Read Hmar JOB 3 Bible Online

JOB 3 - Hmar bible

JOB 3

¹Chu hnunga chun Job chun a bau a ka a, a pieng ni chu ṭawngsie ân phur ta a.

²Chun, Job chun a hril ta a:

³“Ni, ka piengna ni chu bohmang sienla, ‘Naupasal pâi a ni ie,’ titu zân le chun.

⁴Chu ni chu sukthimin um sienla, Chungtienga inthawkin Pathien khawmin ngaisak naw sienla; A chungah var khawm var bawk naw raw se.

⁵Inthimna le thina hlim chun anni ta ngeiah hau sienla, A chungah sûm zîng tlat raw se; Ni inthimna chun suklâu raw hai se.

⁶Chu zân chu inthim sâmupin man sienla, Chu kum sûng nihaia chun hlimna hrim hrim um naw sienla; Thla nizât tiemnaa khawm ṭhang ve naw raw se.

⁷Anih, chu zân chu zân dawkdâium ni sienla, Chu zâna chun hlim râwl hrim hrim um naw raw se.

⁸Ni ṭawngsie inphurtuhai chun ṭawngsie inphur raw se, Leviathan sukhar dân thiemhai chun.

⁹A sîkhawvar chu inthim sienla, Var zawng sienla, hmu bawk naw sienla; Zîngkâr khawfingchat khawm hmu bawk naw raw se.

¹⁰Ka nu sula kawtkhârhai chu a lo khâr naw a, Ka mithaia inthawkin buoina chu a thup naw bawk leiin.

¹¹Sula chun iengdinga ka lo thi naw am a na? Phîng sûnga inthawka ka hung suokin iengdinga thlarau chu lo inthla el naw am ka na?

¹²Khûphai chun iengdinga an mi lo dawm am a na? Nênehai chun ka nêk ding elin iengdinga an mi lo pawm am a na?

¹³Tuhin zâlin to riem riem tâng ka ta, in ka ta, Sâwldamin ka um ta ding bah:

¹⁴Hi hnuoia lalhai le rorêltuhai, Anni ta dinga hmun sehai siemtuhai le chun;

¹⁵Annawleh, lal nau rângkachak neituhai, An inhai tangkaruoa suksiptuhai le chun.

¹⁶Annawleh, pieng hun lova thupa um ang ka ni ta ding, Nautê, var hrim hrim hmu ngailohai ang hi.

¹⁷Chutaka chun mi rilo chun a sukbuoina chu ma tâng a ta, Chutaka chun rimsi chu sâwldam tâng a tih.

¹⁸Chutaka chun lung in intânghai chu um khâwm dingin an zalên a; Sin inthâwtirtu râwlri khawm an hriet ta ngai nawh.

¹⁹Mi lien le mi chîn khawm chutaka chun an um khâwm a; Siehlaw khawm chu a hotua inthawk inthla a ni tah.

²⁰Iengdinga mi, rimsitaka um kuoma chun var pêk a ni a, Lungrila rimsi tuor kuoma chun hringna pêk am a ni a?

²¹Thi inhâwk êm êma thi thei si lo a, Ro phûm zawng nêk hmana zawng nasa a,

²²Thlân chu a hmu suok thei pha a, Nasataka hlim êm êm ding kuoma chun?

²³Iengdinga mi, a lampui thupa um kuoma le, Pathienin paldâi ân huonkhum kuoma chun var pêk am a na?

²⁴Ka bufâk hmain ka thuokdawngna chu a hung tlung a, Kân rûmnahai chu tui anga bunthlâk an ni hlak si a.

²⁵Thil ka iṭi tak chu ka chungah a hung tlung hlak a, Ka înlâu tak chu ka kuomah a hung tlung hlak.

²⁶Inhawiin ka um naw a, ka to ṭawk ṭawk thei naw a, Sâwldam ka nei bawk naw a; buoina a hung tlung lem hlak,” tiin.