Read Hmar JOB 29 Bible Online

JOB 29 - Hmar bible

JOB 29

¹Chun, Job chun a thuhril chu a zawm nâwk a, a hril ta a:

²“Aw thla hlui tahaia ang khan um la ni lang chu aw, Pathienin a mi vêng lai nihai anga khan;

³A khâwnvar ka lu chungah a var lai, A var ringa inthimna ka fe thleng lai khan;

⁴Ka vânglai nihaia ka um anga, Pathien thurâwn chu ka puon in chunga a um lai khan;

⁵Iengkimthawthei chu ka kuomah a um a, Ka nauhai khawm ka sirah an um lai khan;

⁶Ka kaiṭênhai chu nênetui khala sâwp a ni a, Lungpui chun hriek vadunghai chu a min suopêk hlak lai khan!

⁷“Khawpui dai kawtkhâra ka va fe suok a, Kawtthlêra chun ṭhunghmun ka rem chun,

⁸Tlangvâlhai chun an mi hmu a, an inbi a, Upahai khawm chu an tho a, an ngîr hlak a,

⁹Lalnauhai khawm chun an inbiek an ma a, An kuthai chun an bau chu an hup a;

¹⁰Mi ṭhahai râwlhai khawm chu a hung re a, An leihai chu an dang chungah a kawp ta a.

¹¹Nain a mi hriet chun, mal a mi sâwm hlak si a, Mit khawma a mi hmu chun, ka kuomah hrietpuina a pêk a;

¹²Mi rimsi khêk chu ka sansuokin, Fahra ama ṭhangpuitu ding neilo khawm chu ka sansuok hlak leiin,

¹³A malsâwmna bohmang ṭêp khawm chu ka kuomah a hungin, Hmeithai lungril chu hlima hlasak dingin kân umtir hlak.

¹⁴Felna chu ka sil a, chu chun a mi thuom a, Ka felna chu lalpuon le lukâwm ang a nih.

¹⁵Mitdel ta dingin mithai ka na, Kebâi ta dingin kehai ka nih.

¹⁶Tlasam ta dingin pa ka na, Chun, a chungthu ka hriet naw khawm chu ka zawng suok hlak.

¹⁷Mi fello ha chu ka sukthliek a, A sa fâk chu a haa inthawk chun ka lâk suok hlak.

¹⁸Chun, ‘Ka bua chun thîng ka ta, Ka nihai chu phaiphin zâtin sukpung ka tih,’ ka ti a.

¹⁹Ka zung chu tuihai chenin ân zâm a, Ka zâr chunga chun zânkhawvârin dâidaw chu a kûr bawk a.

²⁰Ka ropuina chu keimaa chun a thar a, Ka kuta chun ka thalngul chu siemtharin a um bawk a.

²¹“Ka kuomah miin na an sit a, an nghâk a, Ka thurâwn chu ngaiin an to hlak.

²²Ka thu hnungahai chun thu an hril nâwk ta ngai naw a, Ka ṭawng chu an chungah a tla a.

²³Ruo nghâk angin kei an mi nghâk a, Ruo nuhnung tieng nghâk angin an bau an ka lien a.

²⁴Anni kân nuipui a, an inring naw laiin, Ka hmêlput hlimum chu an pei thlâk chuong naw a.

²⁵An lampui ka thlang suok a, lal angin ka ṭhung a, Sipai laia lal tak angin ka khawsa a, Mi thlavaihai thlamuongtu ang elin.