Read Hmar JOB 39 Bible Online

JOB 39 - Hmar bible

JOB 39

¹“Râwla sakêl chun ieng hun laiin am tê a nei ti i hriet am? Sazuk chun tê a nei lai în chik thei am?

²Thla iengzât am an pai ti i tiem thei am? Annawleh, ieng hun laiin am tê an nei ti i hriet am?

³Anni chu an bawk a, an tê chu an hung nei a, An lungngainahai chu an pei suok ta a.

⁴An têhai chu ditumtakin an um a, phûl âwla chun an hung inṭhang lien ta a, An fe suok a, an puihai kuomah an hung kîr nâwk ta naw a.

⁵Ram sabengtung chu tuin am zalênin ân suoktir a? Annawleh, ram sabengtung thlungna hruihai chu tuin am a sût a?

⁶Chu in ding chun thlalêr ka siem a, A umna dingin chi ram leh.

⁷Khawpui risie chu a hmusit a, Khaltuhai khêk rihai chu a hriet ngai bawk nawh.

⁸Tlâng dunghai chu a bu petna hmun a na, Thil hring taphawt chu a zawng hlak.

⁹“Ramsiel chu nangma rawng bâwl dingin a lungawi ding am a nih? Annawleh, i ran ina chun a chêng ding am a nih?

¹⁰Ramsiel chu a khitna hrui chun ruoma chun i thlung thei ding am a nih? Annawleh, nanga hnunga chun ruomhai chu a chawkruol ding am a nih?

¹¹A hrâtna chu a nasa leiin, ama chu i ring ding maw? Annawleh, ama kuoma chun i sininrimna chu în nghat ding am a nih?

¹²I chihai chu inah ama chun hung lâng a ta, I hrizâwl bu chu ama chun hung la khâwm a tih tiin ama chu i ring ngam chie am a nih?

¹³Ostrik thlahai chu chapotakin an khâwng a, Nisienlakhawm, hmangaina thla le hmulhai an ni am a nih?

¹⁴A tuihai chu hnuoia chun a mâksan a, Pilvuta chun a suklum si a.

¹⁵Kein sir kawi rawi a tih ti amanih, Annawleh, ramsa chun sir rawi a tih ti chu a ngaituo nawh.

¹⁶A têhai chunga chun a kâwmaw a, ama tê naw ang elin, A sininrimna chu a thlâwn el a ni ding chu a ṭi nawh.

¹⁷Pathien chun ama chu varna chu theinghil dinga siemin, A kuoma chun hrietthiemna a lo pêk bawk naw leiin.

¹⁸Chungtienga ama chu ân lêng sâng pha chun, Sakawr le a chunga chuong chu a hmusit a.

¹⁹“Sakawr chu a hrâtna nangin i pêk am a nih? A rîng chu thahrui chun în thuom bawk am a nih?

²⁰Ama chu khâuṭhikṭhi anga inchâwm thei dingin i siem am a nih? A hnârkhâwng dut dut ṭiumzie dâm hi?

²¹Ruoma chun ân châwm a, a hrâtnaa chun a hlim a, Mi inrâlthuomhai chu tuok dingin a fe suok a.

²²Ṭitna chu a nuisan a, a beidawng naw a, Kâwlhnâma inthawk khawma a tlânse ngai bawk nawh.

²³A chunga chun thalbâwm chu ân ri thuok thuok a, Fei le thal tle zawk zawk hai le chun.

²⁴Lunginsenna le ṭitnain hnuoi chu a lem a, Tawtawrâwt riah a ngir ṭawkṭawk thei naw a.

²⁵Tawtawrâwt chu ân ri po leh, ‘Aha,’ a ta, Hlataka inthawkin indona chu a rim a hriet a, Sipai hotuhai khêkri le an êngri chu.

²⁶“Mu hi nanga varnain a birin, A thlahai chu simtieng a phar am a nih?

²⁷Muvânlai chu insângtaka inlêng a, Chungtienga a bu siem chu nanga thupêk am a nih?

²⁸Râwlkhoa chun a um a, chutaka chun riekna chu a nei a; Kul dettak le lungpui kak kâr chunga chun,

²⁹Chutaka inthawk chun a safâk ding chu a hmu a, A mithai chun hlataka inthawk chun a en a.

³⁰A têhai khawmin thisen an dâwn a, Inthatna umna hmuna chun, chutaka chun a um a nih,” tiin.