Read Hmar JOB 14 Bible Online

JOB 14 - Hmar bible

JOB 14

¹“Mi nuhmei inei taphawt chu, Ni sâwtnawtêa ding, buoinaa sip a nih.

²Pâr angin a hung suok a, a vuoi hlak, Hlim angin a tlân a, a um zing ngai nawh.

³Mi chuong ang mi chunga chun i mit i mengin, Nangma le rorêlnaa chun i mi ṭhuoi a ni maw?

⁴Tuin am thil inthieng nawa inthawkin thil inthieng la suok thei an ta? Tukhawma thei naw ni hai.

⁵A nihai chu biruot a na, a thla ni zâthai khawm chu nangma kuomah a um a, Nang chun a fe pei thei nawna dingin a ramrihai chu i khang tâk hnung chu.

⁶A châwl theina dingin, ama nghatsan rawh, Inhlawfa anga a ni chu a suktling hmakhat chun.

⁷Thing ta ding chun beiseina a um, phûr ni sien khawm inder nâwk a tih; Chun, chu a kâu innohai chu vuoi naw ni.

⁸A zung chu hnuoia chun hung tar sienla khawm, A kûng chu leihnuoia chun thi sien khawm,

⁹Tui riminhnikna lei chun la hung inder a ta, Thil phun angin a zârhai hung zâr suok a tih.

¹⁰Nisienlakhawm, mihriem chu a thi a, a rîral ta a; Anih, mihriem chun a thlarau ân thla a, khâwlai am a um ta leh?

¹¹Dîla tuihai a kang hlak ang le, Vadung tui luongral a hung ṭâwl hlak angin;

¹²Chuong ang chun mihriem chu a zâl a, a thonâwk ta nawh; Vânhai chu a um naw hmakhat chun, tho ta naw ni hai a, An innaa inthawk chun keitho ni bawk naw ni hai.

¹³“Aw, Seola chun mi lo thup tah ni la chu, I lunginsenna a fe hmang hmakhat chu arûkin mi lo kawl i ta, Hun bîk mi ruotpêkin, i mi hriet zing ding bah!

¹⁴Mi a thi chun a hring nâwk ding am a nih? Ka nihai po po chu nghâk ka tih, Insuoa ka umna chu a hung tlung hmakhat chun.

¹⁵Nangin mi hung ko i ta, keiin lo dawn ka ti che, I kuthai sinthaw chu ditna i nei ding annâwm.

¹⁶Amiruokchu, tuhin nang chun ka kalchawihai i tiemin, Ka suolna chu i enthlit zing naw am a nih?

¹⁷Ka bawsietna chu ipa khitkhum a na, Nangin ka khawhlona chu i ṭhuikhum a.

¹⁸Matheilovin tlâng chu chimin teplo hung nîng a ta, Lungpui khawm chu a hmuna inthawka sawn nîng a tih.

¹⁹Tuihai chun lunghai chu an hrût hek a, Tui inkhâwhai chun hnuoia pil chu an lên hmang a, Chun, nang chun mihriem beiseina chu i sukbo a.

²⁰Ama chu kumkhuoin i hne a, ama chu a fê hmang ta a, A hmêlput chu i thleng a, i tir hmang ta a.

²¹A naupasalhai chu inzâumin an hung um a, ama chun a hriet naw a, Chun, siehnuoi an hung na, a hriet chuong bawk nawh.

²²Amiruokchu, a tisa chun a chunga chun natna a nei a, Chun, a lungril chu a sûnga chun ân rûm bawk a,” tiin.