Read Hmar INPÂKNA HLA BU 10 Bible Online

INPÂKNA HLA BU 10 - Hmar bible

INPÂKNA HLA BU 10

¹Aw LALPA, iengdinga hlatakah i ngîr hlak am a na? Iengdinga lunginzîng hun laia inbi hlak am i na?

²Mi rilohai chapona leiin mi rimsihai chu hnawt zêkin an um hlak a; An thil suol ngaituo suokhaia chun anni ngei âwk raw se.

³Mi rilo chun a lungril thil dit zâwng chu a suong hlak a. Mi duâm chun LALPA chu a peithlâk a, a hmusit hlak.

⁴Mi rilo chun chapo hmêl putin, “Iengkhawm mi ti hliek naw ni,” a ti hlak a, A ngaituona po po chu “Pathien hrim a um nawh,” ti ruok hi a nih.

⁵A umdânhai chu ieng lai khawmin a det zing a, I rorêlnahai chu chungtieng hlatakah, a hmu phâk nawah a um dai a: Ama dotuhai po po hlak chu a nuisan el a.

⁶A lungrila chun, “Châng naw ning: Suon po po chenin lungzîngin um naw ning,” a ti a.

⁷A bau chu ṭawngse inphurna dâm, hlêmna dâm, suknawmnatna dâmin a sip a; A lei hnuoia chun thil suksuolna le khawhlona a um a.

⁸Khaw tina inchân rûkna hmunhaiah a ṭhung hlak a, Hmun fienriela chun pawitâwklo mihai a that hlak a; A mitin iengkhawm thaw thei lo mi chu ân chânrûk zing hlak.

⁹Sakeibakneiin a pûka ân chânrûk angin, ama chun fienrielah ân chânrûk zing hlak a; Mi rimsi man dingin an chân hlak a, Mi rimsi chu a man ngei a; chuongchun, a lênin a keihmang hlak.

¹⁰A bawkphêk a, a kûn a, Iengkhawm thaw thei lohai chu mi hrâthai sukthlûkin an um hlak.

¹¹A lungrila chun, “Pathienin a theinghil tah; A hmai a thup a, iengtika khawm hmu naw ni,” a ti hlak a.

¹²Aw LALPA, tho la, aw Pathien, i kut hang inlet ta, Mi rimsihai chu theinghil naw rawh.

¹³Ieng dinga mi rilo chun Pathien hmusitin, A lungrilah, “Iengkhawm mi ti hliek naw ti nih,” a ti hlak am a na?

¹⁴Hmu chu i hmu zing ta a, i kuta thung dingin buoina le lungzîngna chu în chik ta a, Iengkhawm thaw thei lo mi chu i kuomah a tlulût hlak a; Pa bo ṭhangpuitu i ni hlak kha.

¹⁵Mi rilo, bân chu suktliek la, Mi suol chu a rîtlona zawng suok la, i hmu naw dêr hmakhat chun.

¹⁶LALPA chu kumkhawtluonga dingin laltak a na, Hnam tin chu ama rama inthawkin bohmang an tih.

¹⁷LALPA, zainêmhai dit zâwng chu ngaipêk i ta; An lungril chu buotsai i ta, i na chu inngaitir bawk i tih:

¹⁸Pa neilo le nêksâwrna tuorhai chu ro rêlpêkna dingin, Hnuoia mi chu ṭiumtaka an um nâwk ta nawna dingin.