Read Hmar JOB 16 Bible Online

JOB 16 - Hmar bible

JOB 16

¹Chun, Job chun a dawn a, a hril ta a,

²“Chuong thilhai tamtak chu ka hriet ta a, Thlamuongtu nghawkum in ni vawng a nih.

³Teplo thuhai chun tâwp an nei ding am a nih? Annawleh, dawn dingin iengin am a suktho che a?

⁴Ka nina hi in nina ni sienla chu, In ṭawng ang bawkin ka ṭawng thei a, In chungah thuhai ka zawmkhâwm thei a, In chungah ka lu ka thin el thei a nih.

⁵Amiruokchu, ka bauin sukhrât ka ti cheu a, Ka hmûrhaia hnêmna chun i lungngaina chu suknêp a tih.

⁶“Thu ka hrila chu ka lungngaina chu suknêp a ni naw a, Ka tuor fan fana chu, ieng am ka sâwldam chuong a?

⁷Amiruokchu, tuhin a mi sukrimsitu hin, Ka ruolhai po po chu i mîn pâwlsertir zo an ta hi.

⁸Keima chu inchuornain i mi suksip a, Chu chu ka chunga hrietpuinahai chu an nih, Chun, ka derdêpna chu ka chungah a tho a, Ka hmaisan ngeiah a mi kâwk a.

⁹A lunginsenin a mi kei nâwi a, a mi hrem ta a; Ka chunga chun a ha a mi râwt khum a, Ka hmêlma chun ka chungah a mitsîr a sukngei a.

¹⁰Ka chungah an bau an mi kâk khum a; Hmusittakin ka biengah an mi ben a; Ka chunga chun anni chu an pungkhâwm a.

¹¹Pathien chun Pathien ngaisak nawhai kuoma chun a mi pêk suok a, Mi rilohai kutahai chun a mi pei lût ta a.

¹²Sâwldamin ka um a, ama chun a mi kei nâwi neng a, Anih, ka rîngah a mi man a, innâwi nengin a mi pei ta a. Ama inchikna dinga chun a mi sie ta bawk a.

¹³A thalkâptuhai chun ka vêlin an mîn huol a, Ka kalhai chu a sukkawi a, a hla hrim hrim naw a, Ka mît chu hnuoi chungah a bunthlâk a.

¹⁴A hlawp hlawpin a mi kei nâwi a, Mi hrât angin ka chunga chun a mi chîl thlûk ta a.

¹⁵Ka vun chunga dingin saiip puon ka ṭhui a, Ka ki chu pilvutah ka sukbal ta a.

¹⁶Ka hmai chu ṭapnain a hung sen a, Ka mitreiahai chun thina hlim chu a um a;

¹⁷Ka kutahai chun inrawmna a um naw a, Ka ṭawngṭaina chu ân thieng a.

¹⁸“Aw leihnuoi, ka thisen chu inkhum naw la, Ka ṭapna chun châwlhmun nei naw raw se.

¹⁹Ngai ta, tu khawm hin ka hrietpuina chu vânah a um a, Ka ta dinga hre zingtu chu chungtieng a um a nih.

²⁰Ka ruolhai chun an mi nuisan a; Nisienlakhawm, ka mit chun Pathien kuoma chun mitthli ân sûr a nih.

²¹Ama chun mihriem nau thuneina chu Pathien kuomah ṭan ta ve sien chu aw! Miin a vênghai a ṭan ang chun.

²²Kum tlâwmte a hung ni pha chun, Lampui ka kîr nâwk nawna dinga chun ka fe âwm si a.