Read Hmar JOB 42 Bible Online

JOB 42 - Hmar bible

JOB 42

¹Chun, Job chun LALPA chu a dawn a, a hril ta a:

²“Thil po pohai chu i thaw thei vawng ti ka hriet a, I thiltum khawm dang ruol a ni naw a.

³Hrietna um loa, thurâwn thuptu hi tu am a na? Chuleiin, ka ihriet naw chu ka hril el a nih;

⁴Ngai ta, ka ngên che hi, thu ka hril ding a nih: Nang chu indawn ka ti che a, mi hrilfie bawk rawh.

⁵Naa hrietna chun nangma chu ka hriet ta che a, Tu ruok hin chu ka mit hin a hmu che a ni hi.

⁶Chuleiin, kei le kei kân theida a, kân sîr a nih, Vuthai lai le pilvut laia ṭhungin,” tiin.

⁷Chun, LALPA chun Job kuoma hieng thuhai hi a hril zo chun LALPA chun, Teman mi Eliphaz kuoma chun, “Nanga chunga le i ruol pahni hai chunga chun ka lungsenna chu a hung zuol a nih, ka siehlaw Job anga keima chungthua thil indik chu in mi hrilpêk naw leiin.

⁸Chuleiin, tuhin bâwngchal pasari le berâmchal pasari kei unla; ka siehlaw Job kuoma chun fe unla, nangni ta ngei dingin pumrawhmang thilinhlân chu inhlân ro; chun, ka siehlaw Job chun ṭawngṭaipêk a ti cheu a, ama a ni leiin, kei khawma pawm ka tih, in invêtna ang peia ka thaw nawna ding cheu in. Ka siehlaw Job angin keima chungthua thil indik chu in mi hrilpêk ta si naw a,” tiin.

⁹Chuongchun, Teman mi Eliphaz le, Suhi mi Bildad leh, Naamath mi Zophar le chun an fe a, LALPAIN anni thu a pêk ang chun an thaw a. Chun, LALPA chun Job chu a pawmpêk ta a.

¹⁰Chun, LALPA chun Job chu a ruolhai ta dinga a ṭawngṭai lai chun a chan chu a sukṭha ta a; Job chu LALPA chun a hmaa a nei lêt hni chu a pêk ta a.

¹¹Chun, a unauhai po po, a farnuhai po po leh, a hmaa a lo hmêlhriet tahai chu a kuomah an hung a, a ina chun ama leh bu an fâk tâwl a, a chunga LALPAIN thil ṭha naw ân tlungtir po pohaia chun ama chu an thlasietpuiin an thlamuon a, mi tin chun sum tlâwmte seng le, rângkachak kutsebi an pêk seng a.

¹²Chuongchun, LALPA chun Job chu a hun tâwp tieng chun a hun hmasa tieng nêk hmanin mal a sâwm ta a: berâm chu sîng khat le sâng li a nei a, sanghâwngsei sâng ruk leh, bâwngchal tuok sâng khat leh, sabengtungpui sâng khat a nei ta a.

¹³Naupasal pasari le naunuhmei pathum a nei bawk a.

¹⁴Chun, a upatak hminga chun Jemima a sak a, a pahnina hminga chun Kezia, a pathumna hminga chun Keren-happuk a sak a.

¹⁵Chun, ram po poa chun Job naunuhmeihai anga hmêlṭha hrim hrim hmu an ni naw a, an pa chun an unaupahai laia chun rochan a pêk seng bawk a.

¹⁶Hi hnunga hin Job chu kum za khat le sâwmli a la dam a, a naupasalhai le a naupasalhai naupasalhai, khup li chenin a hmu a.

¹⁷Chuongchun, nihai chu tling zetin le hung tarin Job chu a thi ta a.