṭhuoi tung ta naw rawh.

¹⁶Kei le i mihai hin i lunginsietna kan hmu tah ti iengtin am inhriet a ta? Hnuoi chunga um mi dang po poa inthawk kei le i mihai ṭhea kan umna chu keini le i fe ve zingnaa chun a ni naw ding am a nih?” a ti a.

¹⁷LALPA chun Mosie kuomah, “I hril ang tak chun thâwng ka tih: hmingin ka hriet che a, ka lunginsietna chu i hmu ta si a,” a ti a.

¹⁸Mosie chun, “Ka ngên che, i ropuina chu mîn hmutir rawh,” a ti a.

¹⁹Chun, ama chun, “Ka ṭhatna po po i hmaah fêng a ta, ka hming ‘LALPA chu’ i hmaah puongdar ka tih; ka lunginsiet dinghai chu lunginsiet ka ta, za ka ngaina dinghai chunga chun za ngai ka tih.

²⁰Nisienlakhawm, Ka hmêl chu hmu thei naw ti nih, tukhawm ka hmêl hmu chu an hring ding a ni si naw a,” a ti a.

²¹LALPA bawk chun, “En ta, ka kâwla hi lungpui chungah i ngîrna ding a um;

²²ka ropuinain a fe khêl lai che chun lungpui kak kârah sieng ka ti che a, ka kutin i hmai hlieng ka ti che;

²³chun, ka kut chu la hmang ka ta, ka hnungtieng chu hmûng i ta, ka hmai ruok chu hmu a ni ding a ni naw,” a ti a.