Read Hmar FESUOKNA 36 Bible Online

FESUOKNA 36 - Hmar bible

FESUOKNA 36

¹“Bezalel le Oholiab le mi themthiem tukhawm, Hmun Inthieng bâwlnaa sin po pohai thaw dân hre dinga an lungrila LALPAIN thiemna le varna a sienahai taphawt chun LALPAIN thu a pêk po po ang tak chun thâwng an tih,” a ti a.

²Mosie chun Bezalel, Oholiab le mi themthiem LALPAIN an lungrila thiemna a pêkhai, chu sin thaw dinga an lungrila phûr takhai phawt chu, sin chu thaw dingin a ko a.

³Anni chun Israel mihaiin Hmun Inthieng bâwlnaa hmang dinga nuomthua thilpêk an hung chawihai po po chu Mosie kuoma inthawkin an lâk a. Zîng tinin ama kuoma chun mâni nuomthua thilpêk chu an la hung chawi zing a.

⁴Chun, mi themthiem Hmun Inthienga sinthawtuhai po po chu, mi tin chu an sinthawna senga inthawkin, an hung a,

⁵Mosie kuoma chun, “LALPAIN siem dinga thu a pêk, hi sin thawnaa hmang ding hin a huntâwk nêka tam lem mipuiin an hung lâk tah,” an ti a.

⁶Chuongchun, Mosie chun, “Pasal khawmin, nuhmei khawmin Hmun Inthienga dinga thilpêk dang hrim pe ta naw raw hai se,” tiin thu a pêk a, chu thu chu riebûk po poa puong a ni ta a. Chuongchun, mipui chu an hung pêk khap an ni ta a:

⁷Hmangruo an nei chu sin po poa hmang ding chun a huntâwk ta a, a tam taluo rau ta leiin.

⁸Anni laia sinthawtu mi themthiemhai po po chun biekbûk chu puonzâr sâwm, puon zai inhmi kawp le, sahmul dumpâwl, a êm, le a seninlâr, cherubhai lim kutthiemtaka chei chun an siem ta a.

⁹Puonzâr tin seitieng chu tawng sâwmhni pariet, puonzâr tin lientieng chu tawng li a ni a, puonzâr po po chu ân tie vawng a nih.

¹⁰Chun, puonzâr panga chu a ṭhui zawm a, puonzâr panga dang chu a ṭhuizawm bawk a.

¹¹Puonzâr pakhat a thuo laia kâwlhnung tak tlânga chun valbahai dumpâwlin a siem a, chuong ang bawk chun a thuo hninaa puonzâr puo tak tlânga chun a siem bawk a.

¹²Puonzâr pakhata chun valba sâwmnga a siem a, a thuo hninaa puonzâr pakhat tlânga chun valba sâwmnga bawk a siem a; valbahai chu an inzawm seng bawk a.

¹³Chun, rângkachak puonchepna sâwmnga a siem a, chuong puonchepnahai chun puonzârhai chu an cheptuo a: chuongchun, biekbûk chu pakhat a hung ni ta a.

¹⁴Biekbûka puon in inkhumna ding chun kêl hmul puonzârhai a siem a, puonzâr chu sâwm le pakhat a siem a.

¹⁵Puonzâr tin seitieng chu tawng sâwmthum, puonzâr tin lientieng chu tawng li a nih; puonzâr sâwm le pakhat chu an intie seng a.

¹⁶Puonzâr panga chu a ṭhui zawm a, puonzâr paruk chu a ṭhui zawm bawk a.

¹⁷Puonzâr hmasa a kâwlhnung tak tlânga chun valba sâwmnga a siem a, a thuo hninaa puonzâr kâwlhnung tak tlânga chun valba sâwmnga bawk a siem a.

¹⁸Puon in chu pindan pakhat a ni theina dinga chep khâwmna dingin dârsen puonchepna sâwmnga a siem a.

¹⁹Chu puon in inkhumna ding chu berâmchal vun suksenin le chu chung nâwka chun seal vunhaiin inkhumna a siem a.

²⁰Chun, biekbûk bang intunghai chu shittim thingin a siem a.

²¹Thingphêk tin seitieng chu tawng sâwm, thingphêk tin lientieng chu tawng khat le a chenve a nih.

²²Thingphêk tin chun rek pahni, a dang le thun zawmna ding a nei seng a; biekbûk thingphêk po po chu chuong ang seng chun a siem vawng a.

²³Biekbûka thingphêkhai chu chuong ang chun a siem a, simsawngah thingphêk sâwmhni,

²⁴chun, thingphêk sâwmhni hnuoia chun tangkaruo kerkuok sâwmli, thingphêk pakhat hnuoiah a rek pahni inṭhutna dingin kerkuok pahni pei; chun, thingphêk dang hnuoia khawm a rek pahni in ṭhutna ding kerkuok pahni pei bawk a siem a.

²⁵Chun, biekbûk sîr hnina, a hmartieng panga chun, thingphêk sâwmhni le,

²⁶an inṭhutna ding tangkaruo kerkuok sâwmli a siem a; thingphêk pakhat hnuoiah kerkuok pahni, thingphêk dang hnuoiah kerkuok pahni bawk.

²⁷Biekbûk châwrtieng thlangtieng panga chun thingphêk paruk a siem a.

²⁸Biekbûk châwrtieng kihaia dingin thingphêk pahni a siem a.

²⁹Chun, a hnuoitieng chun suktuok an ni a, a chungtieng ruok chun a sîpah, kuol pakhata chel khâwm an ni a, a kihai pahnia mi chu chuong ang ve ve chun a thaw a.

³⁰Chuongchun, thingphêk pariet an inṭhutna tangkaruo seng leh; kerkuok sâwmparuk, thingphêk pakhat hnuoiah kerkuok pahni peiin a um a.

³¹Chun, shittim thing bangruhai a siem a, biekbûk sîr khata thingphêkhai dingin bangru panga,

³²biekbûk sîr khingtienga thingphêkhai dingin bangru panga bawk, biekbûk châwrtieng thlangtieng panga thingphêkhai dingin bangru panga.

³³A bangru lailung tak chu a thingphêkhai sûngah a tâwp taka inthawka khingtieng tâwp tak chena rawl thlengin a siem a.

³⁴Thingphêkhai chu rângkachakin ân luon khum a; chun, a bangruhai rawlna dingin rângkachak kuolhai a siem a, bangruhai chu rângkachakin ân luon khum bawk a.

³⁵Chun, puonzâr sahmul dumpâwl, a êm le a seninlâr le, patzai inhmi kawpin, cherubhai lim kutthiemtaka siemhaia cheiin a siem a.

³⁶Chu khaina ding chun shittim thing ban pali a siem a, rângkachakin ân luon khum a; an kuoikimhai chu rângkachak a ni a, an inṭhutna dingin tangkaraw kerkuok pali a sut bawk a.

³⁷Puon in kawtkhâra ding chun puonzâr, sahmul dumpâwl, a êm, a seninlâr le puonzai inhmi kawp, a ṭhuia ṭhuimawia chei chu a siem a;

³⁸a ban panga le a kuoikimhai leh. An lubâwkhai le an tuom mawinahai chu rângkachak ân luon khum a, an inṭhutna panga ruok chu dârsen an nih.