Read Hmar JOB 7 Bible Online

JOB 7 - Hmar bible

JOB 7

¹“Hnuoi chunga hin mihriem chun sin thaw ding a nei zing ni lo am a nih? A nihai khawm chu inhlawfa ni ang a ni naw am a nih?

²Siehlaw, deihlim inhnar ngâwi ngâwi angin le, Inhlâwfa a hlawhai ngawt en ang el chun;

³Thla teplohai chu hmang dinga siem ka na, Zân tuorhlaumtakhai chu ka ta dinga ruot a ni ta a.

⁴Ka zâl pha chun, ‘Iengtik am tho ka ti aw? Zân chu a sâwt ngei,’ ka ti a; Zîngkhaw hung var chenin kân let kân let a.

⁵Ka taksa chu pilvut khâwnhai le n gêhaia thuomin a um a; Ka vun chu a hung inhlip a, a tharin a hung suok ta a.

⁶Ka nihai chu puon khâwngtu khawthei nêkin a hrât lem a; Beiseina hrim um lova sukthâm an nih.

⁷Aw, ka hringna hi thli el a nih ti hre zing la, Ka mit hin thil ṭha hmu nâwk ta naw nih.

⁸Mit a mi hmutu khan mi hmu ta naw ni a; I mithaiin mi hung en a ta, nisienlakhawm, um ta naw ning.

⁹Sûm chu a hung inzâm a, a hung ral angin; Chuong ang chun, Seola fetahai chu hung nâwk ta naw ni hai.

¹⁰A ina chun hung kîr ta naw ni a; A hmun chun ama chu hre ta bawk naw ni.

¹¹“Chuleiin, ka bau hi insûm naw ning a, Ka thlarau thuokdawng hin thu hril ka tih; Ka lungril rimsiknaa hin sawisêl ka tih.

¹²Tuipui am ka ni, annawleh, tuipuia rûlpuitar am ka nih. Ka chunga vêngtu i sie chu?

¹³‘Ka khumin mi sukhlim a ta, Ka zâlkhum chun ka sawisêlna chu mi suknêppêk a tih,’ ka ti hlak chun.

¹⁴Nangin manghaiin i mi suklâu a; Mitthlaa thilhmuhaiin i mi sukṭi a.

¹⁵Chuongchun, ka lungril chun inâwkhlum le thina a thlang a nih; Hieng ka hringna nêk hin chu.

¹⁶Ka hringna chu ka sêngral a; dam sâwt naw ningah, Mâkhâtin mîn umtir el rawh; ka nihai chu teplo el an ni si a.

¹⁷Mihriem hi ieng am a ni a, ama chu i chawimawi a; Amaa chun i lungril în nghat a,

¹⁸Zîng tin ela i hung sir hlak a, Mitkhapkâr tina i fie hlak hi?

¹⁹Keia tieng ngha lovin i um naw ding hrim hrim am a ni? Annawleh, ka chil lem kâr el khawm makhâtin i mîn umtir naw ding am a ni?

²⁰Ka lo suol a ni khawmin, i chungah ieng am ka thaw a na, Aw, Nang mihriemhai vêngtu? Iengdinga nanga ta dinga inchikna dinga i mi sie am a na? Keima ngei ta dinga phurrik ni elna dingin.

²¹Iengdinga ka bawsietna hi i ngaidam naw a, Ka rîtlona hi i lâk hmang naw? Tuhin pilvut lai ka zâl el ding an ta si a; Ngûntakin mi zawng i ta, nisienlakhawm, um ta naw ningah,” tiin.