Read Hmar JOB 2 Bible Online

JOB 2 - Hmar bible

JOB 2

¹Ni khat chu Pathien naupahai chu LALPA hmaa an hung inlangna ni a um nâwk a, Setan khawm chu anni laia LALPA hmaa inlang dingin a hung ve a.

²LALPA chun Setan kuoma chun, “Nang khâwtienga inthawka hung am i na?” a ta. Setan chun LALPA chu a dawn a, “Hnuoia kân vâk vêlnaa le chutaka a suk a tunga inlawnnaa inthawkin,” a ta.

³LALPA chun Setan kuoma chun, “Ka siehlaw Job hi i ngaituo hlak am? Hnuoi chunga hin ama anga mi fel le mi tluong, Pathien ṭi mi le suol nghatsan mi an um si naw a; a san nei loa ama sukbohmang dinga a chungah i mîn chângtir khawma ama chun a ringumna chu a chel det tlat a nih,” a ti a.

⁴Setan chun LALPA chu a dawn a, “Vun aiah vun; anih, miin a thil nei po po chu a hringna dingin a pêk phal âwm hrim a nih.

⁵Tuhin i kut inlet la, a ru le taksa chu tâwk la, i hmâisanah hrilse ngei ngei a ti che,” a ta.

⁶LALPA chun Setan kuomah, “Ngai ta, ama chu i kuta um a nih annâwm; a hringna chau chu hla la,” a ta.

⁷Chuongchun, Setan chu LALPA hmâihmaa inthawk chun a fe suok ta a, Job chu a kephaa inthawka a lusîp chenin khuoihli pânnain a hrem ta a.

⁸Ama chun ama le ama ân huotna dingin bekawihâr a lâk a; vut lai chun a ṭhung ta a.

⁹Chun, a nuhmei chun a kuomah, “I ringumna chu i la chel det tlat el a ni maw? Pathien chu hrilse la, thi el rawh,” a ta.

¹⁰Nisienlakhawm, ama chun a kuomah, “Nuhmei invêt thuhril angin thu i hril a nih. Pathien kuta inthawka thil ṭha ei hmu chun, thil ṭha naw khawm ei hmu naw ding am a nih?” a ta. Hieng thilhai po poa khawm hin Job chun a hmûrhai khawmin thil a suksuol naw a.

¹¹Chuongchun, Job ruol pathum hai chun ama chunga thil ṭha naw tlunghai po po chu an lo hriet chun, an hmun senga inthawk chun an rêngin an hung seng a; Eliphaz Teman mi le, Bildad Suhi mi le Zophar Naamath mi an nih; ama chu thlamuon ding le tuorpui dinga hung dingin hun rem an ruot tlâng a.

¹²Chuongchun, râl hlataka inthawka an mithai an hei inlên chun, ama chu an hriet naw a, an khêk rak rak a, an ṭap tâwl ta a; an puonhai chu an keithlêr tâwl a, pilvut vânvawrin an luhai an inthêkhum a.

¹³Chuongchun, ama kuoma chun hnuoi chungah ni sari le zân sari an ṭhung a, a tu khawm chun a kuomah iengkhawm an hril naw a; a lungngaina chu a nasa êm êm a nih ti an hmu si a.