Read Hmar FESUOKNA 37 Bible Online

FESUOKNA 37 - Hmar bible

FESUOKNA 37

¹Bezalel chun shittim thingin Thuthlung bâwm a siem a; a seitieng tawng hni le a chenve, a lientieng tawng khat le a chenve, ân sângtieng khawm tawng khat le a chenve a nih.

²A sûng le a puo chu rângkachak inthiengin ân luon khum a, a vêlin rângkachakin a tlâng a kâwm a.

³Rângkachak kuol pali a kehai palia dingin; sîr khatah kuol hni, a sîr dangah kuol hni bawk a siem a,

⁴shittim thing zâwnfunghai a siem a, rângkachakin ân luon khum a.

⁵Thuthlung bâwm chu zâwnna dingin, thuthlung bâwm sîrhaia kuolhaia chun zâwnfunghai chu a rawl a.

⁶Rângkachak inthiengin Zângaina ṭhungpha a siem a; chu seitieng chu tawng hni le a chenve, a lientieng chu tawng khat le a chenve a nih.

⁷Rângkachakin cherub pahni, a suta sut zawmin, zângaina ṭhungpha tâwp ve vea chun a siem a;

⁸cherûb pakhat hmawr khing khatah cherub pakhat hmawr khing dangah; a hmawr ve veah cherubhai chu zângaina ṭhungpha le zawmkhatin a siem a.

⁹Cherubhai chun an thlahai chu chungtieng an zâr a, an thlahai chun zângaina ṭhungpha chu a zâr hlie a, an hmai le an hmai chu innghattuokin, zângaina ṭhungpha tieng chun cherubhai hmai chu a ngha a.

¹⁰Shittim thingin dawkân a siem a, a seitieng tawng hni, a lientieng tawng khat, ân sângtieng chu tawng khat le a chenve a nih.

¹¹Rângkachak inthiengin ân luon khum a, a vêlin rângkachakin a tlâng a kâwm a.

¹²A vêlin a rei kutphabawkin a siem a, chu rei tlâng chu rângkachakin ân luon a.

¹³Chu chu ta ding chun rângkachak kuol pali a siem a, chu kuolhai chu a ki palia a kehai palia chun ân bûk a.

¹⁴Dawkân zâwnna ding zâwnfunghai rawlna dingin a kuolhai chu a rei hnaiah an um a.

¹⁵Dawkân zâwnna ding chun shittim thing zâwnfunghai a siem a, rângkachakin ân luon khum a.

¹⁶Chu dawkân chunga hmang ding chun bûrlebêlhai-thlenghai, riminhnik thlêngtêhai, no inkûmhai, notung seihai, dâwnmi thilinhlânhai bun suokna dingin rângkachak inthiengin a siem a.

¹⁷Chun, rângkachak inthiengin sathâukhâwnvar siena a siem a. Sathâukhâwnvar siena a ṭhut le a ngul chu a suta suta siem a nih; chu chu le a kheihai, a mûmhai le a hmawr pârhai chu zawm khat vawng a nih.

¹⁸A sîrhaia chun kau paruk a ṭo suok a, a sîr khata chun sathâukhâwnvar siena kau thum, sîr khing dangah sathâukhâwnvar siena kâu thum bawk;

¹⁹kâu khata chun almond zîk pâr anga siem, a khei pathum, a mûm le a hmawr pârhai; kâu danga khawm almond zîk pâr anga siem khei pathum, a mûm le a hmawr pârhai leh Khâwnvar sienaa kâu paruk suokhai chu chuong ang seng chu a nih.

²⁰Khâwnvar siena ngulpuia chun almond zîkhai anga siem, khei pali, a mûmhai le a pârhai leh an um a.

²¹A sîra kâu paruk ṭo suokhaia tuok khat pei hnuoia chun a mûm pakhat a um pei a,

²²an mûmhai le an kauhai chu ama le chun zawmkhat vawng an ni a, a pumpui chun rângkachak inthieng hlawm khata sut vawng an nih.

²³A khâwnvarhai pasari le a chaichehai, a vâmdawhai chu rângkachak inthiengin a siem a.

²⁴Khâwnvar siena le a hmangruo po po chu rângkachak inthieng talent khatin a siem a.

²⁵Shittim thingin riminhnik râwna maichâm a siem a, a seitieng tawng khat, a lientieng tawng khat, killi nei a nih. Ân sângtieng chu tawng hni a ni a, a kihai chu ama le chun zawm khat an nih.

²⁶A chung le a sîrhai, a vêlin, a kihai leh rângkachak inthiengin ân luon khum a; a vêlin rângkachak rei a siem bawk a.

²⁷A zâwnna ding a zâwnfunghai rawlna dingin a sîr khing hnia a rei hnuoia chun rângkachak kuol pahni a siem a.

²⁸Shittim thing zâwnfunghai a siem a, rângkachakin ân luon khum a.

²⁹Chun, riminhnik siemtu siem dânin riminhnik râwmi le innâlna hriek inthieng a siem a.