Read Hmar INPÂKNA HLA BU 104 Bible Online

INPÂKNA HLA BU 104 - Hmar bible

INPÂKNA HLA BU 104

¹Aw ka hringna, LALPA chu inpâk rawh, Aw LALPA ka Pathien, nang chu i ropui êm êm a, Chawimawina le ropuinain în thuom a.

²Nang chun var chu puon angin în bel a, Vânhai khi puon in chung angin i kei phar a.

³Nang chun i pindan chunghnung kalkhanghai chu tuiahai khin i khang a, Sûmhai khi i tawlailîrah i siem a; Thli thla chungahai chun i lêng a.

⁴Thlihai chu i vântirkohai în changtir a, Meichawk dur dur hai chu i rawngbâwltuahai în changtir hlak.

⁵Leihnuoi innghatsanhai chu i phûm a, Kumkhawtluonga ân hnîng nawna dingin.

⁶Nang chun leihnuoi hi tui inthûktak chu puon angin în siltir a, Tuihai chu tlânghai chunga chun an um puou a.

⁷I kâwkna lei chun an tlânhmang a, I vâninrûm ri lei chun an fe hmang ta vak a.

⁸Tlângahai an hung ngîr suok a, Ruomahai an ṭum thla a, An ta dinga hmun i buotsaina tieng chun.

⁹An khêl naw dingin ri i khang a, Hnuoi chîm tlum dinga an lêt nâwk ta nawna dingin.

¹⁰Nang chun vadung ruomhaia dâm chun tuihnârhai i tir suok a, Tlânghai kâra chun an luong a.

¹¹Chuonghai chun ram sa tinrênghai kuomah dâwn ding an pêk hlak a, Ram sabengtunghai chun an dangchâr an sukbo hlak.

¹²A kamhaia chun chunglêng vatêhaiin umna an nei hlak a, Thing buk laia chun an inhrâm hlak.

¹³Ama chun a pindan chunghnunga inthawk khin tlânghai chu tuiin a châwm hlak a, Hnuoi hi i thilthaw rahaiin a khawp hlak.

¹⁴Hlobet chu ranhai ta dingin ân mâwngtir a, Thlai chu mihriem hmang dingin ân mâwngtir bawk a, Hnuoia inthawk fâk ding ân suoktir theina dingin.

¹⁵Mihriem lungril suklâwmna uoin leh, A hmai suktlawrna ding hriek leh, Mihriem lungril sukhrâtna bei leh.

¹⁶LALPA thinghai chu an khawp hlak, Lebanon tlânga sidar thing a iphunhai chu.

¹⁷Chutaka chun vatêhai chun bu an sep hlak a, Vakâwl ruok chu fâr thing chu a in a nih.

¹⁸Tlâng insânghai chu sakêl ta ding a na, Lungpuihai chu mazupui ta dinga inhumhimna a nih.

¹⁹Ama chun thla khi hunbi hrietna dingin a ruot a, Nisa khin a tlâk pha chu a hriet hlak.

²⁰Nang chun inthim i siem a, zân a hung na, Chu huna chun ramhnuoia sa tinrênghai chu an tla suok hlak.

²¹Sakeibaknei vânglaihai chun an sa se ding chu inrûmkhumin, Pathien kuoma inthawka an fâk ding an zawng hlak.

²²Nisa a suok a, an fe hmang a, An umna pûk senga chun an zâl hlak.

²³Mihriem chu sinthaw dingin a suok a, Zântieng chenin inrimtakin a thaw hlak.

²⁴Aw LALPA, i thilthawhai chu a va tam de! Varnain i siem vawng a nih: Leihnuoi hi i hausaknain a sip a ni hi.

²⁵Sawtaka sawn tuisuoriet a um a, nasatak lientak el chu, Sawtaka sawn thilhring bawkvâka lâwn tiem sêng lo an um a, Sa chîn le sa lienhai chu.

²⁶Sawtaka sawn lawnglienhai an fe saw, Sawtaka sawn leviathan a um a, a sûnga inhnel dinga i siem chu.

²⁷Chuong po po chun an nghâk seng che a nih, A hun taka an bu i pêk seng hlakna dingin.

²⁸An kuoma i pêk taphawt an rût hlak a, I kut i phar a, ṭhatnain an khawp hlak.

²⁹I hmai i thup a, an lunginzîng hlak a, An thuok chu i lâkpêk a, an thi a, An pilvuta chun an kîr nâwk hlak.

³⁰I thlarau chu i tir suok a, siemin an um hlak; Hnuoi chung khawm hi i siem thar nâwk hlak.

³¹LALPA ropuina chu kumkhawtluongin um sienla, LALPA chu a thilthawahai chun hlim raw se.

³²Ama chun hnuoi hi a en a, ân thin hlak a, Tlânghai chu a them a, a khu suok hlak.

³³Ka dam sûng po chu LALPA chawimawiin hla sak ka ta, Ka hring sûng po chu ka Pathien chu inpâkin hla sak ka tih.

³⁴Ka ngaituona hi ama ta dingin thlumtak ni raw se, Kei chu LALPAA chun hlim ka tih.

³⁵Mi suolhai chu hnuoia inthawk hin sukbohmangin um hai sienla, Mi rilohai chu um ta naw raw hai se! Aw ka hringna, LALPA chu inpâk rawh! LALPA chu inpâk ro!