Read Hmar JOB 9 Bible Online

JOB 9 - Hmar bible

JOB 9

¹Chun, Job chun a dawn a, a hril ta a:

²“Chuong ang chu a nih ti indiktakin ka hriet a, Nisienlakhawm, mi chu iengtin am Pathien hmaa chun mi indiktak ni thei a ta?

³Ama le inkhing chu nuom ang sien khawm, Sâng khat laia pakhata khawm ama chu dawn thei naw nih.

⁴Ama chu lungrila var, hrâtnaa thilthawthei a na, Ama chunga insukngara hlawtling tu am um an ta?

⁵Ama chun tlânghai chu a sawn a, an hriet si naw a, An lunginsena anni a thâilet lai chun;

⁶Hnuoi chu ama hmuna chun a sukhnîng a, Chutaka banhai khawm chu ân hnîng bawk a.

⁷Nisa chu thu a pêk a, a hung suok ta naw a; Arasihai chu a khârkhip bawk a.

⁸Ama chun vânhai chu a keiphar a; Tuisuoriet fâwnhai chungah kal a chawi a.

⁹Zângkawlawi dâm, Sîruk dâm le, Sîzucho dâm siemtu le, Simtieng kâwlkawdawng hai siemtu chu.

¹⁰Ama chun inhmaa thil hriet suok ruollohai chu a thaw a; Anih, thilmak tiem sêng lohai chu.

¹¹En ta, ka kâwla chun a fe a, ama chu ka hmu naw a, A fe pei a, ama chu ka hriet si nawh.

¹²En ta, a lâk el a, tuin am dang thei a ta? ‘Ieng am i thaw a?’ tuin am a kuomah tîng a ta?

¹³“Pathien chun a lungsen chu la kîr naw ni a, Rahab ṭhangpuituhai chu a hnuoiah an kûn ngei kha.

¹⁴Kei taktê hin iengtin am ama dawn ka ta? Ama kalin khâwlai ka ieng thu tak am phawr thei ka ta?

¹⁵Kei chu mi fel ni lang khawm, la dawn naw ning a; Ka chungthu rêltu ding kuoma chun hnina siem lem ka tih.

¹⁶Ama ka ko chun a mi hung dawn hlak a; Ama chun ka râwl chu a ngai naw am a ni ka la sâwn rawp a.

¹⁷Thlipui chu mîn nuoitirin, A san boin ka hliemnahai chu a sukpung ta a.

¹⁸Ka thuok lâk ding chu mi ngaithei naw ni a; Khâknain mi suksip lem a tih.

¹⁹Hrâtna thu ei hril chun ama chu thilthawthei a na! Rorêlna thu hril inla, tuin am ama chu ko thei a ta?

²⁰Kei chu mi fel ni lang khawm ka bau ngeiin thiemnaw mîn chan a ta; Kei chu mi tluongtak ni lang khawm, kâwmâwah mîn chan a tih.

²¹Mi tluongtak ka na; kei le kei kân ngaisâng naw a; Ka hringna chu ka hmusit a;

²²A rêngin angkhat vawng a nih; chu lei chun annâwm, ‘Ama chun mi tluong le mi khawhlo khawm chu a suksiet ve ve,’ ka ti chu.

²³Vuokna chun a sukhlum nghâl chun, Mi pawitâwklo vângduoina chu nuisan a tih.

²⁴Hnuoi hi mi khawhlo kuta chun pêk a na, Chu chun rorêltuhai hmaihai chu ama chun ân khum a nih. Ama a ni naw chun, tu am nîng a ta?

²⁵“Tuhin ka nihai chu thangkohai nêkin an hrât lem a; An tlân hmang a, thil ṭha hrim an hmu nawh.

²⁶Lawnglien hrâthai angin an fe hmang a; Mupui a sa fâk ding chunga a bir ang elin.

²⁷‘Ka sawisêlna theinghil ka ta, Ka hmêl lungngai hi sie hmang ka ta, Hlimtakin um ka tih,’ ti lang:

²⁸Ka lungngainahai po po chu ka ṭi a, Nang chun pawitâwkloah mi sie naw ti ni ti ka hriet si a.

²⁹Thiemnaw inchangtirin um ngei ka tih; Chuong sa chun, a thlâwn elin ienga dîm lân rim rawp ka ta?

³⁰Vûrtuiin kei chu insilin, Ka kuthai chu changalin sâwp lang khawm,

³¹Nang chun khura chun mi phûm tho i ta, Ka silfênhai ngei chun mi tirdak an tih.

³²Ama chu ka dawn dingin keima anga mihriem a ni si naw a, Rorêlnaa hang ngîr hmunkhatpui ding êm chun.

³³Kan inkârah ṭheltu tukhawm an um naw a: Kan chunga kut innghat ve ve theitu ding chu.

³⁴Keimaa inthawkin a hmawl chu la hmang sienla, A ṭiumnahai chun mi sukṭi ta naw raw se,

³⁵Chuongchun, ama ṭi lovin thu hril ka tih. Keimaa hin chuong ang chu ka ni si naw a.