Read Hmar INPÂKNA HLA BU 101 Bible Online

INPÂKNA HLA BU 101 - Hmar bible

INPÂKNA HLA BU 101

¹David Inpâkna Hla. Ngilneina le rorêlna thu chu hlain sak ka ta, Aw LALPA, nangma inpâkin hla sak ka tih.

²Kawng ṭha famkima chun vartakin um ka ta, Aw iengtik âm ka kuomah hung i ta? Ka in sûngah lungril ṭha famkim putin um ka tih.

³Thil ṭha naw hrim hrim ka mithmua chun sie naw ninga a, Fe pêthai thilthaw chu ka theida a nih; Keimaah kawp naw nih.

⁴Lungril kâwmâw chun mi mâksan a ta, Thil suol hrim hrim hre naw ningah.

⁵Tukhawm a vênghai arûka rêl taphawt chu, chu mi chu sukbohmang ka tih, Mit insâng le lungril chapo put mi chu ngaithei naw ning.

⁶Hi rama mi ringumhai chunga hin ka mit fûng a ta, ka kuoma an um theina dingin; Kawng ṭha famkim hrawtu chun, ama chun ka rawng bâwl a tih.

⁷Mi hlêm hmang chu ka in sûngah um naw ni a, Khêl hril hmang chu ka mithmuah sukdetin um naw nih.

⁸Tûk tin hi rama mi rilohai hi sukbohmang ka ta, LALPA khawpuia inthawk hin thil suksuoltuhai po po sukbohmang dingin.