Read Hmar JOB 10 Bible Online

JOB 10 - Hmar bible

JOB 10

¹“Ka thlâ hin ka hringna hi a nghawk a; Ka nuom tâwkin sawisêl ka tih, Ka lungril rimsiknain thu hril ka tih.

²Pathien kuoma chun hieng hin tîng ka ta, Thiemnaw mîn changtir naw la, Keimaa hin ieng ang am i lungawi zâwng a ni mîn entir lem rawh.

³Nanga ngaiin, i nêksâwr a, I kut sinthawhai chu i hmusit a, Mi rilohai inrâwnna i sukvar chu a ṭha am a nih?

⁴Nang chun taksa mithai chu i neiin, Annawleh, i kumhai chu mihriemin an hmu angin i hmu am a nih?

⁵I nihai chu mihriemhai nihai ang am an nih? Annawleh, i kumhai chu mihriem kumhai ang am an nih?

⁶Ka rîtlonahai i sui ngiel a, Ka suolna khawm i zawng rak el chu?

⁷Mi rilo ka ni naw a, I kuta inthawka mi la suok thei tukhawm an um nawh ti hre zing siin?

⁸I kuthai chun a mi riruongin a mi lo siembâwl vawng ta a, Anachu nangin i mi suksiet el hi.

⁹Hi hi hre zing rawh, ka ngên che hi, nang chun pilpawk angin i mi lo siembâwl ta a, Pilvuta bawk i mi ṭhuoi nâwk el ding a ni maw?

¹⁰Nang chun nênetui anga mi bunthlain, Nênetui kîng angin i mi hmet ta ni lo am a nih?

¹¹Nang chun vun le taksain i mi lo thuom ta a, Thahruihai le ruhai chun i mi ṭhui khâwm tah.

¹²Hringna le ditsakna i mi lo phalpêk ta a, I vênghimna chun ka thlarau chu a lo hum a.

¹³Amiruokchu, hieng thilhai hi nang chun i lungrila chun i thup a, Hi hi i kuomah a um ti ka hriet a nih.

¹⁴Ka lo suol chun, nangin i mîn chik a, Ka khawhlonaa inthawk chun thiem i mîn changtir ngai nawh.

¹⁵Mi rilo ka ni chun, ka chung a rik a! Mi fel ni lang khawm ka lu ling naw bawk ka tih, Muolphonain ka sip a, ka tuornahai ka hmu zing leiin.

¹⁶Ka lu hi ama le ama ân chawimawi chun, sakeibaknei angin i mi pêl a, Ka chunga chun nang chu maktakin i hung inentir a.

¹⁷Ka chunga chun i thuhretuhai chu i hung sukthar a, Ka chungah i lunginsenna i sukpung a, Mi dotu pâwl dang dang i hung inumtir a.

¹⁸Chuong a ni chun iengdinga sula inthawk chun i mi lo lâk suok am a na? Thlarau lo inthla ta lang mitin a mi hmu naw ding bah.

¹⁹Kei chu lo um ta lo ang nîng ka ta, Sula inthawk chun thlânah lâk hmangin lo um tâng ka tih.

²⁰Ka nihai a tlâwm hle an nâwm a ni? Tâwp el raw se, Chitêa ka thlamuong dep theina dingin mâkhâtin mîn umtir el rawh.

²¹Ka hung kîr nâwk nawna dinga ka fe hma hin, Thina hlim le inthimna ram ngeia ka fe hma hin.

²²Inthimna ngawta inthim sâmup ram, Thupêk hrim um lo, thina hlim ram; Var khawm inthimna ang nina hmun chu,” tiin.