Read Hmar FESUOKNA 40 Bible Online

FESUOKNA 40 - Hmar bible

FESUOKNA 40

¹LALPA chun Mosie kuomah a hril a,

²“Thla khatna ni khat niah intuokna puon in biekbûk chu în tung ngîr ding a nih.

³Chun, a sûnga chun Thuthlung bâwm chu sieng i ta, Thuthlung bâwm chu puonzârin zâr hlieng i tih.

⁴Dawkân chu hung la lût i ta, a chunga thil umhai chu indawt peiin sieng i tih: khâwnvar siena chu hung la lût i ta, chutaka chun khâwnvarhai chu inṭhut i tih.

⁵Riminhnik râwna rângkachak maichâm chu Thuthlung bâwm hmaa chun inṭhut i ta, biekbûk kawtkhâr puonzâr chu zâr i tih.

⁶Pumrawhmang inhlânna maichâm chu intuokna puon in biekbûk kawtkhâr hmaa chun inṭhut i tih.

⁷Maihûn chu intuokna puon in le maichâm inkâra chun inṭhut i ta, a sûngah tui sieng i tih.

⁸Tuolzâwl inhuonna chu a vêlin inngîr i ta, tuolzâwl inhuonna puonzârhai chu khai i tih.

⁹Chun, innâlna hriek lâng i ta, biekbûk le a sûnga um po po chu nâl i ta, inhlân i ta, chutaka hmangruo po po le chun; chuongchun, hung inthieng tâng an tih.

¹⁰Chun, pumrawhmang inhlânna maichâm chu nâl i ta, a hmagruo po po khawm nâl bawk i ta; chun, maichâm chu inhlân i ta, maichâm chu inthiengtak hung ni tâng a tih.

¹¹Maihûn le ân ṭhutna khawm nâl i ta, inhlân i tih.

¹²Chun, Aron le a naupasalhai chu intuokna puon in kawtkhâra chun hung ṭhuoi i ta tuiin insiltir i tih.

¹³Aron chunga chun silfên inthienghai chu bel i ta, ama chu hriek nâl i ta, inhlân i tih, thiempu sina ka rawng a bâwl theina dingin.

¹⁴A naupasalhai chu hung ṭhuoi i ta, anni chu zakawchunghai inhâktir i ta,

¹⁵an pa i nâl ang bawk khan hriek nâl i tih, thiempu sina ka rawng an bâwl theina dingin. Hriek nâl an nina chu an ta dingin an thlahai chena thiempu an ni zingna ding nîng a tih,” tiin.

¹⁶LALPAIN thu a pêk po po angin Mosie chun a thaw a; chuong ang tak chun a thaw a nih.

¹⁷Chun, kum hninaa thla hmasa tak, chu thla ni khatnaa chun biekbûk chu inngîr a lo ni ta a.

¹⁸Mosie chun biekbûk chu ân ngîr a, a kerkuokhai chu a sie a, chutaka chun a thingphêkhai chu ân ngîr a, a bangruhai chu a thun lût a, a banhai chu ân ngîr ta a.

¹⁹A puon in chu biekbûk chunga chun a keiphar a, a chunga chun inkhumnain ân khum a, LALPAIN Mosie thu a pêk ang tak chun.

²⁰Chun, thuthlung chu a lâk a, Thuthlung bâwm sûnga chun a sie ta a; Thuthlung bâwma chun a zâwnfunghai a rawl a; Thuthlung bâwm chunga chun zângaina ṭhungpha chu a sie a;

²¹chun, Thuthlung bâwm chu biekbûk sûnga chun a hung lâk lût a; pindanna puonzârhai chu a khai a, Thuthlung bâwm chu a zarhlie a, LALPAIN Mosie thu a pêk ang tak chun.

²²Puonzâr puo biekbûk hmartieng pangah intuokna puon ina chun dawkân a sie a,

²³ LALPA hmaah bei chu indawt thlie hin a sie a, LALPAIN Mosie thu a pêk ang tak chun.

²⁴Biekbûk simtieng pangah dawkân zawna chun sathâu khâwnvar siena chu a sie a,

²⁵LALPA hmaa chun khâwnvarhai chu ân ṭhut a, LALPAIN Mosie thu a pêk ang tak chun.

²⁶Puonzâr hmaah, intuokna puon ina chun rângkachak maichâm chu a sie a,

²⁷chu chunga chun riminhnik rawmi chu a raw a, LALPAIN Mosie thu a pêk ang tak chun.

²⁸Chun, biekbûk kawtkhâr puonzârhai chu a zâr a.

²⁹Intuokna puon in biekbûk kawtkhâra chun pumrawhmang thil inhlânna maichâm chu ân tung a, a chunga chun pumrawmhmang thilinhlânhai le fâkmi thilinhlânhai ân hlân a, LALPAIN Mosie thu a pêk ang tak chun.

³⁰Maichâm le intuokna puon in inkâra chun maihûn chu ân ṭhut a, insâwpna dingin a sûnga chun tui a sie a.

³¹Chutaka chun Mosie le Aron le a naupasalhai chun an kuthai le an kehai an sâwp hlak a;

³²intuokna puon ina an lût pha le maichâm hnaia an hung pha an sâwp hlak; LALPAIN Mosie thu a pêk ang tak chun.

³³Tuolzâwl inhuonna chu biekbûk le maichâm huol vêl vawngin ân ngîr a, tuolzâwl inhuonna kawtkhâr puonzârhai khawm a khai a. Chuongchun, Mosie chun sin chu a zo ta a.

³⁴Chun, sûm chun intuokna puon in chu ân khum a, LALPA ropuinain biekbûk chu a suksip a.

³⁵Biekbûk chu LALPA ropuinain a suksip leiin le, sûm chu a chunga a um zing leiin Mosie chu intuokna puon in sûngah a lût thei ta naw a.

³⁶An inzin sûng po po chun, sûm chu biekbûk chunga inthawka lâk kânga a um phingleh Israel mihai chun hmatieng an pan pei a;

³⁷sûm chu lâk kânga a um naw ruok chun, lâk kânga a um ni hma po chun an fe suok ngai naw a.

³⁸An inzin sûng po chun, Israel sûnghai po po mithmuah, LALPA sûm chu biekbûk chungah sûnah a um a, zâna chun sûma chun meichawk a um hlak a.