Read Hmar INPÂKNA HLA BU 103 Bible Online

INPÂKNA HLA BU 103 - Hmar bible

INPÂKNA HLA BU 103

¹David Inpâkna Hla. Aw ka hringna, LALPA chu inpâk la, Ka sûnga um po pohai, a hming inthieng chu inpâk ro.

²Aw ka hringna, LALPA chu inpâk la, A thilthaw ṭhat po po chu theinghil naw.

³Ama chun i rîtlona po po a ngaidam hlak a, I natna po po a sukdam hlak.

⁴Bohmangnaa inthawkin i hringna chu ân tlan hlak a, Zainêmna le lainatnahai ân khumtir hlak che a.

⁵I bau[24] chu thil ṭhain a sukkhawp hlak a; chuongchun, i tleirâwlna chu mupui anga siemtharin a um nâwk hlak.

⁶LALPA chun nêksâwrna tuorhai po po ta dingin, Thil felhai thawpêkin, rohai a rêlpêk hlak.

⁷A lampuihai chu Mosie ân hriettir a, A thil thawhai chu Israel mipuihai ân hriettir bawk a.

⁸ LALPA chu lainatnaa sip, mi lunginsiet theitak, Lunginuoitak, ngilneina hautak a nih.

⁹Ama chun hal rawp naw ni a, A lungsen chu vawng kumkhuo naw ni.

¹⁰Ei suolnahai angin ei chungah a thaw naw a, Ei rîtlona angin a mi thung bawk nawh.

¹¹Vân khi hnuoi chung insângtaka a um angin, Ama ṭituhai chungah a ngilneina chu a nasa a nih.

¹²Sak le thlang ân hlat angin, Ei bawsietnahai chu ei kuoma inthawkin a sie hmang dai ta a.

¹³Pain a nauhai a lunginsiet ang hin, LALPA chun ama ṭituhai chu a lunginsiet hlak.

¹⁴Ei taksa siem dân hi a hriet a, Pilvut el ei nih ti a hriet zing leiin.

¹⁵Mihriem chu, a dam sûng nihai chu hlobet ang a na, Phûl pâr ang hin a vul hlak a.

¹⁶Thliin a mût a, a bo hlak a nih, A umna chun hre nâwk ta naw nih.

¹⁷ LALPA zainêmna ruok chu a ṭituhai chunga chun chatuona inthawka chatuon chenin um a ta, A felna khawm an thlahai thlahai chenin;

¹⁸A thuthlung zâwm taphawt le, A thuhrilhai awi tuma hre zinghai taphawt chunga chun.

¹⁹LALPA chun a lalṭhungpha chu vâna khin a sukdet a, A ram chun iengkim chungah ro a rêl a.

²⁰A vântirkohai, a thu ngaia, a thu zâwma, hrâtnaa ropui hlakhai, LALPA chu inpâk ro.

²¹A sipaihai, LALPA chu inpâk ro, A dit zâwng thawa a rawng bâwltuhai,

²²A rorêlna hmun po poa a thilthaw po pohai, LALPA chu inpâk ro: Aw Ka hringna, LALPA chu inpâk rawh.