Read Hmar FESUOKNA 39 Bible Online

FESUOKNA 39 - Hmar bible

FESUOKNA 39

¹LALPAIN Mosie thu a pêk angin, sahmul dumpâwl, a êm le seninlârin Hmun Inthienga rawngbâwlna dingin silfên ṭhatakhai an siem a, Aron silfên inthienghaiah an siem a.

²Zakawsîng chu rângkachak zai le sahmul dumpâwl, a êm, le seninlâr le, patzai inhmi kawpin an siem a.

³Rângkachak chu phêk inphântakhaiin an sut a, a zaiin an ât a, kutthiemtak sinthaw, sahmul dumpâwl, a êm, seninlâr le patzai inhmi kawpa zep dingin.

⁴Zakawsînga chun a liengko belhai a hmawrhai pahnia ama le ṭhui matin an siem a.

⁵Zakaw chunga a khitna, kâwngchûn chu hmangruo thuhmun le khâwng dân thuhmuna thiemtaka khâwng, rângkachak, sahmul dumpâwl, a êm, le seninlâr le patzai inhmi kawpa, LALPAIN Mosie thu a pêk ang taka siem a nih.

⁶Onik lunghai chu an ât a, Israel naupasalhai hming ang peiin, hmingnamna ker anga rângkachak kerkuokhaia chun an phûm a.

⁷LALPAIN Mosie thu a pêk anga Israel mihai ta dinga hriet zingna lunghai ni dingin zakawsînga liengko belhaia chun a sie a.

⁸Chun, kutthiemtak siem dânin, zakawsîng siem ang bawk chun, rângkachak zai le sahmul dumpâwl, a êm, seninlâr le pat zai inhmi kawpin âwmbel a siem a,

⁹killi inchen seng a ni a: âwmbel chu thlep thuoa siem a ni a, thlep thuo chun a seizie khâp khat, a lienzie khâp khat bawk a nih.

¹⁰Chutaka chun lunghai chu tlar liin an inbûk a, sardion, topaz le karbankle lung chu tlar khatna a nih.

¹¹A tlar hnina chu emeral, sapphir le diamond lung;

¹²a tlar thumna chu jasinth, agate le amethust lung,

¹³a tlar lina chu birul, onik le jasper lunghai a ni a; rângkachak kerkuokhaia phûm an nih.

¹⁴Lunghai chu sâwm le pahni, Israel naupasalhai hming ang peia an hming leh, hnam sâwmpahnia dingin lung tin chu a hming pei leh, hmingnamna anga siem a nih.

¹⁵Âwmbel chunga chun rângkachak kerkuok pahni le rângkachak inthieng khaidiet, hruol anga inherthlawp an siem a.

¹⁶Rângkachak kerkuok pahni le rângkachak kuol pahni bawk an siem a, a kuol pahni chu âwmbel tâwp ve vea chun an inbûk a.

¹⁷Rângkachak khaidiethai pahni chu âwmbel hmawra kuol pahnia chun an inbûk a.

¹⁸Khaidiet hmawr khingtieng pahni chu kerkuok pahnia chun an inbûk a, zakawsîng liengko bel hmatieng panga chun an khai a.

¹⁹Rângkachak kuol pahni an siem a, âwmbel hmawr khing tieng sîr tâwp, sûngtieng pang zakawsîng deptienga chun an inbûk a.

²⁰Rângkachak kuol pahni an siem a, hmatiengah zakawsîng liengko bel hnuoitieng pang zakawsîng khitna thiemtaka khâwng chunga ân tuoknaa khan an inbûk a.

²¹LALPAIN Mosie thu a pêk ang taka, âwmbel chu zakawsîngah dettaka a kawp theina ding le, zakawsîng khitna thiemtaka khâwng chunga chun a um theina dingin, âwmbela kuolhai chu zakawsînga kuolhaia chun hrui dumpâwlin an khit mat a.

²²Chun, thiempu zakawfuol a khâwnga khâwngin a dumpâwl vawngin a siem a;

²³Zakawfuola a âwng chu indona phaw zakuo anga, ân ek nawna dinga a vêl tuoka tuom a nih.

²⁴Zakawfuol hmawr tlânga chun dumpâwl, a êm, seninlâr le patzai inhmi kawpin theibufai an siem a.

²⁵Rângkachak inthiengin telnênghai an siem bawk a, telnênghai chu theibufai inkâr, zakawfuol hmawr tlânga a vêl suoka theibufai inkâra chun an khai a:

²⁶LALPAIN Mosie thu a pêk angin, rawngbâwlna ding zakawfuol hmawr tlâng vêl suoka chun, telnêng theibufai, telnêng le theibufai ti peia khaiin.

²⁷Aron le a naupasalhai ta dingin puonzai inhmi a khâwnga khâwngin zakawchunghai an siem a,

²⁸puonzai inhmi lukâwm, puonzai inhmi lukhum, puonzai inhmi kawpin puonzai inhmi kekawr hnuoihai,

²⁹puonzai inhmi kawp ṭhatak le sahmul dumpâwl, a êm le seninlâr ṭhuimawia chei kâwngchûn, LALPAIN Mosie thu a pêk ang chun an siem bawk a.

³⁰Rângkachak inthiengin lukhim inthieng phêk an siem a, chutaka chun “LALPA TA DINGA INTHIENG” ti an ziek a.

³¹LALPAIN Mosie thu a pêk anga a chunga lukâwma khitdena dingin hrui dumpâwl an inbûk a.

³²Chuong ang chun intuokna puon in sin po po chu zo a ni ta a, chun Israel mihai chun LALPAIN Mosie thu a pêk po po angtak chun an thaw a, chuong ang tak chun an thaw ta a.

³³Biekbûk chu Mosie kuomah an hung lâk a, a puon in le a hmangruo po po, a kuoikimhai, a thingphêkhai, a bangruhai, a banhai le ân ṭhutnahai;

³⁴ân khumna berâmchal le kêl vun suksenhai, a chung inkhumna seal vunhai, a puonzâr khaihai:

³⁵Thuthlung bâwm le a zâwnfunghai, zângaina ṭhungpha leh;

³⁶dawkân le a bûrlebêlhai po po le inentirna bei,

³⁷Rângkachak inthienga siem sathâukhâwnvar siena le khâwnvarhai, a khâwnvarhai siena pei leh a hmangruo po po, meivar dinga hriek;

³⁸rângkachak maichâm, innâlna hriek, riminhnik râwmi le puon in kawtkhâr puonzâr ding;

³⁹dâr maichâm le dâr inphan thuk, zâwnfunghai le a bûrlebêl po pohai, dâr maihûn le ân ṭhutna;

⁴⁰tuolzâwl inhuonna puonzâr khaihai, a banhai, a kerkuokhai, tuolzâwl inhuonna kawtkhâra puonzâr, a hruihai, a kilnahai, biekbûk le intuokna puon ina dinga rawngbâwlna hmangruo po po;

⁴¹Hmun Inthienga rawngbâwlna dinga silfên khâwng ṭhatakhai, thiempu Aron silfênhai le, thiempu sina rawngbâwlna dinga a naupasalhai silfênhai le chun an hung lâk a.

⁴²LALPAIN Mosie thu a pêk po po ang tak chun Israel mihai chun sin po po chu an thaw ta a.

⁴³Mosie chun an sinthawhai po po chu a en a, LALPAIN thu a pêk ang tak chun an thaw zo tah ti a hmu a; chuong ang tak chun an thaw zo ta a; chun, Mosiein anni chu mal a sâwm ta a.