Read Hmar JOB 33 Bible Online

JOB 33 - Hmar bible

JOB 33

¹“Chuleiin, Job, ka ngên che hi, ka thuhril hi lo ngai la, Ka thuhai po po khawm lo ngai vawng ta.

²Tuhin ngai ta, ka bau chu ka ka a, Ka bau sûnga chun ka leiin thu a hril ta hi.

³Ka thuhai chun ka lungril tluongziehai chu hril suok a tih; Ka hmûrhaiin an thil hriet chu takinningtakin hril bawk an tih.

⁴Pathien Thlarau chun a mi siem a, Iengkimthawthei thuok chun hringna a mi pêk a.

⁵I thei chun chu kei mi dawn la, Ka hmaa hin i thuhai chu ân dawtin hung suklangin târ suok rawh.

⁶Ngai ta, nangma ang bawkin kei khawm Pathien tienga ṭhang ka na, Kei khawm pilpawka inthawka siem ka nih.

⁷Ngai ta, ka ṭitumna chun nang suklâu naw ni che a, I chungah ka hnengna che hi rik talaw bawk naw nih.

⁸“Matheilovin ka hrieta khawm i hril a, I thuhai ri chu hienga hrilin ka lo hriet ta bawk a,

⁹‘Bawsietna nei lovin kân thieng a nih, Pawitâwklo ka na, keimaa hin rîtlona hrim a um bawk nawh,

¹⁰Ngai ta, ka chungah remchâng hun hmuin, A hmêlmaah a mi ruot ta a.

¹¹Ka kehai chu kawl a mîn bun a, Ka lampuihai po po chu ân chik tlat bawk a,’ i ti a.

¹²Ngai ta, dawn ka ti che, hitaka hin în dik naw a nih; Pathien chu mihriem nêkin a ropui lem si a.

¹³Ama chunga chun iengdinga i hel am a na? Mihriem thu iengkhawm a dawn nawh tiin.

¹⁴Pathien chun vawi khat thu a hril a, Anih, vawi hni khawm, miin ngaisak naw hai sien khawm.

¹⁵Mangah, zâna mitthlaa thilhmua, Îmu indêntakin mihai chu a hung zêl pha a, Khum chunga îmu inhniktaka a in lai chun a hril a.

¹⁶Mihai nahai chu a hawngpêk a, Zillâwknahai chun anni a sukṭi hlak.

¹⁷Mihriem chu a thiltuma inthawka a lâk hmang theina ding le, Mihriema inthawka chapona chu a thup theina dingin;

¹⁸A thla chu khursûnga inthawka a lâk kîr theina dingin le, A hringna chu kâwlhnâma bohmangnaa inthawka a lâkkîr theina dingin.

¹⁹“A khum chunga chun natna khawma thunun a na, A ruhaia naa chip zingna leh.

²⁰Chuongchun, a hringna chun bei chu a theida a, A lungril chun sa a ten a.

²¹A taksa chu kâng hmangin a um a, hmu thei a ni nâwk ta naw a; A ruhai hmu thei lohai khawm chu a hung dâwk a.

²²Anih, a thlarau chun khursûng chu a hnai a; A hringna chun suksetuhai chu a hnai bawk a.

²³A kuoma chun vântirko um sienla, Palai, sâng khat laia pakhat chu, Mihriem kâwla ama ta dinga ân dik chu inentir dingin;

²⁴Ama chun a chunga chun zângaiin, ‘Khur sûnga fenaa inthawkin ama chu sanhim ro, Intlanna ka hmu suok ta a.

²⁵A tisa chu naupang tisa nêkin tharlâm lem sien, A tleirâwl lai nihaiah kîr nâwk raw se’ ti sienla,

²⁶Pathien kuoma chun ṭawngṭai sienla, ama chun lo dawn a tih, Chuongchun, a hmêl chu hlimin um a tih, Mi kuoma chun a felna chu a pêk kîr nâwk ding leiin.

²⁷Mihai hmaa chun hla sak tâng a ta; ‘Ka lo suksuol ta a, ân dik chu ka lo fe hmangsan ta a, Anachu a mi hung thung kher naw a:

²⁸Khursûng a fenaa inthawkin ka thlarau chu a sanhim a, Ka hringna chun var chu hmûng a tih,’ tiin.

²⁹“En ta, hieng po po hi Pathien chun a thaw a, Vawi hni, anih, vawi thum, mihriema chun a thaw a nih.

³⁰Khursûnga inthawka a thlarau chu hung ṭhuoi kîr ding le, Hringna vara chun ama chu sunvar a ni theina dingin.

³¹Inchik ṭha ta, aw Job, kei mi ngai ta, Lo to ṭawk ṭawk la, thu hril ka tih.

³²Iengkhawm hril ding i nei chun mi hung dawn la, Thu hril ta, nang chu thiem inchangtir che ka nuom si a,

³³Chuong a ni naw leh, kei mi ngai la, Lo to ṭawk ṭawk la, varna inchûktir ka ti che,” tiin.