Read Hmar JOB 13 Bible Online

JOB 13 - Hmar bible

JOB 13

¹“Ngai ta, hi po po hi ka mit chun a hmu a nih, Ka na chun a hriet a, a ngâina khawm ka hriet tah.

²In hriet ang ang chu kei khawmin ka hriet a: Nangni nêkin kân hnuoi bîk nawh.

³Amiruokchu, Iengkimthawthei kuoma chun thuhril ka nuom a, Pathien le ngaituo hmunkhat chu ka nuom a nih.

⁴Khêlthuahai khêlhriltuhai chau in ni hi; Damdawi thiem mi ṭhangkaina um si lohai vawng in nih.

⁵Aw, in rêngin to ṭawk ṭawk lem unla chu! In varna ni lem a tih.

⁶“Ka ngaituona hi hre unla, Ka hmûrhaiin a hninahai chu ngai ta u.

⁷Pathien ta ding chun fel lotaka thu hrilin, Ama ta ding chun hmusitumtakin in ṭawng ding maw?

⁸A mi hi in inza naw ding am a nih? Pathien ta ding chun in kal ding maw?

⁹A zawng suok el cheu chu a ṭha am a nih? Annawleh, miin mi dang a hlêm angin, ama chu in hlêm el ding maw?

¹⁰Ama chun matheilovin kâwk a ti cheu, Mihai chu arûka in ditsak bîk chun.

¹¹A ṭhat famkimna chun a sukṭi cheuin, A ṭitumna chu in chungah a tla naw ding am a nih?

¹²In thuhril hriet zing dinghai hlak chu vut thuvarhai an na, in inhumna hlak chu pilpawk inhumna a nih.

¹³To ṭawk unla, makhâtin mîn umtir ro, thu ka hril theina dingin, Ieng po khawm ka chungah tlung el raw se.

¹⁴Iengkhawm tlung sien, ka taksa chu ka hahaia sein, Ka hringna chu ka kutah ka sie el dîm a nih?

¹⁵Ama chun mi sukhlum sien khawm, ama chu la beisei rawp ka tih. A hmabulah ka thiemna thu ka la hril ding a ni si a.

¹⁶Hi hi ka sandamna chu nîng a ta; Pathien ngaisak naw mi chu a hmaa hin a hung âwm si naw a.

¹⁷Nguntakin ka thuhrilhai hi ngai unla, Ka hrilfiena hi in nahaia chun lût raw se.

¹⁸Tuhin, ngai ta u, ka chungthua thu ka siemfel ta a, Thiem chang ka tih ti ka hriet.

¹⁹Tuin am mi sêl a ta? Tuhin to ṭawk ka ta, ka thlarau kân thla ding a ni si a.

²⁰Thil pahni hi ka chungah thaw naw la, Chuongchun, i hmaa inthawkin inbihmang naw ning.

²¹Keimaa inthawkin i kut chu hlatakah la hmang la, I ṭiumna chun mi suklâu ta naw raw se.

²²Chun, mi hung ko la, hung dawn ka ta; Annawleh, thu min hriltir la, nangin mi hung dawn rawh.

²³Ka suolnahai le ka khawhlonahai chu iengzât am an na? Ka suolna le ka bawsietna chu mîn hriettir rawh.

²⁴Iengdinga nangin i hmai i thup a, I hmêlma anga i mi ngai am?

²⁵Hna inhnîng inhnîng hi i thlam el ding maw? Bupâwl bul ṭâwl chu i hnawt i hnawt ding maw?

²⁶Nang chun ka chungah thil khatakhai chu i ziek a, Ka tleirâwl lai khawhlonahai ro chu hluo dingin i mi siem a.

²⁷Ka kehai chu kawl în buntir a; Ka lampuihai chu în chik vawng a, Ka kepha vêl po poa chun ramri i siekhum bawk a.

²⁸Mi chu thil hmawn bohmang el hlak ang a nih, Silfên hângthim ifâksiet ang chu.