Read Hmar JOB 37 Bible Online

JOB 37 - Hmar bible

JOB 37

¹“Hitaka khawm hin ka lungril chu ân thin a, A umna hmuna inthawk chun ân châwm a.

²A râwl ri chu ngai ta u, A baua inthawka ri suok le chun,

³Vân hnuoi po poa chun a tir suok a; A kâwlinlep chu hnuoi tâwpnahai chenin a tir suok bawk a.

⁴Chu hnunga chun râwl chu ân ri a, A ropuina râwl chun a hung sukri ta a; A râwl chu hriet a ni pha chun anni chu ân châwltir naw a.

⁵Pathien chun a râwlin nasatakin a sukri a; Thil ei hmu thei naw ropuitakhai chu a thaw a nih.

⁶Vûr kuoma chun, ‘Hnuoiah tla rawh,’ a ta; Chuong ang bawkin ruo mal kuoma le A ruo nasa sûrhai kuoma chun a ti bawk a.

⁷Mi tin kut chu a khârkhip a, Mi po pohai a siemhai chun an hriet theina dingin.

⁸Chun, ramsahai chu pûkahai chun an fe a, An kuoahai chun an um zing a.

⁹Simtieng pindana inthawk chun thlipui a hung a, Hmârtienga inthawkin phalbi a hung bawk a.

¹⁰Pathien thuok chun vûr inkhal chu a pêk a Tui lientakhai khawm an inkhal zo a.

¹¹Anih, sûm sâtak chu tuihuin a sukrik a, A kâwlinlep sûm chu a thedar ta a.

¹²Chun, a ṭhuoinain ân let vêl a, Thu a pêk taphawt an thaw theina dingin; Khawvêl hluo theia um chung po poa chun.

¹³A hnuoi ta dingin amanih, sukdikna lem dingin amanih, Annawleh, zângaina leiin amani a hungtir hlak a.

¹⁴“Aw Job, hi hi ngai ta, To veng vengin Pathien sinthaw maktakhai chu ngaituo ta.

¹⁵An chunga chun Pathien chun ieng angin am maw ân phurtirin, A sûm kâwlinlep chu ân vartir hlak ti i hriet am?

¹⁶Sûm rikziehai chu i hriet am, Hrietna famkima sip, sinthaw maktak el chu?

¹⁷Sim thli leia hnuoi chu a um ṭawk ṭawk laiin, Iengtin am i silfênhai chu suklumin a um a, ti i hriet am?

¹⁸Ama ang chun vân khi keiphar thei i ti, Dârthlalang sungta anga ngar khi?

¹⁹Ama kuoma chun ieng am kan hril ding mîn chûktir la, Inthimna leiin kan thuhril chu kan sukrem thei si naw a.

²⁰Thu ka hril ding a nih ti chu ama hril a ni ding am a nih? Annawleh, mi chun lem zoa um chu a nuom am a nih?

²¹Tuhin mihai chun vânhaia var chu an hmu naw a nih; Amiruokchu, thli a hrâng a, anni chu a sukthiel hlak.

²²Hmârtienga inthawkin rângkachak ropuina chu a hung a; Pathien chu ropuina ṭiumtakin ân thuom a.

²³Iengkimthawthei chu ei hmu suok thei nawh, Thilthawtheina le indiknaah a ropui a, Felna a hau a, nêksâwr naw nih.

²⁴Chuleiin, mihai chun ama chu an ṭi a, Lungrila vara inngaihai khawm chu a pawisa chuong nawh,” tiin.