Read Hmar JOB 15 Bible Online

JOB 15 - Hmar bible

JOB 15

¹Chun, Eliphaz Teman mi chun a dawn a, a hril ta a:

²“Mi var chun hrietna teplo meimeia inthawka dawnna siemin, A phîng chu sakthliin a suksip ding am a nih?

³Hohlimna hmangtlâk lo mei mei le chun amani, Annawleh, ṭawng, thil ṭha thawna thei si lohai le chun a hril ding am a nih?

⁴Anih, ṭitna chu i sie hmang ta a, Pathien hmaa ṭawngṭâina chu i suktlâwm a.

⁵I khawhlona chun i bau chu ân chûktir si a. Mi vervêkhai lei chu i thlang lem tah a nih.

⁶Kei ni lovin, nanga ṭawngbau ngei chun thiemnaw ân changtir che a, Anih, i hmûrhai ngei chun maw ân phur che a nih.

⁷“Nang chu mihriem laia pieng hmasa tak am i ni? Annawleh, tlânghai um hmain nang chu lâk suok i ni tâm a nih?

⁸Pathien thurâwn rûk chu i hriet ta hlak am a ni? Varna chu nangmaa chun i ip hlak am a ni?

⁹Kan hriet naw ieng am i hriet bîk a? Keinia umlo hi, ieng am i hriet bîk a?

¹⁰Ei kuoma hai hi lu inṭuok, mi upatak ve ve, I pa nêka nasataka upa ve ve an nih.

¹¹Pathien hnêmnahai che le, Thu i kuoma zainêmtaka hung thaw hi i ta dingin a chîn taluo a ni maw?

¹²Iengdinga i lungrilin a phur hmang che am a na? I mithai chu iengdinga a hung inlir el am a na?

¹³I lungril chu Pathien chungah în hertir a, Chuong ang thuhai chu i baua inthawka în suoktir el chu?

¹⁴Mihriem chu inthieng dingin ieng am a na? Nuhmei inei chun fel ni dingin ieng am a ni leh?

¹⁵Ngai ta, a mi inthienghai chunga chun ringna ân nghat naw a, Anih, a vânhai khawm chu a mithmua chun ân thieng naw a nih.

¹⁶Mî, khawhlona tui anga dâwntu chu, Tirdak a va umin a va pawrche zuol âwm de!

¹⁷Mi ngaithla la, hril ka ti che, Thil ka ihmu chu hril ka tih,

¹⁸Mi varhaiin an ihril, An pahaiin an kuoma an ip ngai naw;

¹⁹Chuong mihai kuoma chun ram chu pêk a na, Anni lai hmêlmak mi an fe ve nawh.

²⁰Mi rilo chu a nihai po poa chun nauhase tuorin a um a, Nêksâwrtuhai ta dinga kumhai nizât siekhâwla a um sûng chun.

²¹Inlâuna rihai chu a naa chun a châm a; A tluongtlung laiin suksetu chu a chungah hung tlung a tih.

²²Inthima inthawk chun hung kîr dingin ân ring naw a; Kâwlhnâm chu a nghâk zing a.

²³‘Khâwlai am a um a?’ tiin bu zawngin ân vâk ân vâk a; Inthimna ni chu a kuta chun ân zo zing a nih ti a hriet a.

²⁴Rimsikna le lungngainahai chun ama a sukṭi a; Lal indo dinga inzosa hieu angin ama chu an inhuol a,

²⁵Pathien chungah a kut ân let lei le, Iengkimthawthei chunga chapotaka a khawsak leiin.

²⁶Ama chunga chun kâwmâwtakin a tlân a, A phaw laipâwng sâtak le chun.

²⁷A thâuna chun a hmai chu ân khum leiin, A diemnêma chun thâu a seng a;

²⁸Khawpui râusanahai chun a um a, In, mi ihluo nâwnaa hai, Chuong hmunhnawk siekhâwm ni el dinghaia chun.

²⁹Hung hausa naw ni a, a thilneihai chu um zing bawk naw ni, An ra suokhai chu hnuoiah kûr thla bawk naw ni.

³⁰Inthima inthawk chun fe suok naw ni a, A kauhai chu mei chun hung sukṭâwl a ta, A baua thuok chun ama chu fe hmang a tih.

³¹Ama inhlêmin, teplo mei mei chu ring naw raw se, Teplo chu ama thungna ding a ni si a.

³²A hun tling hmain sukbikim nîng a ta, A kau chu hring naw ni.

³³Grêphrui angin grêp ra hmin naw chu thin thlâng a ta, Oliv thing angin a pâr chu sukṭil a tih.

³⁴Pathien ngaisak naw pâwl chu an hrût ding a ni si a, Thamrûkna puon inhai chu meiin kâng hmang a tih.

³⁵Pawitâwkna chu an vawn a, khawhlona chu an nei hlak a, An phîng chun hlêmna a buotsai hlak,” tiin.