Read Hmar JOB 27 Bible Online

JOB 27 - Hmar bible

JOB 27

¹Chun, Job chun a thuhril chu a zawm nâwk a, a hril ta a.

²“Pathien, ka thiemna thu la hmangtu, Iengkimthawthei, ka lungril sukrimsitu chu a hring zing angin,

³Ka hringna chu keimaa a um sûng phawt le, Pathien thuok chu ka hnarkuohaia a um sûng phawt chun,

⁴Ka hmûrhai chun fel nawna thu hril dêr naw ni a, Ka lei hin hlêmna thu sâksuok bawk naw ni.

⁵Nangni thiem kân changtir ding cheu hi Pathien chun a khap a nih; Ka thi hmakhat chun ka lungril tluongna hi keimaa inthawkin sie hmang naw ning.

⁶Ka felna chu dêttakin ka chel a, inthla naw ning, Ka dam sûngin ka lungril chun mi sawisêl bawk naw nih.

⁷Ka hmêlma chu mi rilo ang hung ni sienla, Keima chunga kaltu chu mi fello ang hung ni raw se.

⁸Pathien ngaisak naw mi chun hlâwkna insiem fâwm hlak sien khawm, Pathienin a thlarau a lâkpêk pha chun ieng am beisei ding a nei leh?

⁹Pathien chun a khêkri chu a ngai ding am a ni, A chunga buoina a hung tlung pha chun?

¹⁰Iengkimthawtheia chun ama chu lungawiin, Pathien chu ieng lai khawmin a ko ding am a nih?

¹¹Pathien kut chungthua hin inchûktir ka ti cheu, Iengkimthawthei thiltum chu ip naw ningah.

¹²Ngai ta u, in rêngin in hmu seng ta a; Anleh, iengdinga teplo mei mei in ni vawng el am a na?

¹³“Hi hi Pathiena mi rilo chan chu a nih; Nêksâwrtuhai rochan, Iengkimthawtheia inthawka an hmu chu.

¹⁴A thlahai an hung pung chun, kâwlhnâm ta ding el an nih; A chithlahai chun khawp tâwk bu nei naw ni hai.

¹⁵Ama hnunga la damhai chu thinaa phûm ning an ta, A nuhmei thisanhai (hmeithaihai) khawm chun sûnna siem naw ni hai.

¹⁶Tangka chu pilvut ang elin siekhâwl sien khawm, Silfên chu pilpawk ang elin siem sien khawm;

¹⁷Buotsai chu buotsai thei a tih, amiruokchu, mi fel chun sil a tih, A tangka khawm chu mi pawitâwk lo chun semdar bawk a tih.

¹⁸A in chu aium angin a bâwl a. Vêngtuin a sâwlbûk a bâwl ang elin.

¹⁹Mi hausa zâlin a zâl a, amiruokchu, chuong chu ni sawng naw ni, A mithai a hang meng a, a hausakna chu a um ta naw a.

²⁰Tuilien ang elin ṭitnahai chun ama a lâk hmang ta a, Zân kâr chun thlipui chun ama ân rûk hmang ta a.

²¹Sak thli chun ama chu a lên hmang a, a fe hmang ta a; A hmuna inthawk chun a mût hmang ta a.

²²Pathien chun ama chu pei thlâng a ta, hla naw ni, A kuta inthawkin thinthla hmang a tih.

²³Mihai chun ama chu kut benkhum an ta, A hmuna inthawk chun ama chu hnawt dawk an tih.[10]