Read Hmar JOB 12 Bible Online

JOB 12 - Hmar bible

JOB 12

¹Chun, Job chun a dawn a, a hril ta a:

²“Mihriem chau in na, Varna chu in ruolin thi ve el a tih ti hi ringhla um lo a na.

³Nisienlakhawm, nangni ang bawkin hrietthiemna ka nei ve a, Nangni nêkin kân hnuoi bîk nawh: Anih, hieng thilhai ang hi tuin am hre nâwng an ta?

⁴Ka ruolhai ta dingin nuizatbûr ka hung ni ta a, Pathien ka koin, mi dawn sien khawm, Mi fel le demkailo ni lang khawm nuizatbûr el ka ni ta hi.

⁵Mi inhawitirhai ta ding chun vângduoina chu hmusitum a na; Mi a kehai intawlthlu ṭêp ta ding chun inzosa a nih.

⁶Inruhmanghai puon inhai chu a hung hlawtling a, Pathien suklungsentuhai chu an him bawk a, Chuonghai kuta chun Pathien chun tamtakin a hung vur a.

⁷Amiruokchu, tuhin ramsahai khawm chu indawn la, inchûktir an ti che; Chunglêng vatehai khawm chu indawn la hril an ti che.

⁸Annawleh, hnuoi kuoma chun thu hril la, inchûktir a ti che, Tuipuia ngahai khawm chun i kuomah hrillang an tih.

⁹Hienghai po poa hin, Lalpa kut chun hi hi a thaw a nih ti hre naw tu am um an ta?

¹⁰Ama kuta chun thilhring po po hringna chu a um a, Mi chi tinrênghai thlarau leh.

¹¹Na hin thuhai chu a fie ngai naw am a ni, Dangin bu chu ân tem ang el hin?

¹²Upaa chun varna a um a, Nihai sâwtah hrietthiemna a um bawk a.

¹³Amaa chun varna le hrâtna a um a, Ama chun hrietthiemna le remhrietna a nei.

¹⁴Ngai ta, a suksiet a, siemṭhat thei ruol an ta naw a; Mihriem chu a khârkhip a, ân hawngna a um thei naw a.

¹⁵Ngai ta, tuihai chu a chelngîr a, an kang ta a; A hung tir nâwk thung a, hnuoi chu an inkhum a.

¹⁶Amaa chun hrâtna le varna famkim chu a um a, Hlêma um le hlêmtu khawm chu ama ta bawk a nih.

¹⁷Inrâwnkhâwmhai chu a ṭhuoi hmangin a suksiet a; Rorêltuhai chu invêt ruolah a siem ta a.

¹⁸Lalhai khuopna chu a sût a; An kâwnghai chu kâwngkhiin a khitpêk a,

¹⁹Thiempuhai chu ṭhuoi hmangin a suksiet a; Mi hrât chu a nam thlûk bawk a.

²⁰Mi ringum ṭawnghai chu a sawn hmang a; Upahai hrietthiemna chu a lâk hmang bawk a.

²¹Lal nauhai chunga chun hmusitumna a buok a, Mi hrât kâwngchûn chu a sûtpêk bawk a.

²²Inthima inthawkin thil inthûktakhai chu a hmu suok a; Thina varuom chu varah a hung lâk suok ta a.

²³Hnamhai chu a hung sukpung a, anni a sukbohmang ta a; Hnamhai chu a hung suklien a, anni a ṭhuoi hmang hlak a.

²⁴Hnuoia mipuihai lalhai lungril chu a lâk hmang a, Thlalêr hmun ampui um nawna hmuna chun ân vâktir hlak.

²⁵Inthima chun var ṭhang lovin an inmai a, Mi, zu inrui ang ela pêm dingin anni a siem hlak.”