Read Hmar JOB 23 Bible Online

JOB 23 - Hmar bible

JOB 23

¹Chun, Job chun a dawn a, a hril ta a,

²“Vawisûn ngei khawm hin ka chierna chu a kha a nih. Kân rûm zing khawmin a kut chu a rik hle a.

³Aw, ama chu ka hmusuok theina hmun chu hre lang chu, A ṭhungphaa ngei chun ka fe thei ding bah!

⁴A hmaa chun ka chungthu chu intlun ka ta, Ka bau chu insêlnain suksip ka tih.

⁵Thu a mi dawnnahai chu hrieng ka ta, Keia kuoma a hrilhai khawm chu hrethiem ka tih.

⁶A thilthawtheina ropui le chun a mi kal ding am a nih? Kal lo e, kei chu mi ngaisak lem a tih.

⁷Chutaka chun mi tluong chun ama le chun ngaituo thei an ta, Chuongchun, ka rorêltua inthawkin kumkhuoin suok tâng ka tih.

⁸Ngai ta u, hmatieng ka fe a, nisienlakhawm, chutaka chun ama a um naw a. Chun, hnungtieng ka fe a, nisienlakhawm, ama ka hmu thei si naw a.

⁹Vawitiengah, sin a thaw lai chun, nisienlakhawm, ama ka hmu thei si nawh, Changtienga chun ama chu a lo inbi zing a, ka hmu thei naw a nih.

¹⁰Amiruokchu, ama chun lampui ka hraw chu a hriet a, Amain a mi fie pha chun, rângkachak angin hung suok ka tih.

¹¹Ka ke chun a kehnunghai chu a zui tlat a, A lampui chu ka zui a, ka fe pêt ngai nawh.

¹²A hmûrhaia inthawka thupêkhaia inthawk chun ka fe pêt ngai naw a, Ka fâk ding pawimaw nêka nasa lemin a baua thuhai chu ka sie khâwl lem a.

¹³Nisienlakhawm, ama chu ngaituona thleng lo a na, tuin am ama chu herhmang thei a ta? A lungrilin a nuomtak chu, chu ngei chu a thaw hlak.

¹⁴Thil keia ta dinga ruothai chu a thaw si a, Chuong ang thil tamtak chu ama kuomah a um a nih.

¹⁵Chuleiin, a hmaihmaa chun ka buoi hlak a; Ka ngaituo châng chun, ama chu ka ṭi hlak.

¹⁶Pathien chun ka lungril chu a sukchâuin, Iengkimthawthei chun a mi sukbuoi hlak.

¹⁷Inthimna chun a mîn huolvêl a, Inthim sâmup chun ka hmai ân khum si a.