Read Hmar FESUOKNA 35 Bible Online

FESUOKNA 35 - Hmar bible

FESUOKNA 35

¹Mosie chun Israel mipui po po chu a ko khâwm a, an kuomah, “Hieng hi LALPA thupêk in ithaw dinghai chu a nih.

²Ni ruk sûng chu sin thaw nîng a ta, ni sari ni ruok chu in ta dingin ni inthieng, LALPA kuoma châwl ṭawk ṭawkna ding châwlni a ni ding a nih; mi tukhawm chu nia ieng sin khawm thaw taphawt chu sukhlum an ni ngei ding a nih.

³In umna hmun po poa chun châwlni chun mei khawm in sêm dêr ding a ni nawh,” a ti a.

⁴Mosie chun Israel mi pungkhawmhai kuoma chun, “Hi thil hi LALPA thupêk chu a nih,

⁵‘Nangni lai LALPA kuoma thilpêk ding dâwl ro, mi tukhawm lungrila pêk inhâwkna nei chun LALPA kuoma thilpêk chu hung chawi sienla, rângkachak, tangkaruo le dârsen:

⁶sahmul dumpâwl, a êm, a seninlâr le pâtzai inhmi kawp le kêl hmul,

⁷berâmchal vun suksenhai, seal vunhai le shittim thing;

⁸chun, meivar dingin hriek le innâlna hriek ding le, riminhnik râwmi dingin thil riminhnikhai leh;

⁹zakawsîng le âwmbela phûm onik lunghai le lung danghai leh.

¹⁰“Chun, nangni laia themthiem taphawt hung hai sienla, LALPA thupêk hi thaw vawng raw hai se:

¹¹Biekbûk, a puon in le ân khumna, a puonchepnahai le, a thingphêkhai, a bangruhai, a banhai le a kerkuokhai,

¹²Thuthlung bâwm le a zâwnfunghai, zângaina ṭhungpha le inkhumna puonzâr,

¹³dâwkân le a zâwnfunghai le a thuomhnawhai po po le entirna bei chu:

¹⁴elvartu ding khâwnvar siena, a hmangruohai le a khâwnvarhai le a meivar ta dinga hriek leh;

¹⁵riminhnik rawna maichâm a zâwnfunghai leh, innâlna hriek le riminhnik rawmi le kawtkhâr puonzâr biekbûk kawtkhâra mi ding;

¹⁶le pumrawhmang thil inhlânna maichâm, a dârsen thuk leh, a zâwnfung le a hmangruo po po leh, dâr maihûn le ân ṭhutna leh;

¹⁷a tuolzâwl inhuonna puonzâr, le chutaka a banhai, le a kerkuokhai leh, a tuolzâwl inhuonna kawta puonzâr leh;

¹⁸biekbûka a kilna, a tuolzâwla a kilna le a hruihai leh;

¹⁹Hmun Inthienga rawngbâwlna dinga thiemtaka khâwng silfênhai, thiempu sina rawngbâwl dinga Aron silfên inthienghai le a naupasalhai silfênhai le chun,’ tiin,” a ta.

²⁰Chun, Israel mi pungkhâwm po po chu Mosie kuoma inthawk an ṭin dar a.

²¹Mi tin lungril phûrna nei le mi tin lungrila inhâwkna nei taphawt chu an hung a; intuokna puon in sina ding le, chutaka rawngbâwlna po poa ding le, silfên inthieng dinga hmang ding LALPA thawlâwm chu an hung chawi a.

²²Lungrila pêk nuomna nei po po, pasal le nuhmei khawm, an hung a; puon kilnahai,[31] hnâra khaimi kuolhai,[32] hmingnamna kutsebihai, bânbunhai, rângkachak incheina chihai po po an hung chawi a; mi tinin LALPA ta dingin rângkachak thilpêk an inhlân ta a.

²³Chun, mi tin sahmul dumpâwl, a êm, a seninlâr le patzai inhmi dâm, kêl hmul dâm, berâmchal vun suksenhai le seal vun neitu chun a hung chawi a.

²⁴Mi tin dârsen le tangkaruoa thilpêk inhlân theitu chun LALPA ta dinga thilpêkah a hung chawi bawk a.

²⁵Nuhmei themthiemhai po chu an kutin pat an kher a; sahmul dumpâwl, a êm, a seninlâr le, patzai inhmi an kherhai chu an hung chawi a.

²⁶Nuhmei themthiem phûrtakhai po po chun kêl hmul chu an kher a.

²⁷Ṭhuoituhai chun onik lung le lung dang zakawsîng le âwmbela phûm ding chu an hung chawi a;

²⁸meivar dingin le, innâlna hriek le riminhnik râwmihai hmang dingin riminhnikhai leh.

²⁹Israel mihai pasal tin le nuhmei tin an lungrila pêk nuomna neihai chun LALPAIN Mosie hmanga thu a pêk tah sin po po thâwnaa dingin anni nuomthua LALPA ta dinga thilpêk chu an hung pêk a.

³⁰Chun, Mosiein Israel mihai kuoma chun, “En ta u, LALPA chun Juda hnama mi Hur naupa Uri naupasal a hming Bezalel chu a ko tah a nih;

³¹ama chu varnaa le hrietthiemnaa le, kutthiem sin tinrêng thawtheina le hrietnaa chun Pathien Thlarauin suksip a nih;

³²kutthiem sinhai riruong dingin, rângkachak, tangkaruo le dârsena sinthaw dingin,

³³inbûk ding lung ât thiem dingin, thing kermawi thiem ding le kutthiem sin kawng tinrênga sin thaw dingin.

³⁴Dan hnama mi Ahisamak naupa Oholiab le ama chu mihai inchûktir theina a pêk ve ve a.

³⁵Anni chu kutthiem sin tinrêng thiemtuhai, riruongtuhai, sahmul dumpâwl, a êm le seninlâr le patzai inhmi ṭhuimawi thiemhai le, puon khâwngtu sin kutthiemna le riruongna sin tinrêng thaw thiemnain a suksip tah a nih.