Read Hmar FESUOKNA 38 Bible Online

FESUOKNA 38 - Hmar bible

FESUOKNA 38

¹Shittim thingin pumrawhmang thilinhlânna maichâm a siem a; a seitieng tawng nga, a lientieng khawm tawng nga, killi nei a nih. Ân sângtieng chu tawng thum a nih.

²A kil palia chun kihai a siem a, a kihai chu ama le zawmkhat an nih; dârsenin ân luon khum a.

³Chun, maichâma bûrlebêlhai: bêlhai, meikhelnahai, châwtawlhai, thîrkuoihai le vutluohai, a bûrlebêlhai po po chu dârsenin a siem a.

⁴Maichâm ding chun a chung khang hnuoiah dârsen inphan thuk maichâm chenve hang tlungin a siem bawk a.

⁵Dârsen inphan thuk kil lia chun a zâwnfunghai rawlna dingin kuol pali ân bûk a.

⁶Shittim thing zâwnfunghai a siem a, dârsenin ân luon khum a.

⁷A zâwnna dingin maichâm sîrhaia a kuolhaia chun zâwnfunghai chu a rawl a; maichâm chu thingphêkin a kawrawngin a siem a.

⁸Chun dârsenin maihûn a siem a, a ṭhut chu dârsen, intuokna puon in kawtkhâra rawng bâwl hlak nuhmeihai hlimenhaia siem a nih.

⁹Chun a tuolzâwl a siem a, tuolzâwl inhuonna puonzârhai chu simtieng pangah puonzai inhmi kawp tawng za khat a nih.

¹⁰A ban sâwmhni le an kerkuok sâwmhni dârsena siem leh; a banhaia kuoikimhai le a tuommawinahai ruok chu tangkaruo an nih.

¹¹Hmârtieng panga chun tawng za khat, ban sâwmhni, an kerkuokhai sâwmhni dârsena siem an nih; banhaia kuoikimhai le an tuommawinahai chu tangkaruo an nih.

¹²Thlangtieng panga chun puonzâr tawng sâwmnga, banhai sâwmkhat, an kerkuokhai sâwmkhat a nih; banhaia kuoikimhai le a tuom mawinahai chu tangkaruo a nih.

¹³A tuol tienga saktieng panga chu tawng sâwmnga a nih.

¹⁴A kawt sîr khata a puonzârhai chu tawng sâwmpanga, ban pathum le a kerkuok pathum bawk leh.

¹⁵A sîr khingtienga khawm chuong ang bawk chu a nih; a tuolzâwl inhuonna kawtkhâr hitieng pang le sawtieng pangah puonzârhai chu tawng sâwmpanga ve ve an nih; banhai pathum ve ve, kerkuokhai pathum ve ve leh.

¹⁶Tuolzâwl inhuonna puonzârhai chu a vêlin puonzai inhmi kawp a ni vawng a.

¹⁷A banhai inṭhutna kerkuokhai chu dârsen an nih, a kuoikimhai le a tuommawinahai ruok chu tangkaruo an nih; a hmawrbâwkhai tuomna chu tangkaruo an ni a, tuolzâwl inhuonna banhai po po chu tangkaruoa tuommawi vawng an nih.

¹⁸A tuolzâwl kawtkhâr puonzâr chu dumpâwl, a êm, seninlâr le puonzaiinhmi kawp kutthiem taka ṭhuimawi a nih, a seitieng chu tawng sâwmhni, ân sângzie chu tawng nga, tuolzâwl puonzârhai le inep tâwk chie a nih.

¹⁹Banhai chu pali, a kerkuokhai dârsena siem pali bawk a nih, a kuoikimhai chu tangkaruo, an hmawrbâwkhai inkhumna le an tuommawinahai chu tangkaruo an nih.

²⁰Biekbûk le tuolzâwl po poa hmang a kilna chu dârsen a nih.

²¹Thiempu Aron naupa Ithamar kuta, Levi mihai rawngbâwlnaa hmang dinga Mosie thupêk ang peia an tiem angin, biekbûk, thuthlung biekbûka thil hmanghai belkhâwm chu hi hi a nih:

²²Juda hnama mi Hur naupa Uri naupasal Bezalel chun LALPAIN Mosie thu a pêk po po chu a thaw vawng a.

²³Ama ṭhangpuitu ding chun Dan hnama mi Ahisamak naupa Oholiab, lung ker thiem le kutthiemtak, dumpâwl, a êm, seninlâr le puonzai inhmi kawpa ṭhuimawi thiem mi chu a um bawk a.

²⁴Hmun Inthieng sinthawnaa hmang rângkachak thilpêk, rângkachak hmang tahai po po chu Hmun Inthieng tangka bûk dân angin talent sâwmhni pakuo le shekel za sari le sâwmthum a nih.

²⁵Mipui tiema um tahaia inthawka tangkaruo hmu po chu Hmun Inthieng tangka bûk dân angin talent za khat, shekel sâng khat za sari le sâwmsari panga a nih.

²⁶Chu chu Intiemnaa tiemna laia ṭhang phâk, pasal kum sâwmhni le a chungtieng mi nuoi ruk sâng thum za nga sâwmnga, mi lukipa beka khat (chu chu Hmun Inthieng tangka bûk dân anga shekel chenve) pei ang a nih.

²⁷Tangkaruo talent za khat chu Hmun Inthienga kerkuokhai le puonzâr khaina kerkuokhai siemnaa hmang a nih; kerkuok za khatah talent za khat, kerkuok pakhatah talent khat pei.

²⁸Chun, shekel sâng khat za sari sâwmsari panga chu banhaia kuoikimhai siemnain a hmang a, an hmawrbâwkhai ân luon khum a, tuommawinahai a siem vawng bawk a.

²⁹Dârsen thilinhlânhai chu talent sâwmsari le shekel sâng hni za li a nih.

³⁰Chu chun biekbûk kawtkhâra kerkuokhai, dâr maichâm le dâr thuk le, maichâm hmangruo dang po po le,

³¹tuolzâwl inhuonna, a vêl po poa kerkuokhai, le tuolzâwl inhuonna kawtkhâra kerkuokhai, biekbûk kilna po po, le tuolzâwl inhuonna a vêla kilna hmang po po chu a siem a.