Read Hmar JOB 32 Bible Online

JOB 32 - Hmar bible

JOB 32

¹Chuongchun, hi mi pathum hai hin Job an dawnna chu an tâwp ta a, ama mithmua chun a fel tlat si leiin.

²Ram hnama mi Buz mi Barakel naupa Elihu lung chu a sen ta a; a lunginsenna chu Job chungah a nih a hung sat chu, ama le ama chu Pathien nêka thiem ân changtir tlat leiin.

³A ruolhai pathum chunga khawm a lunginsenna chu a hung sa bawk a, dawnna ding hmu suok si lovin, Job chu thiemnaw an inchangtir si leiin.

⁴Tuhin Elihu chun Job kuoma thuhril ding chu a nghâk a, ama nêka anni chu an upa lem leiin.

⁵Chun, Elihu chun chuong mi pathum hai baua inthawk chun dawnna hrim a um naw ti a hmu chun a lunginsenna chu a hung zuol ta a.

⁶Chun, Elihu Buz mi Barakel naupa chun a dawn a, a hril ta a: “Kei naupang ka na, nangni chu upatak in na; Chuleiin, kân sûm a, ka ngaidân chu in kuomah kân entir ngam naw cheu a nih.

⁷‘Nihai chun hung hril a ta, Kumhai tamna chun varna inchûktir naw nîm,’ ka lo ta.

⁸Amiruokchu, mihriema chun thlarau a um a, Iengkimthawthei chun a thuokin anni chu hrietthiemna a pêk lem a nih.

⁹Mi ropuihai chu an var chuong kher naw a, Mi upahai chun thudik chu an hrietthiem vawng kher bîk nawh.

¹⁰Chuleiin, ‘Kei mi ngai unla, Kei khawma ka ngaidân inhriettir ka tih’, ka ti a nih.

¹¹“Ngai ta u, in thuhai chu ka nghâk zing a, In thuhril sanhai ka lo ngai zing a, Ieng am hril ding tia in zawng sûng po khan.

¹²Anih, in kuomah ka um zing a. Chun, ngai ta u, nangni lai tukhawm Job thuhne hrim hrim in um dêr naw a. Annawleh, nangni lai a thuhai dawn thei hrim in um dêr naw a nih.

¹³‘Varna kan hmu suok tah, Mihriem ni lovin, Pathien chun a namhnuoi a nih’, ti hlau rawi in tih.

¹⁴A thuhai chu keima kal zâwngin ân kâwltir naw a, In thuhrilhai angin kei khawmin ama chu dawn bawk naw ning.

¹⁵Anni chun mak an ti ta a, an dawn ta hrim hrim naw a, Thu bau khat khawm hril ding hrim an nei ta naw a.

¹⁶Thu an hril ta naw leiin, An ngîr ṭawk ṭawk a, an dawn ta hrim hrim naw leiin, ka nghâk ding maw?

¹⁷Kei khawma ka chana chun dawn vêng ka ta, Kei khawma ka ngaidân chu inentir vêng ka tih.

¹⁸Thuhaiin ka sip si a; Ka sûnga thlarau hin a mi tirlui a nih.

¹⁹Ngai ta u, ka sûng chu uoin hu suokna nei lo ang chu a nih; Peng tharhai puokkawi ṭêp ding ang chu.

²⁰Ka sâwl a dam huoina dingin thu hril ka ta, Ka bau kain dawn ka tih.

²¹Ka hni cheu hi, mi tukhawm mi nina chu mîn zâtir naw unla, Mi tukhawm kuomah hming ṭha tehlêm chu pe bawk naw ning.

²²Inpâk tehlêm chu ka thiem si naw a, Chuong naw chun, kei mi Siemtu hin mi la hmang vak rawi a tih.