Read Hmar JOB 20 Bible Online

JOB 20 - Hmar bible

JOB 20

¹Chun, Zophar Naamath mi chun a dawn a, a hril ta a.

²“Chuleiin, ka ngaituonahai chun dawnna a mi pêk a nih, Keimaa inhmâwnatak um lei ngei chun.

³Kâwkna mi sukzaktak el chu ka lo hriet ta a, Ka hrietthiemna thlarau chun a mi hung dawn tah a nih.

⁴Tienlaia hi thil hi i hriet naw a ni maw, Mihriem chu hnuoi chunga sie a nia inthawk tah,

⁵Mi rilohai hnêna chu a tâwi hlak a, Pathien ngaisak lohai hlimna khawm chu mitkhapkâr chau a ni hlak ti hi?

⁶A ṭhatna chu vân tawngin intieng sienla khawm, A lu chun sûmhai tawng sienla khawm,

⁷Ama êk ang el chun la hung bohmang ngei a ta, Ama lo hmu hlaktuhai chun, ‘Khâwlai am a um ta a?’ tîng an tih.

⁸Mang ang elin vuong hmang a ta, hmu ruol ni ta naw ni, Anih, Zâna mitthlaa thilhmuhai ang el chun hnawt hmang ni tâng a tih.

⁹Mit ama lo hmu ta hlak khawm chun hmu ta naw ni a, Ama hmun khawm chun hmu ta ngai hrim hrim naw ni.

¹⁰A thlahai chun mi rimsihai ditsakna chu zawng tâng an ta, A kuthai chun a hausakna chu pe kîr tâng a tih.

¹¹A ruhai chu a tleirâwlnaa sip a na, Nisienlakhawm, ama leh pilvuta chun zâl tâng a tih.

¹²“Rîtlona chu a bauah thlum sien khawm, A lei hnuoia chun thup hlak sienla khawm;

¹³Hla zingin, insuoktir hlek lovin, A bau sûnga chun kawl zing ta sienla khawm;

¹⁴A bu chu a rîlhai sûnga chun la hung inlet a ta, A sûnga chun rûl tûr hung ning a tih.

¹⁵Hausaknahai chu a dawl ta a, hung luok suok nâwk a tih, Pathien chun a phîng sûnga inthawkin hung pei suok a tih.

¹⁶Rûl tûr chu fâwp a ta, Rûlriel tûrin ama chu sukhlum a tih.

¹⁷Vadunghai chu en ta ngai naw ni a, Nênetui khal le khuoizu tui luonghai chu.

¹⁸A sininrimna bêk bêk, ra chu pe kîr a ta, lem thla el naw ni, Thil a nei ang hu peiah ama chu hlim naw ni.

¹⁹Mi rimsihai chu a nghatsanin, a nêksâwr a, In dâm chu a pâwng lâk a, a ibâwl naw khawm,

²⁰A duâmna chun to ṭawk ṭawk hrim a hriet naw leiin, A lâwmna tak thil chu hmu bawk naw nih.

²¹A fâk zo naw dinga hla hrim thil a um naw a, Chuleiin, a hausakna chun dai sâwt naw nih.

²²A hau tâwk zet huna chun inrêkin um a ta, Mi rimsihai kut chu a chungah hung tlung a tih.

²³A phîng chu suksip ding a ni phingleh, Pathien chun a lungsen ṭiumna chu a chungah buok a ta, A fâk lai chun a chungah a sûrin sûr a tih.

²⁴Thîr hriemhreia inthawkin tlânsieng a ta, Dârsen thalngul chun ama kâp thleng a tih.

²⁵A hnûk dawk a, a taksaa inthawk chun a hung suok a; Anih, a hmawrzum tlê chu a mîtkhaa inthawkin a hung suok a, Ṭitumhai chu ama chunga chun a um a nih.

²⁶Inthimna po po chu a rohai dingin siekhâwl a na; Mei, mihriem isêm lovin kâng hmang a ta; A puon ina mâksan a la mahla khawm chu kâng hmang a tih.

²⁷Vânhai chun a suolnahai chu suklang a ta, Hnuoi chun ama chunga chun do a tih.

²⁸A in hlâwkna chun ama mâksan a ta, A lunginsen nia chun a thuomhnawhai chu luong hmang a tih.

²⁹Hi hi Pathiena inthawka mi rilo chan chu a nih, Pathienin a rochan dinga a ruotpêk chu,” tiin.