Read Hmar JOB 19 Bible Online

JOB 19 - Hmar bible

JOB 19

¹Chun, Job chun a dawn a, a hril ta a:

²“Ieng chen am ka thla chu in suklâuin, Thuhai chun in mi suknâwi ding a na?

³Hieng vawi sâwm rau hi in mi kâwk ta a, Ngartaka in mi thaw hi in inzak naw a ni hi.

⁴Ka lo suksuol ta ngei a ni chun, Ka suksuolna chu keimaa chun um zing el a ta.

⁵Keia chunga nangni inchawimawi in ni a, Ka demumna keia chunga zawng suok in ni chun,

⁶Pathien chun ka chungthuah tuhin a mi pei thlâk ta a, A lên chun a mîn khum tah ti hre ro.

⁷Ngai ta u, ‘Pâwngnêkna,’ tiin ka khêk a, Nisienlakhawm, ngaiin ka um naw a; Ṭhangpuina dingin ka khêk a, nisienlakhawm, rorêlna dik a um si naw a.

⁸Ka suok thei nawna dingin ka lampui chu ân huon a, Ka lampuiahai chun inthimna chu a sie tah a nih.

⁹Ka lua inthawk chun ka lallukhum chu la hmangin, Ka ropuina chu a mi hlîppêk ta a ni hi.

¹⁰Kil tina chun a mi hung suksiet a, chuongchun, kei chu ka fe liem ta a; Ka beiseina khawm chu thing ang elin a lâk hmang ta a.

¹¹A lunginsenna chu ka chungah a sukchawk a, A hmêlma pakhat ang chun a mi ngai ta a.

¹²A sipaihai chu an hung khâwm a, keima tieng lampui an hung siem a, Ka puon in vêlin ṭhanghmun an khuor a.

¹³Ka unauhai chu keimaa inthawka hlatakah a sie a, Ka hmêlhriethai hlak chu keia chungah an inthuruol a.

¹⁴Ka laibunghai hlakin an mi nghatsan a, Ka ruol pâwlngeihai hlakin an mi theinghil ta bawk a.

¹⁵Ka ina mikhuolhaiin an mi theinghil a, ka siehlawnuhai hlakin ram dang mi angin an mi ngai a,

¹⁶Ka siehlaw chu ka ko a, a mi dawn hrim hrim naw a, Ama chu bauṭhaa ka ngên a lo ṭûl ta lem a.

¹⁷Ka thuok chu ka nuhmei kuoma chun mak a lo ni ta a, Ka nu rîla rahai ngei kuoma ka hnina khawm chu nghawkum a lo ni ta a.

¹⁸Naupanghai khawm chun an mi hmusit a, Ka tho leh, ka chungah an mi sawisêl a.

¹⁹Ka ruol bulhai po po hlak chun an mi pâwlser a, Ka hmangai takhai khawm chu ka chungah an hel a.

²⁰Ka vun le ka tisa hi ka rua chun a kawp ringawt a, Ka hahai vun ruok chu ka la chang a.

²¹Aw nangni ka ruolhai, mi lunginsiet ro, mi lunginsiet ro, Pathien kut chun a mi hung tâwk ta si a.

²²Pathien ang el chun iengdinga in mi hrem a, Ka tisaa hin lungawi tâwk lo am in ni a?

²³“Aw ka thuhai hi tuhin ziekin um sien, Aw, lekhabua chun ziek tlatin um hai sien chu aw!

²⁴Thîr le suon kawlawm chun ziekin um sien, Lungpuia chun kumkhuoa dingin kerin um hai sien chu!

²⁵Amiruokchu, ka tlantu chu a hring a nih ti ka hriet a, A tâwpa chun hnuoi chunga hin la ngîr ngei a tih.

²⁶Chuong anga ka vun chena sukbohmang a ni hnung khawm chun, Ka taksa ngei chun Pathien chu la hmûng ka tih.

²⁷Ama chu ka ta ding ngeiin hmu tâng ka ta, Ka mithai chun en a ta, mi dang chu en naw ni. Ka lungril chu ka sûnga chun ân tuiral a.

²⁸‘Iengtin am ama chu sukrimsîng ei ti aw! Amaa chun hi thil zung hi hmusuok a nih,’ in ti chun,

²⁹Kâwlhnâm chu ṭi ro. Lunginsenna chun kâwlhnâma hremnahai chu a hung lâk suok hlak si a; Rorêlna chu a um ti in hriet theina dingin,” tiin.