Read Hmar JOB 18 Bible Online

JOB 18 - Hmar bible

JOB 18

¹Chun, Bildad Suhi mi chun a dawn a, a hril ta a,

²“Thuhaia hin ieng chen am remchâng chu în dap ding a na? Ngaituo la, chu hnunga chun thu hril kan tih.

³Iengdinga ramsahai anga ngaia kan um a, I mithmua hin thieng lo hung ni am kan ni a?

⁴Nang le nang i lunginsena insukpuokkhawi che hi; Hnuoi chu nangma ta dingin mâksan a ni ding am a nih? Annawleh, lungpui chu a hmuna inthawka sawn hmang a ni ding am a nih?

⁵Anih, mi rilohai varna chu sukthim ni ngei a ta, A meisi khawm chu de ta naw nih.

⁶A puon ina var chu inthim a ta, A khâwnvar chu ama chunga chun herhlum nîng a tih.

⁷Chun, a hrâtna kalchawihai chu suktâwi nîng a ta. Ama thurâwn ngei chun ama chu pei thlâng a tih.

⁸Ama kehai ngei chun lêna chun a âwk a; Châng chunga chun a fe si a.

⁹Châng ngul chun a kerîngah man a ta, Châng chun ama chu âwk a tih.

¹⁰A val chu ama ta ding chun hnuoia thup a na, A châng chu ama ta ding chun lampuia chun kam a nih.

¹¹Kil tina chun ṭitumnahai chun ama sukṭîng a ta. A kekhawnghai sir peiin hnawt a tih.

¹²A hrâtna chu ṭâmsâwl a ta; A sîra chun sietna chu inzosa zing a tih.

¹³A taksa pênghai chu fa zo vawng a ta, Anih, thina nau lutîr chun a pênghai chu fa zo vawng a tih.

¹⁴A ringpui puon ina inthawk chun phawi suok nîng a ta, Ṭitumnahai lal kuoma chun hung ṭhuoi ni bawk a tih.

¹⁵A puon ina chun ama mi ni ngai hlek lo chu chêng a ta, A chêngna hmuna chun meitâwklunghai thêdarin um a tih.

¹⁶A hnuoi tiengah a zunghai chu ṭâwl a ta, A chungtieng chun a kau chu vuoi bawk a tih.

¹⁷Ama hriet zingna chu hnuoi chunga inthawkin bohmang a ta, Kawtthlêra khawm chun hming hrim nei naw ni.

¹⁸Vara inthawkin inthimah hnawt hmang nîng a ta, Khawvêla inthawka hnawt suok ni bawk a tih.

¹⁹Naupasal amanih, tupa amani khawm a mihai lai chun nei naw ni a, A înzinnaahai khawm chun iengkhawm nei naw bawk a tih.

²⁰Ama hnunga hung umhai chun a dam sûng chu mak hung tîng an ta, A hmaa mihai chu sukṭita an lo um ta ang el khan.

²¹Matheilovin, mi fel lohai chêngna chu chuong ang chu a ni hlak a, Pathien hre naw mi umna hmun chu hieng ang hi a ni hlak,” tiin.