Read Hmar INPÂKNA HLA BU 106 Bible Online

INPÂKNA HLA BU 106 - Hmar bible

INPÂKNA HLA BU 106

¹LALPA chu inpâk ro, LALPA kuoma chun lâwmthu hril ro, ama chu a ṭha si a; A ngilneina chun kumkhuo a dai si a.

²Tu am LALPA thilthaw ropuitakhai hril thei a, Ama inpâkna po po inhriettir vawng thei le?

³Rorêlna vawng ṭhahai chu an hamṭha ie, Ieng lai khawma feltaka thawtu leh.

⁴Aw LALPA, i mihai i ditsakna chun mi hre zing la, Aw i Sandamna leh mi hung kan rawh.

⁵I mi thlanghai tluongtlungzie ka hmu thei a, I hnamhai lâwmnaa chun ka hlim thei a, I rochanhai leh ka suong theina dingin.

⁶Kan thlatuhai le khan thil kan suksuol a, Thil suol kan thaw a, suoltakin kan thaw ta a.

⁷Kan thlatuhai khan Aigupta rama khan i thilmak thawhai kha an hriet thiem naw a, I ngilneina nasatak kha an hriet zing ta naw a, Tuipui Sen-a khan, A Chunghnungtak lakah an hel ta lem a.

⁸Chuong sa khawm chun ama hming leiin anni chu a sandam ta a, A thilthawtheina ropuitak chu ân hriettir theina dingin.

⁹Tuipui Sen chu a hal a; chuongchun, a kang ta a, Chuongchun, anni chu thlalêra ṭhuoi tlang ang elin tui inthûktakahai chun a ṭhuoi tlang ta a.

¹⁰Anni theidatu kuta inthawk chun a sandam a, Hmêlma kuta inthawk chun ân tlan ta a.

¹¹Tuihai chun anni dotuhai chu ân khum zo a, Pakhat khawm dama suok an um ta naw a.

¹²Chuong lai chun a thuhai chu an ring a, Ama inpâkna hla an sak a.

¹³Nisienlakhawm, a thilthawhai chu an theinghil vak ta a, A remruot chu an nghâk pei naw a.

¹⁴Thlalêra chun thil an châk êm êm a, Ram ṭâwla chun Pathien an fie ta lem a.

¹⁵An thil hni chu a pêk a, Nisienlakhawm, an hringnaa chun chêrna ân lûttir a,

¹⁶An riebûka chun Mosie chu an îtthîk a, LALPA mi inthieng, Aron leh.

¹⁷Hnuoi chu a ka a, Dathan chu a lem a, Abiram pâwlhai chu ân khum zo ta a.

¹⁸An pâwl lai chun mei sukchawkin a um a, Meichawk chun mi rilohai chu a kâng hmang ta a.

¹⁹Horeb tlânga chun bâwngte lim an siem a, A lim sung chu an biek ta a.

²⁰Chuong ang chun an ropuina chu, Bâwngchal hlobet fa mi ang chauah an inchangtir ta a.

²¹Pathien an sandamtu an theinghil ta a, Aigupta rama thil ropuitak tak thawtu chu;

²²Ham rama thilmaktakhai, Tuipui Sen panga thil râpthlâktakhai thawtu chu.

²³Chuleiin, sukbohmang rawi a tih, tia, a lunginsen sukkîr dingin, A mi thlang Mosie chu a lûtna dinga chun a hmaah ngîr naw sien lem chu, Sukbohmang a tih, ti a hril a.

²⁴Anih, ram ditumtak chu an ngainêp a, A thu chu an ring nuom naw a.

²⁵An puon inahai chun an chier ta lem a, LALPA râwl chu an ngai nuom naw a.

²⁶Chuleiin anni tieng chun a kut a phar a, Anni chu thlalêra sukthlûkna ding le,

²⁷An chi thla dinghai chu hnam tin lai a sukthlûk a, Ram tina a sukdarna dingin.

²⁸Baal-peor tieng chun an kawp a, Mithi kuoma thilinhlânhai chu an fâk ve ta a.

²⁹Chuongchun, an thilthawhaiin ama chu an suklungsen a, Chuongchun, hri chu an chungah a hung inlêng ta a.

³⁰Chuong lai chun Phinehas chu a ngîr a, ro a rêl a; Chuongchun, hri chu sukboin a um ta a.

³¹Chu chu a felnaa ruot a nih, Kumkhuoin suon po po chenin.

³²Meriba tuiahai khawm chun ama chu an suklungsen a, Chuongchun, anni leiin Mosie chungah thil ṭha naw a tlung ta hiel a,

³³A thlarau chungah an hel a, A hmûra ṭha nawtaka a hril leiin.

³⁴LALPAIN an kuoma sukbohmangna thu a pêk angin, Mipuihai chu an sukbohmang naw a.

³⁵Hnam tin chu an pâwl a, An thilthawhai chu an inchûk lem a.

³⁶A milim rawnghai an bâwl a, Chuong chu an ta dingin châng a lo ni tah.

³⁷Anih, khawhri kuoma chun an naupasalhai le an naunuhmeihaiin an inthâwi a;

³⁸Thisen pawitâwklo, an naupasalhai le an naunuhmeihai thisen ngei chu an insuo ta a, Chuonghai chun Kanaan ram milimhai kuomah an inthâwi a, Chu ram chu thisenin a lo pawrche ta a.

³⁹Chuongchun, an sinthawhaia sukkhawlovin an um ta a, An thilthawhaia chun an hung uire ta a.

⁴⁰Chuleiin, LALPA lung chu a mihai chungah ân thawk a, A rochan chu a tirdak ta a.

⁴¹Chuongchun, anni chu hnam tin kutah a pêk a, Anni theidatuhai chun an chungah ro an rêl ta a.

⁴²Anni dotuhaiin an nêksâwr a, An kut hnuoia chun suktlâwmin an um ta a.

⁴³Vawi tamtak anni chu a sandam a, Nisienlakhawm, an remruotnaa chun an hel hlak a, An rîtlonaa chun sukhnuoiin an um ta a.

⁴⁴Chuong sa khawm chun, ama chun an khêkri chu a hriet chun, An lunginzîng chu a ngaisak a.

⁴⁵A thuthlung chu anni a hrietpêk zing a, A ngilneina nasatzie ang peiin a lungril ân lêt ta a.

⁴⁶Sala ṭhuoituhai po po chu, Anni a lunginsiettir a.

⁴⁷Aw LALPA, kan Pathien, mi sandam la, Hnam tin laia inthawk hi mi ṭhuoi khawm rawh: I hming inthieng kuoma lâwmthu hril ding le, Nangma inpâkna chawimawi dingin.

⁴⁸ LALPA Israel Pathien chu inpâkin um raw se. Chatuona inthawka chatuon chenin. Mi po po chun, “Amen,” ti raw se; LALPA chu inpâk ro.