Read Hmar JOB 28 Bible Online

JOB 28 - Hmar bible

JOB 28

¹“Tangkaruo ta ding chun chosuokna hmun chu a um ngei a nih, Rângkachak ta dinga sukthiengna hmun leh.

²Thîr chu leihnuoia inthawka lâk suok a na, Dârsen ruok chu lunga inthawka emtuia lâk suok a nih.

³Mihriemin inthimna a suktâwp a, Thina hlim le inthimna lung sâmuphai chu, A hmun hlatakahai chun a zawng suok hlak.

⁴A ram hluotuhai um nawnaa chun khur an cho a, A chunga fehai chun an theinghil a; Mi hlatnaah an inkhai a, an inthên an inthên a.

⁵Hnuoi ruok chu amaa inthawk chun bei a hung suok a, A hnuoitieng chu, inlet chun chu mei ang el a nih.

⁶Chutaka lunghai chu Sapphir lung hmun dâm a na, Rângkachak hlawmhai chu a um a nih.

⁷Chu lampui chu chunglêng vate sa fami chun a hriet naw a, Mulukawlhai mit khawm chun a hmu ngai nawh.

⁸Ramsa chapotakhai khawm chun an sir ngai naw a, Sakeibaknei ṭiumtak khawm chun a hraw ngai nawh.

⁹“A kut chu lungpui changtak chunga chun a sie suok a, Tlânghai chu a bula inthawkin a kei let a.

¹⁰Lungpuihai lai chun tuiluongnahai a cho a, A mithai chun thil hlutak chu a hmu a.

¹¹An far nawna dingin tuihnârhai chu a ting a, Thil inthupa um chu varah a hung lâk suok ta a.

¹²Amiruokchu, khâwlai am varna chu hmu nîng a ta? Hrietthiemna hmun khawm chu khâwlai am a na?

¹³Mihriem chun chu man chu an hriet naw a, Mi hring rama khawm chu chu hmu suok a ni bawk nawh.

¹⁴Lipui chun, ‘Keimaah a um nawh,’ a ta, Tuipui chun, ‘Ka kuomah a um nawh,’ a ti bawk a.

¹⁵Rângkachaka nei thei a ni naw a, Chu chu man ding chun tangkaruo khawm bûk thei a ni bawk nawh.

¹⁶Ophir rângkachak le chun ngaihlut inang thei a ni naw a, Sapphir amanih, Berul lung hlutak le khawm chun hlut inanga ngai thei a ni nawh.

¹⁷Rângkachak le hlimen chun an tluk thei naw a, Chu chu thlengpui ding chu rângkachak inthiengtaka thleng thei khawm a ni bawk nawh.

¹⁸Tuikeplung amanih, krustal lung khawm chu a hrila hril ding a ni naw a, Anih, Varna man chu lunghlu chun tluk naw ni a,

¹⁹Ethiopia rama Topaz lunghlu chun tluk naw ni a, Rângkachak inthieng le khawm chun a hlut angkhata ngai ding a ni nawh.

²⁰Anleh, varna chu khâwtaka inthawka hung am a na? Hrietthiemna hmun chu khâwlai am ni tâng a ta?

²¹Mi hring po po mithmuhaia inthawka thupa umin, Chunga vatehai kâwla khawm thup a nih.

²²Bohmangna le Thina chun, ‘Chu chu thuthang chu kan nahaiin kan lo hriet a,’ an ta.

²³“Pathien chun chu lampui chu a hriet a, Chu chu hmun khawm chu a hriet a nih.

²⁴Ama chun kâwlkawdawnghai chu a hmu a, Vân khuphnuoi po po hi a hmu vawng a nih.

²⁵Thli hrâtnahai chu a pêk lai khan, Anih, tuihai chu inkhinain ân khi suok a nih.

²⁶Chu lai chun ruo ta ding chun bi a ruotpêkin, Vâninrûm, kâwlinlep ta ding khawma lampui a siempêk bawk a.

²⁷Chun, ama chun a hmu a, a puong ta a, A tungding a, anih, a zawng suok bawk a.

²⁸Chun, mihriem kuoma chun, ‘Ngai ta, Lalpa ṭi chu, varna a nih; Suola inthawka fe hmang chu hrietthiemna a ni bawk a,’ a ta,” tiin