Read Hmar JOB 24 Bible Online

JOB 24 - Hmar bible

JOB 24

¹“Iengkimthawthei chun iengdinga rorêlna hunhai chu a ruot naw am a na? Iengdinga ama hretuhai chun a nihai chu an hmu naw am a na?

²Mihaiin ramrihai an sawn hmang a, Berâm ruolhai chu an pâwng lâk a, an châwm a.

³Fahra sabengtung chu an khal hmang a, Hmeithai bâwngchal chu bat aiah an lâkpêk bawk a.

⁴Mi tlasam chu lampuia inthawkin an hnawt hmang a, Hnuoia mi rimsihai chu an inbi hmunkhat tâwl a.

⁵Ngai ta u, thlalêra ram sabengtunghai angin, Fâk ding taimataka zawngin, an sinthaw ding chun an fe suok a; An nauhai ta ding chun thlalêr chun bu a pêk a.

⁶Mi tin chun an loa bu chu an sîk a, Mi rilohai grêp lâk mahla chu an sîk bawk a.

⁷Zânkhawvârin puon boin an zâl a, Deia chun inkhumna ding khawm an nei naw a.

⁸Tlânghai raw sûrahai chun an hu a, Inhumhimna ditin lungpui chu an bêl a.

⁹Naute pa nei lo chu nênea inthawkin an lâk hmang a, Mi rimsi naute chu bat aiin an lâkpêk a.

¹⁰Chuleiin, silfên tlasamin saruokin an invâk a, Buphalhai an put a, nisienlakhawm, an phîng a ṭâm zing a.

¹¹An in huon sûngah hriek an siem a, Uoin sâwrnahai chu an chîl a, nisienlakhawm, dangchâr an tuor a.

¹²Khawpuia inthawk chun thisâwnghai chu an inrûm a, Mi hliem hringna chu ṭhangpuina ngênin a khêk suok a. Amiruokchu, Pathien chun an ngênna chu a bengkhawn nawh.

¹³Var chunga helhai chu an um a, Chutaka lampui chu an hriet naw a, Chutaka lampuihaia chun an chêng bawk nawh.

¹⁴Tuolthattu chu vârṭiena thoin, mi tlasam le pasie chu a that a; Zân huna chun inru ang a nih.

¹⁵Uiretu mit khawm chun zân thim chu a nghâk a, ‘Mitin mi hmu naw ni,’ tiin: Chuongchun, a hmêl chu a sukdanglam ta a.

¹⁶Inthima chun inhai chu an chotlang a, Sûn hun sûnga chun an inkhârkhum a; Var hrim an hriet nawh.

¹⁷Zîngkâr chu an rênga ta ding chun thîna hlim ang a na, Thina hlim ṭitumnahai chu an nêl si a.

¹⁸Tuihai chungzâwla hrâttaka lên an na; An chan chu hnuoia chun ṭawngseinphur a na, Grêp huonhai lampui tieng chun a fe naw a.

¹⁹Lum le sa chun vûr tuihai chu a lâk hmang a, Chuong ang bawk chun thil suksuoltuhai chu Seol chun a thaw a nih.

²⁰Sul chun ama chu theinghil a ta, nge chun inhniktakin ama fâng a tih, Ama chu hriet zing khawm ni ta naw nih; Chun, fel nawna chu thing anga sukthliek ni bawk a tih.

²¹Ra insuo ngailo, ching chu a fâk zo a, Hmeithai kuoma chun thil ṭha a thaw ngai nawh.

²²Pathien chun a thilthawtheina chun mi hrât chu a nun a suksei a, Mi tukhawma hring an ring ta naw khawm chu a keitho hlak.

²³Hima um dingin Pathien chun anni a pêk a, chutaka chun an sâwldam hlak, Chun, a mithai khawm chu an lampuihaia chun a um zing hlak.

²⁴Chawimawiin an um a, sâwtnawtê sûng chu, chun, an fe liem hlak a, Anih, siehnuoiin an um a, mi danghai ang bawka lampuia inthawka lâk suokin an um hlak a, Chun, buvui hmawrhai anga ât thlâkin an um hlak.

²⁵Chuong chu a ni naw chun tuin am khêlhlipah mi sie thei an ta? Ka ṭawng khawm chu hlutna nei hlek loah tuin am mi sie thei a ta?” tiin.