Read Hmar INPÂKNA HLA BU 102 Bible Online

INPÂKNA HLA BU 102 - Hmar bible

INPÂKNA HLA BU 102

¹Rinum dotu ṭawngṭâina. A chau a, LALPA hmaah a lungzingna thu a hril laia mi Aw LALPA, ka ṭawngṭâina hi lo ngai la, Ka khêkri hi i kuom tlung raw se.

²Ka lunginzîng ni chun keia kuomah i hmai thup naw la, Keia tieng hin i na hung sit la, Ka ko pha che chun mi hung dawn vak rawh.

³Ka dam sûng nihai hi meikhu angin ân zâm hmang a, Ka ruhai hi thingthu angin a sa a,

⁴Ka lungril hi hlobet anga em hlumin a um a, a vuoi zo tah: Bu fâk khawm ka theinghil si a.

⁵Kân rûm rîk leiin, Ka ruhai hi ka taksaah a kawp tlat a nih.

⁶Thlalêr tuivalawng ang ka na, Khaw hmun hlui simbuk ang el ka lo ni ta a.

⁷Ka meng zing a, Chawngzawng a khât chaua in chunga um ang ka lo ni ta a.

⁸A mi dotuhai chun sûnnithlâkin an mi hrilsiet hlak a, Ka chunga ṭiumhai chun vânnikhâmnain an mi hmang a.

⁹Vut hi bu angin ka fâk a, Ka dâwn ding chu mitthli leh ka pawl ta si a.

¹⁰I lungninaw êm êm le i lunginsen leiin, Nangin i mi lâk kâng a, i mi pei ta si a.

¹¹Ka dam sûng nihai hi hlim bo tieng intung ta ang a na, Hlobet angin ka vuoi ta a.

¹²Aw LALPA, nang ruok chu kumkhawtluongin um i ta, Nangma hriet zingna khawm suon po po chenin um bawk a tih.

¹³Tho i ta, Zion tlâng chu lunginsiet i tih, Ama chu lunginsiet a hun ta si a anih, hun ruot chu a tlung tah.

¹⁴I siehlawhai chun a lunghai chu an ngainain, A pilvut chen khawm an lunginsiet si a.

¹⁵Chuongchun, hnam tinin LALPA hming chu ṭîng an ta, Hnuoia lal po pohai chun i ropuina chu ṭî bawk an tih.

¹⁶LALPA chun Zion khuo chu ân ngîr nâwk ta si a, A ropuinaa inthuomin ân lang tah.

¹⁷Pasiehai ṭawngṭâina chu a ngaisak a, An ṭawngṭâina chu a hmusit nawh.

¹⁸Chu chu ruolthar la hung um dinghai ta dingin ziek nîng a ta, Hnam siema la hung um ding chun LALPA chu inpâk an tih.

¹⁹Ama chun a hmun inthieng insângtaka inthawkin a zuk thlîr a, LALPA chun vâna inthawk khin hnuoi hi a hmu a;

²⁰Mi intâng inrûm chu ngai ding le, Thi dinga ruothai chu sût dingin.

²¹Mihaiin LALPA hming chu Zion khuoa le, Ama inpâkna thu chu Jerusalem khuoa an hril theina dingin;

²²LALPA rawngbâwl dinga, Mi tin le ram tin an inkhâwm pha chun.

²³Ama chun lam kâra hin ka tha a sukṭhum a, Ka dam sûng hi a suktâwi a.

²⁴“Aw ka Pathien, ka vânglai nihaia hin mi la hmang naw la, Nanga kumhai chu suon um sûng po po um a tih,” ka ti a.

²⁵Leihnuoi innghatsan chu tiena i phûm tah a na, Vânhai khawm i kutsuok an nih.

²⁶Chuonghai chu la bohmang a ta, nang ruok chu um zing i tih. Anih, chuong po pohai chu silfên angin la hlui a ta, Puon angin thleng i ta, hung danglam tâng a tih.

²⁷Nang ruok chu i pângngai zing a, I kumhai chun bo ni hrim nei naw ni.

²⁸I siehlawhai nauhai chu um zing an ta, An thlahai chu i hmaah sukdetin um an tih.